ದುನಿಯಾಮಾ ಅನ್ಯಾಯ

16ತೆನೈಸೊ ಮಿ ಲೊಕಮಾ ದೆಕಿನ ಫೈಸಲಾನಾ ಜ಼ಗಾಮಾ ಧರಮನಾ ಜ಼ಗಾಮಾ ಅಧರಮ ರ‍್ಹವಾನು ದೆಕ್ಯೊ. 17ತೆಳಾಮಾ ಮಿ ಮನಸಮಾ, "ಕ್ಹುದಾ ನಿತಿವಂತವಾಲಾನೆ, ಅನಿತಿವಂತವಾಲಾನೆ ಫೈಸಲೊ ಕರಸ. ತೆ ಫೈಸಲಾನಾ ತರಿಕಾವೊನೆ, ಕ್ಹಾರಾ ಕಾಮೊನೆ ಯಕ್ಕ ಟೈಮ ಛೆ” ಕೈನ ಕೈಲಿದ್ಯೊ. 18ಮಿ ಮಾರಾ ಮನಸಮಾ ಅಮ್ಮ ವಿಚಾರ ಕರ‍್ಯೊ, "ಕ್ಹುದಾ ಮನಕ್ಹೊನೆ ಪರಿಕ್ಷಾ ಕರಿನ, ತ್ಯುನೆ ಜಾನವರೊನಾ ಸಮಾನ ವ್ಹೈಕೈನ ಕವಾನು ದೆಕ್ಲಾಡಸ.” 19ಮನಕ್ಹನಿ ಪರಸ್ಥಿತಿ ಪಶುನಿ ಗತಿ ಯಕ್ಕಜ಼ ವ್ಹೈ. ಪಶುನೆ ಮೌತ ಅವಾನಾ ತಿಮ್ಮ ಮನಕ್ಹನೆಬಿ ಆವಸ, ಕ್ಹಾರಾವೊನೆ ಜ಼ಲಮ ಯಕ್ಕಜ಼ ವ್ಹೈ. ಮನಕ್ಹ ಪಶುತಿಬಿ ಶ್ರೆಷ್ಟ ನವೈ. ಕ್ಹಾರುಜ಼ ವ್ಯರ್ಥ ವ್ಹೈ. 20ಕ್ಹಾರಾ ಪ್ರಾಣಿಯೊ ಯಕ್ಕ ಜ಼ಗಾಕನ ಜಾ಼ವಸ. ಕ್ಹಾರುಜ಼ ಮಾತಿಕ್ಹು ಥಯಲ ವ್ಹೈ. ಕ್ಹಾರುಜ಼ ಮಾತಿಮಾ ವರಿ ಜಾ಼ವಸ. 21ಮನಕ್ಹನಿ ಆತ್ಮಾ ಉಪ್ಪರ ಜಾ಼ವಸ, ಪಶುನಿ ಆತ್ಮಾ ಹೆಟಿ ಉತ್ರಿನ ಜಿಮಿನನಾ ಹೆಟಿ ಜಾ಼ವಸ ಕೈನ ಕಿನೆ ಗ್ವತ್ತ ಛೆ? 22ಅಮ್ಮ ಮಿ ವಿಚಾರ ಕರಿನ ಮನಕ್ಹ ತಿನಾ ಕಾಮೊಮಾ ಕ್ಹುಸಿ ಥಾವಾತಿ ತಿನೆ ಸುಜ ಉಪ್ಪರ ನತ್ತಿ. ಎಜ಼ ತಿನು ಪಾಲ ವ್ಹೈ ಕೈನ ವಿಚಾರ ಕರ‍್ಯೊ. ಜಿವಮಾನನಾ ಥಯಲ್ಪರ ಸಂಬವಿಸಾನು ದೆಕಾನಾಹುತಿ ಮನಕ್ಹನೆ ವರಿ ಕುನ್ನ ಆವಾ ಲಗಾಡಸ?

1ತೆ ಥಯಲ್ಪರ ವರಿ ದೆಕಿನ ದುನಿಯಾಮಾ ತ್ರಾಸ ಥಾವಾನು ದೆಕ್ಯೊ. ಆಹಾ! ತ್ರಾಸ ಖಾವಾಲಾನು ಡೊಳಾಮಾನು ಪಾನಿ ದೆಕೊ. ತ್ಯುನೊನೆ ಸಮಾಧಾನ ಕರಾಲು ಕುನ್ನಜ಼ ನತ್ತಿ. ತ್ಯುನೊನೆ ತ್ರಾಸ ಕರಾಲಾವೊನಿ ಘನ್ನಿ ತಾಕತ ಛೆ. ತ್ರಾಸ ಖಾವಾಲಾವೊನೆ ಸಮಾಧಾನ ಕರಾಲು ಕುನ್ನಜ಼ ನತ್ತಿ. 2ಎ ಕ್ಹಾರು ದೆಕಿನ ಹಜು಼ನ ಜಿವ್ತಾ ಥೈನ ಜಿವ್ತಾ ರ‍್ಹವಾಲಾವೊತಿಬಿ ಮರಲವಾಲಾಜ಼ ಚೊ಼ಕಾ ವ್ಹೈ ಕೈನ ಹೊಗಳ್ಯೊ. 3ಹೊ, ಎ ಭಂಬಿ ಜ಼ನಾವೊತಿ ಹಜ಼ುನ ಹುಟ್ತು ನೈ, ಲೊಕಮಾ ಥಾವಾನಾ ಅಧರ್ಮನೆ ದೆಕ್ಯಾ ಬಗರ ರ‍್ಹವಾನು ಚೊ಼ಕು ವ್ಹೈ ಕೈನ ತಿಳ್ದಿಲಿದ್ಯೊ. 4ತೆಳಾಮಾ ಕ್ಹಾರಿ ಪ್ರಯಾಸನೆ, ಕರಾನಾ ಕ್ಹಾರಾ ಕಾಮೊನೆ ದೆಕಿನ ಎ ಯಕ್ಕನೆ ಯಕ್ಕ ಶಿಟ್ಟನೆ ಮೌಕೊ ವ್ಹೈ ಕೈನ ತಿಳ್ದಿಲಿದ್ಯೊ. ಎ ವಾರಾನೆ ಪಾಚಾ಼ ಲಾಗೆ ಲಿಂಗತ ವ್ಯರ್ಥಜ಼ ವ್ಹೈ. 5ಪಿಸಾಳೊ ತಿನಾ ಹತೊ ಝಾಕಿಲಿನ ಕಯುಜ಼ ಕಾಮ ಕರ‍್ಯಾವಾಚಿ, ತಿನೆ ತೆಜ ನಾಶ ಕರಿಲಿವಸ. 6ವಾರಾನೆ ಪಾಚಾ಼ ಲಾಗೆ ಲಿಂಗತ ಮ್ಹೈನತಕ್ಹು ಭರ‍್ಯಲ ಭಂಬಿ ಹತೊಕ್ಹು ಕರಲ ಕಾಮತಿಬಿ ಸಮಾದಾನ ಥೈನ ಯಕ್ಕಜ಼ ಹತ್ತಕ್ಹು ಕರಲ ಕಾಮಜ಼ ಚೊ಼ಕು ವ್ಹೈ. 7ತೆಳಾಮಾ ಮಿ ಲೊಕಮಾ ವರಿಯಕ್ಕ ವ್ಯರ್ಥ ವಿಶಯನೆ ದೆಕ್ಯೊ. 8ವಂಟಕ್ಯೊ ರ‍್ಹಯಲ ಯಕ್ಕ ಮನಕ್ಹ ಛೆ. ತಿನೆ ಭಾಯೊ ನತ್ತಿ, ಬಚ್ಚಾ ನತ್ತಿ. ತೆನೈಸೊ ತಿನಾ ಮ್ಹೈನತನೆ ಅಂತ್ಯ ನತ್ತಿ, ಆಸ್ತಿಕ್ಹು ತಿನಾ ಡೊಳಾನೆ ತೃಪ್ತಿ ನತ್ತಿ. ತೆ, "ಮಿ ಸುಖಾ ಛೊಡಿನ ಕಿನಾಹುತಿ ಮ್ಹೈನತ ಕರಾಡೊಸ ಮಿ ಕಾ ಕ್ಹುಶಿನೆ ಜವೈ ಲಿವಾಡೊಸ?” ಕೈಲಿವಸ. ಎಬಿ ವ್ಯರ್ಥಜ಼ ವ್ಹೈ. ಕ್ಹಾಲಿ ಮ್ಹೈನತನು ಕಾಮ ವ್ಹೈ. 9ಯಕ್ಲಾತಿ ಬೆ ಜ಼ನಾ ಕಾಮ ಕರಾನು ಚೊ಼ಕು ವ್ಹೈ. ತ್ಯುನಿ ಮ್ಹೈನತನೆ ಚೊ಼ಕೊ ಫೈದೊ ಗಳಶಿಲೆ ಸಕಸ. 10ಯಕ್ಲೊ ಪಡ್ಯಾಮ, ಬಿಜೆಕ್ಲೊ ತಿನಾ ದೊಸ್ತನೆ ಉಪ್ಪರ ಉಟಾಡಸ. ವಂಟಕ್ಯೊ ರ‍್ಹಯಲವಾಲೊ ಯಕ್ಲೊ ಪಡ್ಯಾಮ, ತಿನೆ ಉಪ್ಪರ ಉಟಾಡಾನೆ ಕುನ್ನಜ಼ ನತ್ತಿ, ತಿನಿ ಗತಿ ಘನ್ನಿ ಕೆಟ್ಟ ವ್ಹೈ. 11ವರಿ ಬೆ ಜ಼ನಾ ಕ್ಹಾತೆ ಕ್ಹುರಯಮ ತ್ಯುನೊನೆ ಕೌ ಲಾಗಸ, ತೆನೈಸೊ ಯಕ್ಲೊ ಕಿಮ್ಮ ಕೌಮಾ ರ‍್ಹವಾನೆ ಥಾವಸ? 12ಯಕ್ಲಾನೆ ಬಿಜೆಕ್ಲೊ ಝಿತ್ತ ಸಕಸ, ತೆನೈಸೊ ಝಿತ್ತಲವಾಲಾನೆ ಬೆ ಜ಼ನಾ ತಿನೆ ವಿರುದ್ದ ಥೈನ ಹುಬ್ರೆ ಸಕಸ. ತನ್ನ ಹುರಿನಾ ರಾಕ್ಹೊ ಭೆಗಿನ ತುಟತಾ ನೈ. 13ಹುಶಾರ್ಕಿನಾ ವಾತನೆ ಕಾನ ದಿನ ನೈ ಐಕಾಲೊ ಗಡಿಯೊ, ಪಿಸಾಳೊಥಯಲ ರಾಜಾ಼ತಿ ಗ್ಯಾನ ರ‍್ಹಯಲ ಗರಿಬ ಜಾಂಜಿಮಾನ ಚೊ಼ಕೊ ವ್ಹೈ. 14ಹೆವೊ ಯಕ್ಕ ಜಾಂಜಿಮಾನ ರಾಜೊ಼ ಥಾವಾನೆ ಜೈಲತೊ ಆಯಲ ರ‍್ಹೌ ನೈತೊ ತಿನಾ ರಾಜ್ಯಮಾ ಗರಿಬ ಪ್ರಜೆ ಥೈನ ಹುಟ್ಟಲ ರ‍್ಹವಸ. 15ಸುರ್ಯಾನಾ ಹೆಟಾ ಜಿವ್ತಾ ರ‍್ಹೈನ ವರಿ ಚಾ಼ಲ್ಯಲವಾಲಾ ಕ್ಹಾರಾ ರಾಜಾ಼ನಾ ಉತ್ತರಾದಿಕಾರಿ ಥಯಲ ಜಾಂಜಿಮಾನನಾ ತರಫ ಥಾವಾನು ಮಿ ದೆಕ್ಯೊಸ. 16ಇನಾ ಅದಿಕಾರಮಾ ರ‍್ಹಯಲ ಮನಕ್ಹೊ ಘನ್ನಾ ಛೆ. ತಿನು ಅದಿಕಾರ ಥಯಲ್ಪರ ಇನಾಮಾ ಕ್ಹುಶಿ ರ‍್ಹತಾ ನೈ. ಎಬಿ ವಾರಾನೆ ಪಾಚಾ಼ ಲಾಗೆ ಲಿಂಗತ ವ್ಯರ್ಥ ವ್ಹೈ.