ಆಲೊಚನಾ ಕರಾನಿ ಸಭೆ
1ಪಾಚಾ಼ತಾ ದಕ್ಹಾ ಮನಕ್ಹೊ ಯುದೆಯತಾ ಅಂತಿಯೊಕ್ಯನೆ ಆಯಾ" ತುಮೆ ಸುನ್ನತಿ ನೈ ಕರಾಯಾಮ ತುಮೊನೆ ಬಿಡುಗಡೆ ಥಾತು ನೈ. ಸುನ್ನತಿ ಕರೈಲ್ಯು ಕೈನ ಮೊಶೆ ಕದ್ಯೊಸ "ಕೈನ ತ್ಯುನೆ ಯೆಹುದಿಯೊ ನೈ ರ್ಹಯಲ ವಿಸ್ವಾಸಿಯೊನೆ ಉಪದೆಶ ಕರಾನು ಶುರು ಕರ್ಯಾ. 2ಪೌಲಾ ಬಾರ್ನಬ ಎ ಉಪದೆಶನೆ ತ್ಯುನಾ ವಿರುದ್ದ ದೆಕಾಡಿನ ತ್ಯುನಾ ಕ್ಹಾತೆ ವಾದ ಕರ್ಯಾ. ಎ ಸಮಸ್ಯಾನಾ ಹುತಿ ಅಪೊಸ್ತಲೊನಾ ಕ್ಹಾತೆ ವರಿ ಬಿಜಾ಼ ಶಾನಾವೊನಾ ಕ್ಹಾತೆ ಚರ್ಚಾ ಕರಾನೆ ಪೌಲಾ ಬಾರ್ನಬನೆ ವರಿ ಬಿಜಾ಼ ದಕ್ಹಾ ಜ಼ನಾವೊನೆ ಯೆರುಸಲೆಮೆ ವಳಾವಾನೆ ಸಭೆ ಮಳಾನೆ ಫೈಸ್ಲೊ ಕರ್ಯಾ.
3ತಿನಾನಿಂಗತ ಸಭೆವಾಲಾ ಇವ್ನೊನೆ ಸಭೆ ವಳೈಯು. ಇವ್ನೆ ಫೆನಿಶ್ಯ ವರಿ ಸಮಾರ್ಯ ವಾಟತಾ ಗಯಾ. ಯೆಹುದಿ ನೈಸೊ ಮನಕ್ಹೊ ಕ್ಹರಿನೊ ಕ್ಹುದಾ ಕನ ಫರಲನಾ ಹುತಿ ಎ ಗಾಮೊಮಾ ಕದ್ಯಾ. ಎ ಐಕಿನ ಭಾಯೊನೆಬಿ ಘನ್ನಿ ಖುಶಿ ಥೈ. 4ಪೌಲಾ ಬಾರ್ನಬ ವರಿ ಬಿಜಾ಼ ಯೆರುಸಲೆಮ ಮುಟ್ಯಾ. ಅಪೊಸ್ತಲೊ, ಶಾನಾ ವರಿ ಸಭೆವಾಲಾ ಇವ್ನೊನೆ ಸ್ವಾಗತ ಕರ್ಯಾ. ಕ್ಹುದಾ ತ್ಯುನಾ ಕ್ಹಾತೆ ರ್ಹೈನ ಕರಲ ಕ್ಹಾರಾ ಕಾಮೊನಾ ಹುತಿ ಪೌಲಾ ಬಾರ್ನಬ ವರಿ ಬಿಜಾ಼ ಕದ್ಯಾ. 5ಯೆರುಸಲೆಮಮಾ ರ್ಹಯಲ ವಿಶ್ವಾಸಿಯೊಮಾ ದಕ್ಹಾ ಜ಼ನಾ ಫರಿಸಾಯರೊನಾ ಗುಂಪನೆ ಮಳಲವಾಲಾ ವ್ಹತ್ತಾ. ತ್ಯುನೆ ಉಟಿನ ಹುಬ್ರೈನ, ಯೆಹುದಿಯೊ ನೈ ರ್ಹಯಲವಾಲಾ ವಿಶ್ವಾಸಿಯೊ ಸುನ್ನತಿ ಕರೈಲಿವ ಮೊಶೆನಾ ಧರಮಶಾಸ್ತ್ರನೆ ವಿಧೆಯ ಥೌ ಕೈನ ಅಪೆ ತ್ಯುನೊನೆ ಕೌ "ಕೈನ
6ಪಾಚಾ಼ತಾ ಅಪೊಸ್ತಲೊ ವರಿ ಶಾನಾ ಎ ಸಮಸ್ಯಾನೆ ಪರಿಕ್ಷಾ ಕರಾನೆ ಮಳಿನ ಆಯಾ. 7ಘನ್ನಿ ಚರ್ಚಾ ಥೈ. ಪಾಚಾ಼ತಾ ಪೆತ್ರಾ ಉಟಿನ ಹುಬ್ರೈನ ತ್ಯುನೊನೆ"ಮಾರಾ ಭಾಯೊ, ತುಮೊನೆ ಗ್ವತ್ತ ರ್ಹಯಲ ತಿಮ್ಮ, ಯೆಹುದಿ ನೈಸೊ ಮನಕ್ಹೊನೆ ಸುವಾರ್ತೆ ಕವಾನಾ ಹುತಿ ತುಮಾರಾ ವಚ್ಮಾ಼ತೊ ಕ್ಹುದಾ ಮನೆ ಘನ್ನಾ ದಿನ್ನಾ ಪಾಚೊ಼ ಇನಿಲಿದ್ಯೊ. ತ್ಯುನೆ ಮಾರಾಕ್ಹು ಸುವಾರ್ತೆ ಐಕಿನ ಬರೊಕ್ಹೊ ಕರ್ಯಾ. 8ಕ್ಹಾರಾ ಮನಕ್ಹೊನಾ ವಿಚಾರೊ ಗ್ವತ್ತ ರ್ಹಯಲ ಕ್ಹುದಾ ಯೆಹುದಿ ನೈಸೊ ಮನಕ್ಹೊನೆ ಸ್ವಿಕಾರ ಕರಿಲಿದ್ಯೊ. ಕ್ಹುದಾ ಹಮೊನೆ ಪವಿತ್ರ ಆತ್ಮಾ ದಿದಲ ನಿಂಗತಜ಼ ತ್ಯುನೊನೆಬಿ ಪವಿತ್ರ ಆತ್ಮಾ ದಿನ್ನ ಎ ಕ್ಹರಿ ದೆಕಾಡ್ಯೊಸ. 9ಕ್ಹುದಾ ದೃಶ್ಟಿಮಾ ತ್ಯುನೊನೆಬಿ ಹಮೊನೆಬಿ ಕಯು ಫರಕ ನತ್ತಿ. ತ್ಯುನೆ ಬರೊಕ್ಹೊ ಕರಲ್ಪರ, ಕ್ಹುದಾ ತ್ಯುನಾ ಮನಸೊ ಶುದ್ಧ ಕರ್ಯೊ. 10ಇಮ್ಮ ರ್ಹತಾಮಾ, ಯೆಹುದಿಯೊ ನೈಸೊವಾಲಾ ಭಾಯೊನಾ ಖಾಂದಾನಾ ಉಪ್ಪರ ವಜ಼್ಜು ಕಾ ಘಾಲೊಶಿ? ತುಮೆ ಕ್ಹುದಾನೆ ಶಿಟ್ಟ ಕರು ಕೈನ ಕೊಶಿಶ ಕರಾಡಾಸು? ಹಮೊನೊ ರ್ಹಂದೆ ಹಮಾರಾ ಪಿತೃನೆ ರ್ಹಂದೆ ತೆ ವಜ್ಜು ಉಚಾವಾ ವರಕ್ಹು ತಾಕತ ನ್ಹೊತಿ! 11ತಿನಾಹುತಿ ಹಮೆ ರ್ಹಂದೆ ತ್ಯುನಾಹುತಿ ರಕ್ಷಣೆ ಹೊಂದಾನಾ ಹುತಿ ಪ್ರಭು ಥಯಲ ಯೆಸುನಾ ಮರಗಾಕ್ಹು ಕೈನ ಹಮೆ ನಂಬ್ಯೆಸ! ಕದ್ಯೊ.
12ತೆಳಾಮಾ ಕ್ಹಾರಿ ಸಭಾ ಗಪ ವ್ಹತ್ತಿ. ತ್ಯುನೆ ಪೌಲಾ ವರಿ ಬಾರ್ನಬನೆ ಕಾನ ದಿನ್ನ ಐಕ್ಯಾ. ಯೆಹುದಿ ನೈಸೊ ಮನಕ್ಹೊನಾ ವಚಾಮಾ ಕ್ಹುದಾ ತಿನಾ ಮುಕಾಂತರ ಕರಲ ಕ್ಹಾರಾ ಅದ್ಭುತ ಕಾಮೊ ವರಿ ಸುಚಕ ಕಾಮೊನಾ ಹುತಿ ಪೌಲಾ ಬಾರ್ನಬ ಕದ್ಯಾ. 13ತೆನೈಸೊ ಯಾಕೊಬ, ಮಾರಾ ಭಾಯೊ ಮನೆ ಕಾನ ದಿನ್ನ ಐಕೊ. 14ಯೆಹುದಿ ನೈಸೊ ಮನಕ್ಹೊ ಕ್ಹುದಾ ತಿನಿ ಮಯಾ ಕಿಮ್ಮ ದೆಕಲಾಡ್ಯೊ ಸಿಮೊನ ಹಮನೊನೆ ತಿಳಸಾಯೊ ಪೈಲಾಜ ಹಮನಾಜ, ಕ್ಹುದಾ ಯೆಹುದಿಯೊ ನೈಸೊ ಮನಕ್ಹೊನೆ ಮಳೆಲಿದ್ಯಾಸ. ತ್ಯುನೊನೆ ತ್ಯುನಾ ಮನಕ್ಹೊ ವ್ಹೈ ಕೈನ ಕರಲಿದ್ಯೊ. 15ಪ್ರವಾದಿಯೊನಾ ವಾತೊಬಿ ತಿನೆ ಸಾಮರಸ್ಯ ಥೈಯುಸ. 16ತೆ ಥಯಲಪರ ಅಪೆ ಪಾಚಾ಼ ಪ್ಹರ್ಯಾ.
ಮಿ ದಾವಿದನು ಘರ ವರಿ ಭಾಂದೆಯೆಸ ತೆ ಪಡಿ ಗಯುಸ.
ತಿನಾಹುತಿ ತುಟಿ ಗಯೆಲ ತಿನು ಘರನಾ ತುಕಡಾ ಮಿ ವರಿ ಯಕ್ಕ ಕರುಸ. ಮಿ ತಿನು ಘರ ನವು ಕರುಸ.
17ತೆನೈಸೊ ಬಿಜಾ಼ ಮನಕ್ಹೊ ಪ್ರಭುನಾ ಹುತಿ ಹುಡಕಸ. ಯೆಹುದಿಯೊ ನೈಸೊ ಮನಕ್ಹೊ ಕ್ಹಾರಾ ವರಿ ಮಾರಾ ಮನಕ್ಹೊ ಥೈಯಾಸ. ಪ್ರಭು ಯೆ ಕದ್ಯೊಸ. ತೆ ಕ್ಹಾರಾ ಕಾಮೊ ಕರಾಲೊ ತೆಜ಼ ವ್ಹೈ. 18ಪೈಲಾತೊಜ ಯೆ ಕ್ಹಾರಾ ಕಾಮೊ ತಿಳಸಾಡೊಸ.
19ತಿನಾಹುತಿ, ಕ್ಹುದಾ ಕನ ಫರಿನ ಯೆಹುದಿಯೊ ನೈಸೊ ಭಾಯೊನೆ ಅಪೆ ತರಾಸ ದ್ಯುನೈ. 20ತಿನಾಹುತಿ ಅಪೆ ತ್ಯುನೊನೆ ಯಕ್ಕ ಪತ್ರ ಲಿಕಿನ ತೆ ವಿಷಯೊ ಕ್ಹಾರಾ ತಿಳಸಯೆ ಮುರ್ತಿನೆ ಚಡಾಯೆಲ ಅನ್ನ ಖಾವೊ ನಕೊ. ತೆ ಅನ್ನ ಅಶುದ್ಧ ವ್ಹೈ. ಕೈಯುಜ ಲೈಂಗಿಕ ಪಾಪ ಕರೊ ನಕೊ. ರಗತ ಖಾವೊ ನೈಕೊ. ನಡ್ಡಿ ಚಿಕಲಿನ ಜಾನವರೊನು ಮಾಕ್ಹ ಕ್ಹಾವೊ ನೈಕೊ. 21ತ್ಯುನೆ ತೆ ಕ್ಹಾರು ಕರು ನೈ. ಕಾಕದ್ಯಾಮ ಮೊಶೆನಾ ಧರಮಶಾಸ್ತ್ರನೆ ಬೊಧಿಸ ಕರಲ ಮನಕ್ಹೊ ಹರಯಕ್ಕ ಗಾಮ್ಮಾ ಹಜುಬಿ ಛೆ. ಘನ್ನಾ ವರಕ್ಹತ್ತಾ ಹರಯಕ್ಕ ಸಬ್ಬತ ದಿನಮಾ ಮೊಶೆನಾ ವಾತೊ ಒದತ್ತಾ ಕೈನ ಕದ್ಯೊ.
