Yeesu ŋ saangnaŋ atte'oh ca
57Ɓooɓa ambee Yeesu ɓa ɓay ɗe kahan Kayif seeƴkiɗoha yakka, wa raak jangɗohoh ciŋ waasi na yakak ca cohiɗ nga. 58Piyeer nikee ñaakɗeeɗa ɗe usiɗ ŋ finhoora po findi a reyoh kahan seeƴkiɗoha yakka, a aassa, a ɓooffa na surgaaca ŋ leero kahna ne a marak findi wa mirndohan.
59Kilifaacaŋ seeƴkiɗoh caŋ waasiŋ Musaa na ɓooɓa ɓinooɓa ɓaah ŋ saangnaŋ yakak caŋ Israayel jen waakeeɗa seede leyoh ne ɓa raak ini tah ɓa min apɗuk Yeesu, 60waaye ɓa raakɗi ini ɓa etoh, ali nik ne leyoh laayiɗ nikee seede'eeɗa woo raakaaɗi nga ɗe sah. Ŋ mirndaani kanak hayya 61woosa ne : « Ƴaarii woyiɗ ne a miniɗ yahroh Kahniŋ Kooh, a taɓaha ŋ neeh kaahay. »
62Teemb ndeem, seeƴkiɗoha yakka kurukka, woosa Yeesu ne : « Fu heyɗi lofe ali in ŋ in ci ɓooɓi na yambee ɗa e ? » 63Yeesu ɗekka teɗ. Seeƴkiɗoha yakka woosa ɗe ne : « Mi yii meekis ɗah, ŋ tiikiŋ Koohi na pese, woya ɓoo andi a fu Mucɗohi Gapohse, Kuɓkiŋ Kooh ! »
64Yeesu loffa ɗe ne : « Fu woyiɗa ! Te ɓaat nga ñam na woyee ɗu wa, ini kooɗoh ndii ɗu hey hote Kuɓkiŋ ɓoyi ɓoofiɗ ŋ ñaahmiŋ doolndiŋ Kooh, ɗu hey ɗe hote ŋ ɗafuk ɓi eel, ca haytohee ɗe. »
65Weɗ seeƴkiɗoha yakka faaroh kulɓaacaŋ ɗe haf ce, ne a teeɓoh ne wa woo uupiɗ. A woosa ɓa ne : « A ɗaliɗ Kooh ! Ɓoo etohis seede ye ? Ɗu kerhootiɗ ɗali a ɗal Kooh kotii ! 66A joy ye tumu ? » Ɓa loffa ne : « A apaah apu ! » 67Ɓa tuhseeɗa fikiiriŋ ɗe, ɓa laɓeeɗa ɗe kumah, ɓum laɓeeɗa ɗe paɗ 68woyeeɗa ne : « Fu yi Mucɗohi Gapohse ! Nik ne fu woosuuɗ ɗah, woya ɓoo ɓoyi laɓ ɗa ! »
