Findi ɓi Misra moocoh na aɗa
13Aɗa miskeen lool po ali kañam raakisɗi ŋ Misra na Kanaan, ɓooɓa looffa keeh-keeh sagu aɗuk ; 14Yuusufa nangɗohha haalsaŋ Kanaan na waŋ Misra jen, wa ɓa romohe bele, a ɓayyaa kahan Firawnaana.
15Wa kaɗta po ali haalis raakisɗi ŋ Misra na Kanaan, ɓi Misra jen hayya ŋ Yuusufa ɓa woosa ɗe ne : « Hanaa fu heyɗi ɓoo markiɗe po ɓoo kaan ŋ aɗi. Eɗa ɓoo pesoha laam ɓoo raakisɗi ali haalis romoha. » 16Yuusufa woosa ɓa ne : « Nik ne ɗu raakisɗi haalis ɗah, ɓayaat ɗoopaat ciŋ ɗu, ŋ lofiɗ ɗu ca pesoha. » 17Weɗi ɓa ɓayoh panis caŋ ɓa, mbaal ca, pe' ca, inoh ca na mbaam ca jen, ɓa eɗeeɗa Yuusufa ca, a lofɗeeɗa ɓa ca bele. Ɓa raakka pesoha ŋ kiis kaam.
18Wa kiis ka reeh, ɓa hayissa ŋ Yuusufa ɓa woyissa ɗe ne : « Kilifaani, fu inhiɗ ne ɓoo raakisɗi haalis te ɗoopaat ciŋ ɓoo ceɗi na ɗa, ɓoo tasɗisɗi ali in romoha, nikɗi faan ciŋ ɓoo na keheƴ ciŋ ɓoo ɗah. 19Hanaa fu heyɗi ɓoo markiɗe, po ɓoo kaan na aɗ, yohon ciŋ ɓoo kasaara. Romoha ɓoo pees, ɓoo na yohon ciŋ ɓoo, ɓoo nik ñaam ciŋ Firawnaani. Eɗa ɓoo tisoh, ɓoo min pes, keheƴ ci nikuu ɓarang ɓarang. »
20Weɗi Yuusufa romɗoh Firawnaana kehƴaŋ Misra jen. Yaa nu nik ŋ Misra ɗah, toonnda yohon ce sagu miska aɗa miske. Merhey maŋ kur ka jen nikka wuu Firawnaana kotii, 21Yuusufa tummba ɓa gen nga ñaam ɓak po ɓak ŋ kur ka. 22Keheƴ caŋ seeƴkiɗoh ca dong ceɗ Yuusufa tasee rom laam, ɓa raakeen pesoha sagu ina Firawnaana meeɗ ɓa waɗ ; weɗ tah ɓa tooneeɗi yohon caŋ ɓa.
23Yuusufa woosa ɓooɓa ne : « Ɗiski wa nik ndii, ɗu romuuɗ, a Firawnaani raak ɗu na keheƴ ciŋ ɗu. Tisoh ceɗi cii, sokaat yohon ci, 24waaye yatuus nu pul nga ɗah, a Firawnaani raakan yinoori, ɗu raak nikiis ci tas, ɗu puliɗ tisoh nga, ɗu nam raak pesoha, ɗu na kuɓuuciŋ ɗu na ɓi gen na ɗu jen. » 25Ɓa woosa ne : « Kilifaani, ɓoo teyɗukiɗ nik ñaam ciŋ Firawnaani laam fu baahohiɗ ɓoo te fu mucɗiɗ ɓoo. » 26Yuusufa tufkiɗoh ineem ɗaa ŋ Misra ŋ jamanoonaam te wa ris nga po ɗiski maa woyohe na ɗu ndii. Yatuus nu nguɗohu ŋ keheƴ ciŋ Misra ɗah, a Firawnaani na raake yinoori po tas keheƴ ciŋ seeƴkiɗoh ci laam a raakɗi ca.
