ಕ್ರಿಸ್ತಾಚ಼ ದರ್ಶನ್

9ಯೊಹಾನ್ ಮಂಥ್ಯಾಲಾ ಮೀ ಕ್ರಿಸ್ತಾಪ ತುಮಚಾ಼ ಭಾಹು ಜಾ಼ಲ್ಯೊ. ಆಮಿ ಸಗ್ಳ ಯಂಗ್ದಾಸ್ ಯೇಸುಸ್ ಲಾಗುನ್ ತರಾಸಾತ್ ರಾಜಾತ್ ಥಂಡ್ಪನಾತ್ ಹಾವ್. ಮೀ ದೇವಾಚಾ ಸಾಂಗ್‍ನ್ಯಾಲಾ ಯೇಸುಚೆ ವಳ್ಕಿಸಾಟಿ ಹಾ ಮನ್ಹುನ್ ಪತ್ಮೊಸ್ ದ್ವಿಪಾತ್ ಹಾ. 10ಪ್ರಭುಚಾ ದಿಸಾತ್ ಪವಿತ್ರಾತ್ಮಾನಿ ಮನಾ ಗೇತ್ಲಾ. ತವಾ ಮಾಜೆ ಮಾಗ ಯೊಕ್ ಮೊಟಾ ಸಬ್ದ ಐಕು ಆಲಾ. ತ್ಯೊ ಸಬ್ದ ತುತುರಿಚಾ ನಾದಾಚೆಗತ್ ಹುತ್ತಾ. 11ತ್ಯೊ ನಾದ್, “ತು ಬಗ್‍ತ್ಯಾಲ ಸಗ್ಳ ಯಕಾ ಪುಸ್ತಕಾತ್ ಲಿವುನ್ ಎಫೆಸಾ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯ ಆನಿ ಲವೊದಿಕಿಯ ಮಂಥ್ಯಾಲ್ಯಾ ಸಾತ್ ಸಭೆನಾ ಲಾವುನ್ ದೆ” ಮನ್ಹುನ್ ಸಾಂಗತೊ.

ಎಶಾತಲ್ಯಾ ಸಾತ್ ಸಬೆಂಚಾ಼ ನಕಾಸಾ

12ಮಾಜೆ ಸಂಗ ಕೊನ್ ಬೊಲ್‍ತ್ಯಾ ಮನ್ಹುನ್ ಬಗಾಯಾ ಮೀ ಮಾಗ ಬಗ್ತಾನಾ, ಸಾತ್ ಸೊನ್ಯಾಚ಼ ದಿವಲಾವ್ನ ಬಗಲ. 13ತ್ಯಾ ದಿವಲಾವನ್ಯಾಂಚೆ ಮದ್ದಿ “ಮಾನ್ಸಾಚಾ ಲೇಕಾಚೆಗತ್ ಆಸ್‍ಲ್ಯಾಲ್ಯಾಲಾ ಮೀ ಬಗ್ಲಾ. ತ್ಯನಿ ಲಾಂಬ್ಡಾ ಜ಼ಘಾ ಗ್ಯಾತ್ಲಾಹುತ್ತಾ; ಸೊನ್ಯಾಚಿ ಪಟ್ಟಿ ಶಾತಿವ ಬ್ಯಾಂದ್ಲಿಹುತ್ತಿ. 14ತ್ಯಚೆ ಡುಯಿಚ಼ ಕ್ಯಾಸ್ ಮಂಜಾ಼ಚೆಗತ್ ಪಾಂಡರ‍್ಯಾ ಮೆಂಡ್ರಾಚೆಗತ್ ಹುತ್ತ; ಡೊಳ ಇಸ್‍ಥ್ಯಾಚೆ ಜ಼ಳಿಚೆಗತ್ ಹುತ್ತ. 15ಪ್ಯಾ ಬಠಿತ್ ತಾಪಿವಲ್ಯಾಲ್ಯಾ ತಾಂಬಿಲಾಲ್ ತಾಂಬ್ಯಾಚೆಗತ್ ಹುತ್ತ; ತ್ಯಚಾ಼ ನಾದ್ ವ್ಹಾವ್‍ತ್ಯಾಲ್ಯಾ ಪಾನ್ಯಾಚಾ ಜ಼ರ‍್ಯಾಚೆಗತ್ ಹುತ್ತಾ. 16ತ್ಯನಿ ಆಪ್‍ಲ್ಯಾ ಉಜ್‍ವ್ಯಾ ಹಾತಾತ್ ಸಾತ್ ಚಾನ್ಯಾ ದರ್ಲ್ಯಾಹುತ್ಯಾ. ತ್ಯಚಾ ತೊಂಡಾತ್ನಿ ಧಾರ್ ಆಸ್‌ಲ್ಯಾಲ ದುಯಿಕ್ನಿ ಲಾಗ್‌ತ್ಯಾಲ ಥಲ್ವಾರ್ ಬಾಹಿರ್ ಯಯಿತ. ತ್ಯಚ಼ ತ್ವಾಂಡ್ ದೊಪ್ಯಾರ್ಚಿ ದಿಸತ್ಯಾಲ್ಯಾ ದಿಸಾಚೆಗತ್ ಹುತ್ತ.

17ಮೀ ತ್ಯಲಾ ಬಗ್ಲಾ ತವಾ, ತ್ಯಚಾ ಪಾಯಾತ್ ಮೆಲ್ಯಾಚೆಗತ್ ಬಡ್ಲೊ. ತ್ಯನಿ ಆಪ್ಲಾ ಉಜ್ವಾ಼ ಹಾತ್ ಮಾಜಿವ ಥಿವುನ್, “ಭಿಹುನಕೊಸ್! ಮೀಸ್ ಆಂದಿಚಾ಼ ಆನಿ ಸರ್ತಾ. 18ಮೀಸ್ ಜಿತ್ತಾ ಪ್ರಭು. ಮೀ ಮೆಲ್ಯೊ, ಫನ್ ಆತಾ ಬಗ್, ಮೀ ಖಾಯಿಮ್ ಜ಼ಗತ್ಯಾಲಾ ಜಾ಼ಲ್ಯೊ. ಮರ್ನಾವ ಆನಿ ಪಾತಾಳಾವ ಅಧಿಕಾರ್ ಮನಾ ಹಾ. ” 19“ಮನ್ಹುನ್ ತು ಬಗ್‍ಲ್ಯಾಲ್ಯಾ ಗುಶ್ಟಿ ಲಿವ್. ಆತಾ ಚಾ಼ಲತ್ಯಾಲ್ಯಾ ಖನ್ಕತಿ ಆನಿ ಮೊರ‍್ಹ ಚಾ಼ಲತ್ಯಾಲ್ಯಾ ಖನ್ಕತಿ ಲಿವ್. 20ಮಾಜಾ ಉಜ್‍ವ್ಯಾ ಹಾತಾತ್ ತು ಬಗ್‍ಲ್ಯಾಲ್ಯಾ ಸಾತ್ ಚಾನ್ಯಾ ಆನಿ ತು ಬಗ್‍ಲ್ಯಾಲ ಸಾತ್ ಸೊನ್ಯಾಚಾ ದಿವಲಾವನ್ಯಾಂಚಾ಼ ಅರ್ಥ್ ಆಸ ಹಾ: ಸಾತ್ ಚಾನ್ಯಾ ಮಂಜೆ ಸಾತ್ ಸಭೆಚ಼ ಧುತ್. ಸಾತ್ ದಿವಲಾವ್ನ ಮಂಜೆ ಸಾತ್ ಸಭೆ. ” ಮನ್ಹುನ್ ಸಾಂಗ್ಲ.