ಹರಯಕ್ಕನೆ ಟೈಮ

1ಹರಿಯಕ್ಕ ಕಾಮನೆ ಯಕ್ಕ ಟೈಮ ಛೆ, ಜಿಮಿನಪರ ಚಾ಼ಲಾನಾ ಹರಿಯಕ್ಕ ಕಾಮನೆ ಯಕ್ಕ ಟೈಮ ಛೆ. 2ಹುಟ್ಟಾನು ಟೈಮ, ಮರಾನೊ ಟೈಮ, ಝಾಡೊ ಘಾಲಾನೊ ಟೈಮ, ಘಾಲಲ ಕ್ಹಾರು ಕಿತ್ತಾನೊ ಟೈಮ, 3ಖಲಾಸ ಕರಾನೊ ಟೈಮ, ಸ್ವಸ್ತ ಕರಾನೊ ಟೈಮ, ಪಾಡಾನೊ ಟೈಮ, ಭಾಂದಿನ ಉಟಾಡಾನೊ ಟೈಮ, 4ರವಾನೊ ಟೈಮ, ಅಕ್ಹಾನೊ ಟೈಮ, ಅಟಾವಾನೊ ಟೈಮ, ನ್ಹಾಚಾ಼ನೊ ಟೈಮ, 5ದಗ್ಡಾ ಭಿರ್ಕಾವಾನೊ ಟೈಮ, ದಗ್ಡಾ ಜ಼ಮಾಕರಾನೊ ಟೈಮ, ಔಳಿಲಿವಾನೊ ಟೈಮ, ಔಳಿ ನೈ ಲಿವಾನೊ ಟೈಮ, 6ಕಮಾವಾನೊ ಟೈಮ, ಜ಼ವೈಲಿವಾನೊ ಟೈಮ, ವಚಾ಼ಡಾನೊ ಟೈಮ, ನಾಕಾನೊ ಟೈಮ, 7ಫಾಟಾನೊ ಟೈಮ, ಶಿವಾನೊ ಟೈಮ, ಗಪ್ಪ ರ‍್ಹವಾನೊ ಟೈಮ, ಬೊಲಾನೊ ಟೈಮ, 8ಮಯಾ ಕರಾನೊ ಟೈಮ, ದ್ವೆಶ ಕರಾನೊ ಟೈಮ, ಯುದ್ದನೊ ಟೈಮ, ಸಮಾಧಾನನೊ ಟೈಮ, 9ರಾಬಾಲಾನೆ ತಿನಾ ಮ್ಹೈನತಕ್ಹು ಸು ಫೈದೊ ವ್ಹೈ? 10ಮನಕ್ಹನೆ ಫರಜ಼ ವ್ಹೈ ಕೈನ ಕ್ಹುದಾ ನೆಮ್ಸಲ ಮ್ಹೈನತ ದೆಕ್ಯೊಸ. 11ಯಕ್ಕೆಕ ಸಾಮನನೆ ಟೈಮನಾ ತಕ್ಕ ಚೊ಼ಕೊ ಕರ‍್ಯೊಸ. ತೆನೈಸೊ ಮನಕ್ಹೊನಾ ಮನಸಮಾ ಹಮೆಶಾನು ವಿಚಾರ ಮ್ಹೆಲ್ಯೊಸ. ತೆನೈಸೊ ಕ್ಹುದಾ ಚ಼ಲಾವಾನು ಕಾಮನೆ ತ್ಯುನೆ ವಿಚಾರ ಕರೆವಾಚಿ ಕರ‍್ಯೊಸ. 12ಮನಕ್ಹೊ ತಿನಾ ಜಿವಮಾನಮಾ ಕ್ಹುಸಿಕ್ಹು ಸುಖಾನೆ ಅನುಬವಿಸಾತಿ ಹಜಿ ತ್ಯುನೊನೆ ತಿತ್ತಿ ಉಪ್ಪರ ನತ್ತಿ ಕೈನ ಮಿ ವಿಚಾರ ಕರ‍್ಯೊಸ. 13ತೆನೈಸೊ ಹರಯಕ್ಲೊ ಕ್ಹಾವಾ ಪಿವಾನು ಲಿನ ತಿನಾ ಹರಯಕ್ಕ ಪ್ರಯಾಸಮಾ ಸುಖಾ ಅನುಭವ ಕರಾನೆ ಕ್ಹುದಾನಿ ಮರ್ಗಾ ವ್ಹೈ ಕವಾನು ಮನೆ ಗ್ವತ್ತ ಛೆ. 14ಕ್ಹುದಾನು ಕಾಮ ಹಮೆಶ್ಯಾನು ವ್ಹೈ ಕೈನ ಮನೆ ಗ್ವತ್ತ ಛೆ. ತಿನೆ ಸುಬಿ ಸೆರಸತ್ತಾ ನೈ. ತಿನಾಕ್ಹು ಸುಬಿ ಕಾಡ ಸಕ್ತಾ ನೈ. ಕ್ಹುದಾನಾ ಎ ನಿಯಮನೆ ಮನಕ್ಹೊ ತ್ಯುನಾ ಕ್ಹಾಮಾ ಭೆಂ ವರಿ ಭಕ್ತಿಮಾ ರ‍್ಹೌ ಕವಾನು ಕಾರಣ ವ್ಹೈ. 15ಹಮ್ನಾ ರ‍್ಹಯಲ ಪಾಚು಼ ವ್ಹತ್ತು; ಅಗಲ್ಯು ಹಮ್ನಾಬಿ ಛೆ. ಹಾಳ ಥಯಲ ಕ್ಹುದಾ ಫರಿನ ಲಾವಸ.