ಯೆಸು ಕ್ರಿಸ್ತ ಹುಟ್ಟಾನಾ ಹುತಿ ಕದಲ
26ಎಲಿಸಬೆತ ಛೆ ಮ್ಹ್ಯೆನಾ ಪೆಟೆ ರ್ಹತಾಮಾ ಕ್ಹುದಾ ತಿನಾ ಗಬ್ರಿಯೆಲ ಕವಾನಾ ದುತನೆ ಗಲಿಲಾಯ ಕವಾನಾ ಪ್ರಾಂತ್ಯಮಾ ರ್ಹಯಲ ನಜ಼ರೆತೆ ಕವಾನಾ ಗಾಮ್ಮಾ ರ್ಹಯಲ ಜಾಂಜಿಮಾನ ಚೊ಼ಕ್ರಿಕನ ವಳಾಯೊ. ತಿನೆ ಕಯಾಜ಼ ದಾಣಗಾನಾ ಕ್ಹಾತೆ ಸಂಬದ ನ್ಹೊತು. 27ತಿನೆ ದಾವಿದನಾ ಖಾಂದಾನವಾಲೊ ಥಯಲ ಯೊಸೆಫನಾ ಕ್ಹಾತೆ ನಾತ್ರು ಥೈತು. ತಿನು ನಾಮ ಮರಿಯಳ ವ್ಹತ್ತು. 28ದೆವದುತ ತಿನಾ ಕ್ಹಾಮೊ ಐನ "ಕ್ಹುದಾನೊ ಆಶಿರ್ವಾದ ವ್ಹಂದಲವಾಲಿ. ತುನೆ ಚೊ಼ಕು ಥಾವಾದೆ ಕರತಾ ತಾರಾ ಕ್ಹಾತೆ ಛೆ "ಕದ್ಯೊ.
29ದೆವದುತನಾ ವಾತೊ ಐಕಿನ ಘನ್ನಿ ಗಲಿಬಿಲಿ ಥೈನ ಎ ಕೆವೊ ಆಶಿರ್ವಾದ ವ್ಹೈ ಕೈನ ವಿಚಾರ ಕರತಿ ಘಾಬ್ರಿ ಥೈ. 30ದೆವದುತ ತಿನೆ "ಮರಿಯಳ, ಭುಚ್ಕು಼ನಕೊ. ಕ್ಹುದಾ ತುನೆ ಘನ್ನಿ ಕೃಪಾ ದಿದ್ಯೊಸ. 31ಐಕ! ತು ಪೆಟೆ ರ್ಹೈನ ಯಕ್ಕ ಪಟ್ಟೊ ಜ಼ನ್ಸಿ. ತು ತಿನು ನಾಮ "ಯೆಸು "ಕೈನ ಮ್ಹೆಲು. 32ತೆ ಮ್ಹೊಟೊ ಮನಕ್ಹ ಕೈನ ಕವೈಲಿವಸ. ಎನೈಸೊ ಕ್ಹುದಾ ಥಯಲ ಕರ್ತಾನು ದಿಕ್ರೊ ಕವೈಲಿವಸ. ವರಿ ಕ್ಹುದಾ ತಿನೆ ರಾಜೊ಼ ಥಯಲ ದಾವಿದನಾ ನಿಂಗತ ರಾಜೊ಼ ಕರಸ. 33ತೆ ಯಾಕೊಬನಾ ಖಾಂದಾನವಾಲಾವೊಪರ ಕೆಳಾಮಾಬಿ ಅದಿಕಾರ (ಹಕ್ಕ) ಚ಼ಲಾವಸ; ತಿನಿ ಯಕ್ಕ ರಾಜ್ಯನೆ ಅಂತ್ಯ ನತ್ತಿ. ಕದ್ಯೊ.
34ಮರಿಯಳ ದೆವದುತನೆ "ಎ ಕಿಮ್ಮ ಥಾವಸ? ಮಿ ಹಜು಼ನ ಹಿವಾ ನತ್ತಿ ಕರಲಿದಿತೊ" ಕೈನ ಕದಿ.
35ದೆವದುತ ಮರಿಯಳನೆ ಪವಿತ್ರ ಆತ್ಮಾ ತುಪರ ಆವಸ. ಕ್ಹಾರಾವೊತಿ ಮ್ಹೊಟೊ ರ್ಹಯಲ ಕ್ಹುದಾನಿ ತಾಕತನಿ ಛವ್ಲಿ ತುಪರ ಆವಸ. ತಿನಾ ಹುತಿ ಹುಟ್ಟಾನು ಪವಿತ್ರ ಬಚ್ಚು಼ ಕ್ಹುದಾನೊ ದಿಕ್ರೊ "ಕವೈಲಿವಸ. 36ಎನೈಸೊ ತಾರು ಕಳಬಳ ಥಯಲ ಎಲಿಸಬೆತ ಛೆತೊ. ತಿನೆ ವೈಸ ಥೈತಬಿ ತೆ ಯಕ್ಕ ಪಟ್ಟೊ ಜ಼ನ್ನಸ. ಬಚ್ಚಾ಼ನತ್ತಿ ಕೈನ ಮನಕ್ಹೊನಾ ಹತೆ ಕವೈಲಿದಲವಾಲಿ ತೆ ಹಮ್ನಾ ಛೆ ಮ್ಹ್ಯೆನಾ ಪೆಟೆ ಛೆ. 37ಕಾಕದ್ಯಾಮ ಕ್ಹುದಾನಾ ಹತೆ ನೈ ಥಾವಾನು ಸುಜ಼ ನತ್ತಿ ಕದ್ಯೊ.
38ತೆಳಾಮಾ ಮರಿಯಳ"ಮಿ ಪ್ರಭುನಿ ದಾಸಿ ವ್ಹೈ. ವರಿ ತು ಕದಲ ತಿಮ್ಮಜ಼ ಥಾವಾದೆ"ಕದಿ. ತೆಳಾಮಾ ದೆವದುತ ತ್ಯಾಂತೊ ಗೈ ಪಾಡ್ಯೊ.
