ಗ್ಯಾನನಾಹುತಿ ವರಿ ಪಿಸಾಳಾವೊನಿಯೊ ವಿಚಾರೊ

13ಮಿ ಲೊಕಮಾ ಗ್ಯಾನನೆ ಆಂ ತರಾ ದೆಕ್ಯೊ. ತೆ ಮ್ಹೊಟು ವ್ಹೈ ಕೈನ ಮನೆ ಗೊತ್ತ ಥಯು. 14ಹಮ್ನಾ, ಯಕ್ಕ ನ್ಹಾನು ಗಾಮ ತಿಮಾ ದಕ್ಹಾ ಮನಕ್ಹೊ ವ್ಹತ್ತಾ. ಯಕ್ಲೊ ಮ್ಹೊಟೊ ರಾಜ಼ೊ ತಿನೆ ವಿರುದ್ದ ಥೈನ ಘೆರೊ ಘಾಲಿನ ತ್ಯಾ ಮ್ಹೊಟಾ ಕ್ಹಂಬಾವೊನೆ ಘಾಲ್ಯೊ 15ತೆಳಾಮಾ ತ್ಯಾ ರ‍್ಹಯಲವಾಲಾ ತ್ಯುನಾಮಾ ಯಕ್ಕ ಗರಿಬ ಗ್ಯಾನಿನೆ ದೆಕ್ಯಾ. ತೆ ತಿನಾ ಗ್ಯಾನಕ್ಹು ತೆ ಗಾಮನೆ ವಚಾ಼ಡ್ಯೊ. ತನೈಸೊ ತೆ ಗರಿಬ ಗ್ಯಾನಿನೆ ಕುನ್ನಜ಼ ಸೆಂ ಕರ‍್ಯು ನೈ. 16ಮಿ ಆಂ ದೆಕಿನ ತಾಕತಿಬಿ ಗ್ಯಾನಜ಼ ಕ್ಹಾಸ ವ್ಹೈ, ತೆನೈಸೊ ಮನಕ್ಹೊ ಗರಿನಾ ಗ್ಯಾನನೆ ತಾತ್ಸಾರ ಕರಿನ ತಿನಾ ವಾತೊನೆ ಧ್ಯಾನ ದೆತಾ ನೈ ಕೈನ ಕೈಲಿದ್ಯೊ. 17ಪಿಸಾಲಾವೊನೆ ಆಳಾಲಾನಾ ಆವಾಜ಼ತಿಬಿ ಗ್ಯಾನಿನಾ ಹಲ್ಲು ಬೊಲಾನಾ ವಾತೊ ಕಾನೆ ಐಕಾವಸ. 18ಯುದ್ದನಾ ಆಯುಧೊತಿಬಿ ಗ್ಯಾನಜ಼ ಚೊ಼ಕು ವ್ಹೈ. ತೆನೈಸೊ ಯಕ್ಕ ಪಾಪಿ ಘನ್ನು ಚೊ಼ಕು ಹಾಳಕರಸ.

1ಮರಲ ಮಾಕ್ಹಿಯೊಕ್ಹು ಗಂದಾನು ತೆಲ ಕ್ಹಡಿನ ಬಾಸ ಆವಸ. ತಿಮ್ಮಜ಼ ದಕ್ಹು ಪಿಸಾಳುಪನ ಗ್ಯಾನನೆ ವರಿ ಘನತೆನೆ ಕೆಡಸಸ. 2ಗ್ಯಾನಿನೆ ಬುದ್ದಿ ತಿನಾ ಸಿದಾ ಬಗಲ ರ‍್ಹವಸ. ಅ ಗ್ಯಾನಿನಿ ಬುದ್ದಿ ತಿನಾ ರೊಡ್ಡಾ ಬಗಲ ರ‍್ಹವಸ. 3ತೆ ನೈಸೊ ಪಿಸಾಳೊ ಬುದ್ದಿ ತಪ್ಪಿನ ಫರಾನಾ ವಾಟಮಾ ತಿನು ಪಿಸಾಳುಪನ ಕ್ಹಾರಾವೊನೆ ದೆಕಾಡಸ. 4ಸೌಕಾರ ತಾರಾ ಉಪ್ಪರ ಸಿಟ್ಟ ಥಯಾರೆ ಕಾಮನೆ ಛೊಡು ನಕೊ. ತಾಳ್ಮೆ ಮ್ಹೊಟಿ ಸಿಟ್ಟನೆ ಝಕಾಡಸ. 5ಲೊಕಮಾ ಯಕ್ಕ ಸಂಕಟ ದೆಕ್ಯೊಸ. ತೆ ಆಳಾವಾಲಾನಾ ಮ್ಹೊಡಾತು ಆವಾನು ನಿಂಗತ ದಿಕ್ಹಸ. 6ಪಿಸಾಳಾವೊನೆ ಮ್ಹೊಟಿ ಪದವಿ ಮಳಸ. ಪದವಿ ರ‍್ಹಯಲವಾಲೊ ಕೆಟ್ಟ ಸ್ಥಿತಿಮಾ ರ‍್ಹವಸ. 7ಆಳೊ ಘೊಡಾನಿ ಸವಾರಿ ಕರಾನು ಪ್ರಬು ಜಿಮಿನ್ಪರ ಚಾ಼ಲಾನು ದೆಕ್ಯೊಸ. 8ಖಾಡಿ ಕ್ಹಂದಾಲೊ ತೆಜ಼ ತಿಮಾ ಪಡಸ, ಗೊಡಿ ಫೊಡಾಲಾನೆ, ಕ್ಹಾಪ ಕಡ್ಡಸ. 9ದಗ್ಡಾಕ್ಹು ಕಾಮ ಕರಾಲಾನೆ ದಗ್ಡಾಕ್ಹು ಮಾರ ಬೆಟಸ. ಯಕ್ಕೆಳೆ ಲಾಕ್ಡಾ ಕತ್ರಾಲಾನೆ ಲಾಕ್ಡಾಕ್ಹುಜ಼ ಮಾರ ಬೈಟಸ. 10ಮಂಡ ಕೊಡ್ಲಿನು ಮ್ಹೊಡು ಚ಼ುಪ ನೈ ಕರ‍್ಯಾರೆ ತೆ ಹೆಚ್ಚ ತಾಕತನೆ ಉಪಯೊಗ ಕರು. ಕಾಮಪುರಾ ಥಾವಾನೆ ಗ್ಯಾನಜ಼ ಮದತ ವ್ಹೈ. 11ಕ್ಹಾಪನೆ ಮಳ್ಳಕರಾಲಾನೆ ಕ್ಹಾಪ ಕಡ್ಯಾರೆ, ಕ್ಹಾಪ ಮಳ್ಳಕರಾಲಾನೆ ಸುಜ಼ ಫೈದೊ ನತ್ತಿ. 12ಗ್ಯಾನಿನಿ ವಾತ ಚೊ಼ಕು ವ್ಹೈ ಅ ಗ್ಯಾನಿನು ಮ್ಹೊಡು ತಿನೆಜ಼ ಗಳಿಜಾ಼ವಸ. 13ಅ ಗ್ಯಾನಿನಾ ವಾತೊ ಶುರವಾತಮಾ ಚೊಕಾವ್ಹೈ, ಲಾಸ್ಟಮಾ ತ್ರಾಸನಾ ಉಸುಕ ವ್ಹೈ. 14ಮನಕ್ಹನಾ ಕ್ಹಾಮು ಥಾವಾನು ತಿಳದ್ಯೊಸ. ತೆ ಟೈಮ ಥಯಲ್ಪರ ಅಮ್ಮಜ಼ ಥಾವಸ ಕೈನ ಕಿನಾಕ್ಹು ತಿಳ್ದಿಲಿವಸ? ಅ ಗ್ಯಾನಿನಾ ವಾತೊ ಘನ್ನಾ.

15ಗಾಮನಿ ವಾಟ ನೈ ಗೊತ್ತ ರ‍್ಹಯಲವಾಲಾನೆ ಪಿಸಾಳಾ ತಿಳ್ಸಾಯಲ್ಪರ, ಕರಾನಿ ಕೊಶಿಸಕ್ಹು ವ್ಯರ್ಥಜ಼ ವ್ಹೈ. 16ದೆಶನೊ ರಾಜ಼ೊ ಜಾಂನಜಿಮಾನ ಥಯಾರೆ ಪ್ರಬುವೊ ಕ್ಹಾರಾ ಕ್ಹಾವಾನೆ ಬೈಟ್ಯಾರೆ ತುನೆ ಕೆಟ್ಟ ನಶಿಬ ವ್ಹೈ! 17ರಾಜೊ಼ ಅಂಗ ರಾಕು ನೈ ರ‍್ಹೈನ ತಿನಾ ಸ್ವಂತ ಫೈಸಲಾ ಲಿವಾಲೊ ಥೈನ ತಿನು ಅದಿಕಾರಿಯೊ ಕರೆಟ್ಟ ಟೈಮಮಾ ಕ್ಹಾವಾನೆ ಬೆಟಾಲಾ ರ‍್ಹಯಾಮ ತುನೆ ಕಕ್ಲುಕಿ ಚೊ಼ಕು ವ್ಹೈ 18ಕುನ್ನತಬಿ ತಿನಾ ಘರನಿ ಛತ್ತ ಸಿದಾ ಕರಾನೆ ಘನ್ನೊ ಅಂಗರಾಕು ಥಯಾರೆ. ತಿನಾಹುತಿ ಘರ ಚ಼ುವಸ. 19ಅಕ್ಹಾನಾಹುತಿ ಕ್ಹೌ, ದ್ರಾಕ್ಷಿನಾ ರಕ್ಹಕ್ಹು ಜಿವನನೆ ಕ್ಹುಸಿ ವ್ಹೈ, ದೊಕ್ಡಾ ಕ್ಹಾರುಜ಼ ದಿವಸ 20ಮನಸಮಾಜ಼ಬಿ ರಾಜ಼ಾನೆ ದೊಷ ದ್ಯು ನಕೊ.ಕ್ಹುರವಾನಿ ಕ್ಹೊಲಿಮಾಬಿ ಸೌಕಾರನೆ ಗಾಳೊ ದ್ಯು ನಕೊ. ಹಬಾಳನಾ ಪಕ್ಷಿಯೊ ತೆ ಅವಾಜ಼ನೆ ಮುಟ್ಟಸಾವಸ; ಪಕ್ಷಿಬಿ ತೆ ವಿಷಯನೆ ತಿಳಸಾವಸ