ಕ್ರಿಸ್ತನಾ ಮುಲಕ ಕ್ಹುದಾನಾ ಕ್ಹಾತೆ ದೊಸ್ತಿ
11ಪ್ರಭುನು ಭೆ ಸುವೈ ಕವಾನು ಅಪೊನೆ ಗ್ವತ್ತ ಛೆ. ತಿನಾಹುತಿ ಕ್ಹರಿನೆ ವಪ್ಪಿಲಿವಾನಾಹುತಿ ಮನಕ್ಹೊನೆ ಮದತ ಕರಾನೆ ಅಪೆ ಕೊಶಿಶ ಕರಿಯೆಸ. ಅಪೆ ಕೆವಾ ಛೆ ಕವಾನು ಕ್ಹುದಾನೆ ಗ್ವತ್ತ ಛೆ. ತುಮೆಬಿ ತುಮಾರಾ ಮನಸೊ ಕಿಮ್ಮ ಛೆ ಕವಾನು ವಳಕ್ಯಾಸ ಕೈನ ಬರೊಕ್ಹೊ ಛೆ. 12ಹಮೆ ತುಮಾರಾ ಕ್ಹಾಮಾ ವರಿ ಯಕ್ಕೆಬ ಸಾಬಿತ ಕರಾಡ್ಯಾನತ್ತಿ. ವರಿಬಿ ಹಮಾರಾ ಹುತಿ ತುಮೊಕನ ಕವಾಡ್ಯಾಸ. ತುಮೆ ಹಮಾರಿ ವಿಶಯಮಾ ಹಮ್ಮೆ ಕರಾನೆ ತುಮೊನೆ ಸಬುತ ದಿಯೆಸ. ತೆಳಾಮಾ ಡೊಳೆ ದಿಕ್ಹಾನಾ ಕಾಮೊನೆ ದೆಕಿನ ಹೆಮ್ಮೆ ಪಡಾನಾ ಮನಕ್ಹೊನೆ ದಿವಾನು ಸಬೊತ ಹಮೊಕನ ರ್ಹವಸ. ತೆ ಯಕ್ಕ ಮನಕ್ಹನು ಮನಸನಾ ಹುತಿ ಚಿಂತಾ ಕರ್ತೊ ನೈ. 13ಹಮೆ ಪಿಸಾಳಾ ವಸೆತೊ ತೆ ಕ್ಹುದಾನಾ ಹುತಿ ವ್ಹೈ ವರಿ ಹಮೊಕನ ಚೊ಼ಕು ಗ್ಯಾನ ರ್ಹಯುಮ ತುಮಾರಾ ಹುತಿಜ಼ ವ್ಹೈ. 14ಕ್ರಿಸ್ತನಿ ಮಯಾ ಹಮೊನೆ ವತ್ತಾಯಾ ಕರಸ. ಕಾ ಕದ್ಯಾಮ ಕ್ಹಾರಾ ಮನಕ್ಹೊನಾ ಹುತಿ ತೆ ಮರ್xಯೊಸ ಕೈನ ಅಪೊನೆ ಗ್ವತ್ತ ಛೆ. ತಿನಾಹುತಿ ಕ್ಹಾರಾ ಮರ್xಯಾ. 15ಜಿವ್ತಾ ರ್ಹವಾಲಾ ಇತ್ತಿ ಉಪ್ಪರ ತ್ಯುನಾಹುತಿ ಜಿವ್ನಾ ಕರು ನೈ ಕೈನ ಕ್ರಿಸ್ತ ಕ್ಹಾರಾ ಮನಕ್ಹೊನಾ ಹುತಿ ಮರ್xಯೊ. ತೆ ಮನಕ್ಹೊ ತಿನಾಹುತಿ ಜಿವ್ನಾ ಕರು ಕೈನ ತೆ ತ್ಯುನಾಹುತಿ ಮರ್ಯೊ ವೆ ಮರಲವಾಲಾವೊಮಾತೊ ಜಿವ್ತೊ ಥೈನ ಉಟ್ಯೊ.
16ಇಮ್ಮ ರ್ಹಯಲಹುತಿ ಮನಕ್ಹೊನಾ ಅಂಗನಾಹುತಿ ವಿಚಾರ ಕರಾನು ಆಜ಼ತಾ ವಿಚಾರ ಕರ್ತಾ ನೈ. ದುನಿಯಾ ವಿಚಾರ ಕರಲಿಂಗತ ಪಾಚ಼ಲ್ಯಾ ಕಾಲಮಾ ಹಮೆ ಕ್ರಿಸ್ತನಾ ಹುತಿ ವಿಚಾರ ಕರ್ಯಾತಾ. ಹಮ್ನಾ ತಿಮ ಹಮೆ ವಿಚಾರ ಕರ್ತಾ ನೈ. 17ಕುನಬಿ ಕ್ರಿಸ್ತಮಾ ರ್ಹಯೊಮ ತೆ ನವೊ ಸೃಷ್ಠಿ ಥಯಾಸ. ಜುನ್ನಿಯೊ ಸಂಗತಿಯೊ ಗೈಪಡಿಯೊ. ಕ್ಹಾರುಜ ನವು ಥಯು. 18ಎ ಕ್ಹಾರುಜ಼ ಕ್ಹುದಾಕ್ಹುಜ಼ ಥಯು. ಕ್ರಿಸ್ತನಾ ಮುಲಕ ಕ್ಹುದಾ ಅಪೊನೆ ತಿನಾಕ್ಹಾತೆ ಸಮಾಧಾನ ಕರ್ಯೊಸ. ವರಿ ಬಿಜಾ಼ವೊನೆಬಿ ಸಮಾಧಾನಮಾ ಬಲೈಲಾವಾನೆ ಕ್ಹುದಾ ತೆ ಕಾಮ ಅಪೊನೆ ದಿದ್ಯೊಸ. 19ಕದ್ಯಾಮ ಕ್ಹುದಾ ಕ್ರಿಸ್ತಮಾ ಕ್ಹಾರಿ ಜಗತ್ನೆ ತಿನಾ ಕ್ಹಾತೆ ಸಮಾಧಾನ ಕರಿಲೆತೊತೊ. ಕ್ಹುದಾ ಕ್ರಿಸ್ತಮಾ ಮನಕ್ಹೊನು ಅಪರಾಧ ದೆಕಾಡತೊ ನೈ. ಎ ಸಮಾಧಾನನು ಸುದ್ದಿ ಮನಕ್ಹೊನೆ ಕೆ ಕೈನ. ಕಾಮ ಕ್ಹುದಾ ಅಪೊನೆ ದಿದ್ಯೊಸ.
20ತಿನಾಹುತಿ ಕ್ರಿಸ್ತನಾ ಬಗಲ್ತಾ ಬೊಲಾನಾಹುತಿ ಮೊಕ್ಲಲ ಛೆ. ಎ ಕ್ಹುದಾ ಎ ಕ್ಹಾರು ಅಪ್ನಾ ಬಗಲ್ತೊ ಮನಕ್ಹೊನೆ ಬಲಾವಾನು ವ್ಹೈ. ಕ್ಹುದಾನಾ ಕ್ಹಾತೆ ತುಮೆ ಸಮಾಧಾನಮಾ ರ್ಹವೊ ಕೈನ ತೊಮೊಕನ ಮಾಂಗಿಲೆತಾಮಾ ಕ್ರಿಸ್ತನಾ ಬಗಲ್ತಾ ಬೊಲಾಲಾ ಥಯಾಸ. 21ಕ್ರಿಸ್ತಮಾ ಪಾಪ ನ್ಹೊತು. ವರಿ ಅಪೆ ಕ್ಹುದಾನೆ ಸಮರ್ಪಕ ಥೈನ ನಿತಿವಾಲಾನಿಂಗತ ಕ್ಹುದಾ ತಿನೆ ಪಾಪನೊ ಸ್ವರುಪ ಕರ್ಯೊ.
1ಹಮೆ ಕ್ಹುದಾನಾ ಕ್ಹಾತೆ ಕಾಮ ಕರಾಲಾ ವ್ಹೈ. ಇನಾಹುತಿ ಹಮೆ ತುಮೊಕನ ಸು ಮಾಂಗಿಲಿಯೆಸ ಕದ್ಯಾಮ, ತುಮೆ ಕ್ಹುದಾಕಂತು ಹೊಂದಿಲಿದಲ ಕೃಪಾ ಉಪಯೊಗ ಥಾವಾ ವರಕ್ಹು ದೆಕಿಲಿವೊ. 2ಪ್ರಸನ್ನತೆನಾ ಕಾಲಮಾ ತಾರಿ ಮರ್ಗಾ ಐಕ್ಯೊ, ರಕ್ಷಣೆನಾ ದಿನೊಮಾ ತುನೆ ಮದತ ಕರ್ಯೊಸ ಕೈನ ಕ್ಹುದಾ ಕವಾಡೊಸತೊ. ತೆ ಪ್ರಸನ್ನತೆನೊ ಕಾಲ; ಆಂಜ಼ ತೆ ರಕ್ಷಣೆನು ದಿನ ವ್ಹೈ.
3ಹಮಾರಿ ಸೆವೆ ಕಿನಾ ಕ್ಹಾಮಿಬಿ ಕೆಟ್ಟ ಥಾಯೆನೈಸೊ, ಹಮೆ ಕಿನೆಜ಼ ಅಡ್ಡಿ ಕರ್ಯಾ ನೈ. 4ತಿನಾಹುತಿ, ಕ್ಹಾರಾ ವಿಶಯೊಮಾ ಕ್ಹುದಾನಾ ಸೆವಕೊ ವ್ಹೈ ಕೈನ ಹಮಾರಾ ಸೆವೆನೆ ಸಮ್ಮತ ಕರಲಿನ, ಹಮೆ ತ್ರಾಸಮಾಬಿ, ಸಂಕಟಮಾಬಿ, ಇಕ್ಕಟಮಾಬಿ, ಮಾರೊಮಾಬಿ, 5ಜೆಲಮಾ, ತ್ರಾಸೊಮಾ ಅನುಭವಸ್ಯಾಶ. ಅಂಗಭಾಬಿನ ಕಾಮ ಕರ್ಯಾಸ. ನಿಂದರ ನೈಸೊ ಭುಕ್ಕ ಲಾಗಿನ ತಡಪ್ಯಾಸ; ಎ ಕ್ಹಾರಾ ವಿಶಯೊಮಾ ಘನು ಸಮಾದಾನ ದೆಕಾಡ್ಯಾಸ. 6ಚೊಕು ಮನಸ, ಗ್ಯಾನ, ಶಾಂತಿ, ದಯಾ ಪವಿತ್ರ ಆತ್ಮಾಮಾ ಕಪಟ ನೈಸೊ ಮಯಾ, 7ಕ್ಹರಿನಿ ವಾಕ್ಯಾ, ಕ್ಹುದಾನಿ ಮಹಿಮಾ ಇಮಾ ರ್ಹಯಲವಾಲಾ ಥೈನ, ಹತೊಮಾ ನಿತಿ ಕವಾನಾ ಆಯುದೊ ಧರಿಲಿದ್ಯಾಸ. 8ಅಪೆ ಮಾನ ವರಿ ಅವಮಾನ, ಕಿರ್ತಿ ವರಿ ಅಪಕಿರ್ತಿಮಾ ಸೆವಾ ಕರ್ಯಾಸ. ಕ್ಹರಿವಾಲಾ ರ್ಹಯತಬಿ ಮೊಸ ಕರಾಲಾ ವ್ಹೈ ಕೈನ ಐಕೈ ಲಿದ್ಯಾಸ. 9ಅಪೆ ಸಿದ್ದ ರ್ಹೈತಬಿ ವಳಕ ನೈಸೊವಾಲಾ ಥೈನ ಸೆವಾ ಕರ್ಯಾಸ. ಮರಾಲಾ ವ್ಹೈ ಕೈನ ದೆಕಾಡ್ಯಾ ತಬಿ ಜ್ಯುತಾ ಸೆ! ದೆಕಿ ಶಿಕ್ಷಾ ಗುರಿ ಥೈತಬಿ ಮರಾಲಾ ಥಯಾಸ, 10ದುಖಪಡ್ದಾಲಾ ರ್ಹೈತಬಿ ಸೆವಾಮಾ ಕೆಳಾಮಾಬಿ ಕ್ಹುಶ ರ್ಹಯೆಸ, ಗರಿಬ ರ್ಹೈತಬಿ ಘನಾಜನಾವೊನೆ ಸೌಕಾರವಾಲಾ ಕರ್ಯಾಸ; ಸುಬಿ ನೈಸೊವಾಲಾ ರ್ಹೈತಬಿ ಕ್ಹಾರುಜ಼ ವ್ಹಂದಲವಾಲಾ ಥಯಾಸ.
11ಕೊರಿಂಥಮಾ ರ್ಹಯಲವಾಲಾ ಕ್ಹುಲಾ ಮನಸಕ್ಹು ಖುಲ್ಲಾ ಮನಸಕ್ಹು ಹಮೆ ತುಮಾರಾ ಕ್ಹಾತೆ ಬೊಲ್ಯಾಸ. 12ಹಮಾರಾಮಾ ಕೆಟ್ಟ ಭಾವಾನಾ ನತ್ತಿ. ಎ ರ್ಹವಾನು ತುಮಾರಾಜ಼ ವ್ಹೈ. 13ತಿನಾಹುತಿ ಬಚ್ಚಾವೊನೆ ಕದಲ ತಿಮ್ಮ ಕದ್ಯಾಸ; ಹಮೆ ಪೂರಾಮನಸಕ್ಹು ಮಯಾ ಕರಲ ನಿಂಗತ, ತುಮೆಬಿ ಹಮೊನೆ ಪೂರಾ ಮನಕ್ಹು ಮಯಾ ಕರೊ.
