ಯೆಸು ತಿನಾ ಶಿಷ್ಯಾವೊನೆ ದಿಕ್ಹಲ
(ಮತ್ತಾಯ 28:16-20; ಮಾರ್ಕ 16:14-18; ಯೊಹಾನ 20:19-23)
36ತ್ಯುನೆ ಭಂಬಿಜ಼಼ನಾ ತೆ ಕ್ಹಾರು ಕತಾಮಾ, ತ್ಯುನಾ ವಚ಼ಮಾ ಯೆಸು ಐನ ತುಮೊನೆ ಚೊ಼ಕು ಥಾವಾದೆ ಕದ್ಯೊ. 37ತೆಳಾಮಾ ಶಿಷ್ಯಾ. ತ್ಯುನೊನೆ ಭೆ ವಾಟ್ಯೊ. ಎ ಕೆಟ್ಟ ಆತ್ಮಾ ವಸೆ ಕೈನ ತಿಳದಿಲಿದ್ಯಾ. 38ವರಿ ಯೆಸು, ತ್ಯುನೊನೆ ತುಮೆ ಗಲಿ ಬಿಲಿ ಥಯಾಸ? ತುಮೆ ಡೊಳೆ ದೆಕಿನಬಿ ಕಾ ಸಂಶ್ಯೊಕರೊಶಿ? 39ಮಾರಾ ಹತೊ ವರಿ ಮಾರಾ ಪಗೊ ದೆಕೊ. ಮಿಜ಼ ವ್ಹೈ! ಮನೆ ಮುಟ್ಟೊ. ಮಾರು ಜಿವ್ತು ಅಂಗ ದೆಕೊ. ಕೆಟ್ಟ ಆತ್ಮಾನೆ ಇಮ್ಮ ಅಂಗ ರ್ಹತು ನೈ "ಕದ್ಯೊ.
40ಯೆಸು ಎ ಕದಲ್ಪರ, ಹತೊಮಾ ಪಗೊಮಾ ರ್ಹಯಲ ದುಕ್ಕಕೊ ದೆಕಾಡ್ಯೊ. 41ತೆಳಾಮಾ ತಿನಾ ಶಿಷ್ಯಾ ಘಾಬ್ರಾಥಯಾ ವರಿ ತ್ಯುನೆ ಜಿವ್ತೊ ಥಯಲ ದೆಕಿನ ಘನ್ನಾ ಖುಶಿ ಥಯಾ. ವರಿಬಿ ತ್ಯುನೆ ಬರೊಕ್ಹೊ ಕರಾನೆ ಥಯು ನೈ. ಯೆಸು ತ್ಯುನೊನೆ ತುಮೊಕನ ಖಾವಾನೆ ಸುಬಿ ಅನ್ನ ಛೆಸು? ರ್ಹಯುಮ ಮನೆ ದಿವೊ ಕೈನ ಕದ್ಯೊ. 42ತ್ಯುನೆ ಬಳಲ ಮಚ್ಲಿ಼ ತಿನೆ ದಿದ್ಯಾ. 43ಶಿಷ್ಯಾವೊನಾ ಡೊಳಾ ಕ್ಹಾಮೊ ಯೆಸು ತೆ ಮಚ಼ಲಿ ಲಿನ ಖಾದ್ಯೊ.
44ಯೆಸು ತ್ಯುನೊನೆ ಮಿ ತುಮಾರಾ ಕ್ಹಾತೆ ರ್ಹಯಲ ಶೆಕರಿಲಿವೊ. ಮಾರಿ ವಿಷಯಮಾ ಮೊಶೆನು ಧರಮಶಾಸ್ತ್ರಮಾ ಪ್ರವಾದಿಯೊನಾ ಗ್ರಂಥಮಾ, ಕಿರತನೆಮಾ ಬರ್ದಲ ಹರಿ ಯಕ್ಕ ಸಂಗತಿಯೊ ಪುರಾ ಥೌ ಕೈನ ಮಿ "ಕದ್ಯೊ. 45ಪಾಚ಼ಲ್ತೊ ಯೆಸು ಪವಿತ್ರ ಗ್ರಂಥಮಾ ರ್ಹಯಲ ತಿನಾ ಹುತಿ ಬರ್ದಲ ಶಿಷ್ಯಾವೊನೆ ತಿಳಶ್ಯೊ. 46ಪಾಚ಼ಲ್ತೊ, ಯೆಸು ತ್ಯುನೊನೆ "ಕ್ರಿಸ್ತ ಮರಿನ ತನ ದಿನ್ಪರ ತೆ ಮರಲವಾಲಾವೊಮಾತೊ ಜಿವ್ತೊ ಥೈನ ಉಟಿನ ಆವಸ ಕೈನ ಬರ್ದಲ ಛೆ. 47ಎಕ್ಹಾರು ಪುರಾ ಥಾವಾನು ತುಮೆ ದೆಕ್ಯಾಸ. ತುಮೆಜ಼ ಇನೆ ಸಾಕ್ಷಿ ವ್ಹೈ. 48ತುಮೆ ಮನಕ್ಹೊಕನ ಜಾ಼ವೊ, ತ್ಯುನಾ ಪಾಪೊನೆ ಪಶ್ಚಾತಾಪ ಪಡಿನ ಕ್ಹುದಾಬಗಲ ಫರಾಲಾವೊನೆ ಪಾಪ ಮಾಫ ಥಾವಸ ಕೈನ ಕವೊ. ತುಮೆ ಸುವಾರ್ತೆ ಯೆರುಸೆಲೆಮಾ ಶುರುಕರಿನ ಜಗತ್ನಾ ಮನಕ್ಹೊಮಾ ಮಾರಾ ನಾಮಪರ ತಿಳಸೊ. 49ಐಕೊ! ಮಾರೊ, ಬಾ, ಕದಲಜ಼ ಮಿ ತುಮೊನೆ ತಿಳಸುಸ. ವರಿ ತುಮೆ ಸ್ವರಗನೆ ಶಕ್ತಿ ಮಳೆಲಕ್ಕಾ ಯೆರುಸೆಲೆಮಾಜ಼ ಕೈದಿನ ರ್ಹವೊ "ಕದ್ಯೊ.
