परमेसवर मेरा भाग
दाऊद का मिक्ताम
1हे परमेसवर मेरी हिफाजत कर,
क्यूँके मै तेराए शरणागत सूं।
2मन्नै यहोवा तै कह्या सै, “तू ए मेरा प्रभु सै;
तेरे सिवाए मेरी भलाई किते कोन्या।”
3धरती पै जो पवित्र माणस सै,
वोए आदर कै जोग्गे सै,
अर उनतै मै राज्जी सूं।
4जो पराये देवता कै पाच्छै भाग्गै सै उनका दुख बढ़ जावैगा;
मै उन ताहीं लहूआळी भेंट न्ही चढ़ाऊँगा
अर उनका नाम अपणे होठां तै न्ही ल्यूँगा।
5यहोवा मेरा चुण्या होया भाग अर मेरा कटोरा सै;
मेरै भाग नै तू टिकाये राक्खै सै।
6मेरै खात्तर माप की डोरी मन भाण आळी जगहां म्ह पड़ी,
मेरा भाग मन नै भावण आळा सै।
7मै यहोवा नै धन्य कहूँ सूं,
क्यूँके उसनै मेरै ताहीं तसल्ली दी सै;
बल्के मेरा मन भी रात नै मन्नै शिक्षा देवै सै।
8मन्नै यहोवा ताहीं लगातार अपणे स्याम्ही राख्या सै:
इस करकै के वो मेरै सोळे हाथ नै रहवै सै मै कदे न्ही डगमगाऊँगा।
9इस कारण मेरा मन आनन्दित
अर मेरी आत्मा मगन होई;
मेरी देह भी चैन तै रहवैगी।
10क्यूँके तू मेरै प्राण नै अधोलोक म्ह न्ही छोड़ैगा,
ना अपणे पवित्र भगत नै कब्र म्ह सड़ण देवैगा।
11तू मन्नै जीवन की राह दिखावैगा;
तेरे धोरै आनन्द की भरपूरी सै,
तेरे सोळे हाथ म्ह सुख सदा बण्या रहवै सै।
