Zakɔɓe tuya loo vai
1Zakɔɓe ná-doun zunuiti tolini, é ɠɛ ti ma: «À ɠaalɛ ba, gè faiti bo wo ma, niiti ti ʋaazu ɠɛɛzu ga woye ʋelela ʋelei.
2«À ɠaalɛ ba, wo woilo gòo ma ga pagɔ, Zakɔɓe ná-doun zunuiti!
À woilo wo-ɠɛɛ Izilayɛle wooi ma!
3«Luɓɛn, ɗa ɠa è ga dòun mɔungi,
ɗa ga è ga sɛ̀bɛi ta sùvikɛi ma mɔungiti,
è-losuʋɛ wɔɔlɔai ti pɛ ba,
è-zɛbɛi wɔɔlɔai ti pɛ ba.
4È yeeɠaaɓaai eɠɛ ziɛvegi,
è la mɔ nu ɠitela losuʋɛ zɔlɔɔga,
mazɔlɔɔ è lɛɛʋɛ è-ɠɛɛ laa ʋetei zu,
è nà-betei ɠɔzɔʋɛ è lɛɛ vai zu ná.
5«Simiyɔn ta Levi ta ga kɛɛɠɛlointi,
ta-woɠa zɔkpɔiti ta ga tooma aniiti.
6Zìi mina ʋɔɔpɛɛ ta-yaava vai ʋa ɲɛgɛlɛin,
nà-kisiɛi mina ɠili ta-ɠaalɛbai ʋa!
Mazɔlɔɔ ti nu ʋaani ta-yiiɠulagi zu,
ti nikɛiti kɔɠɔʋolu ɲataiti teʋeni ta-unsuɲɔi zu.
7Ta-yiiɠulagi ɠotoʋɛ, mazɔlɔɔ gola ɲɔuʋɛ,
ta-yiiɓadii ɠotoʋɛ!
Nà ti ɠaaɠwɛ Zakɔɓe nɔnɔiti saama,
nà ti vaza Izilayɛle zaama.
8«Zuda, ɗa ɠa è-ɠɛɛlointi ti ʋaazu è maamusɛzu.
È-yeei ɠa ɠɛ è zili nuiti kɔ poluʋɛ.
È-ɠɛɛ ná-doun zunuiti ta ɠɛ nɔkɔsu è wu.
9Zuda, dòun zunu, ɗa ga zala zinɛ goi,
nii é zeɠezu paa wosuʋɛ!
É ɲiibiiti pɛɛ su, é ʋɛɛ, eɠɛ zalai,
eɠɛ zala zaai, ɓɛ ɠa a zoo é buzeɠe pɛɛzuʋɛ?
10Kundiɠilai ma lukpɔi la ɠulaa Zuda ʋɛlɛyeɠei ʋa pɛ,
anɛɛ tɔgi maazuɓaa nui ná-poogi la ɠulaa kɔɠɔ yɔɠɔzuʋɛti,
eyɛsu nii tukpɔi ga nɔnɔ naama nui ʋa,
nuiti ti ɠolo bɛ.
11Toɠa ná-soovalegi ɠili leezɛn lɔkulugi ʋa,
é ná-soovale saai ma yiʋoi ɠili ma lɔkulu pagɔi ʋa.
Toɠa ná-seɠei gba dɔɔ ɗɛi wu,
é ná-seɠe maazu zeɠei gba leezɛin ma ɲamai wu.
12Gaazuɠɛzɛiti kpɔiʋɛ su ga dɔɔi,
nɔnɔi ɲiigaiti koleʋɛ.
13«Zaɓulɔn ɠa zei Kpoloɗɛ Wolai ɠobaʋɛ yooiti su,
toɠa zei ziɛlaʋɛ, ɓatoiti tosuʋɛ,
ná-zou ɠwɛpelemaʋɛti ta zeeli Sidɔn yooi ʋɔ pelei.
14«Isakaal ɠa ga soovale sinɛi suɓaai,
é laani togani makɛ zasa felegɔiti zɔɠɔzuʋɛ.
15É ɗa ka ga ná-dooɠo bosuʋɛ ʋagɛ,
zooi wola ʋagɛ.
É ɗa ɓili kasɔi wu,
é ɗa ɓɔɠɔ lɔ duɔlai ma wotii zu.
16«Dan ɠa ná-nuɓusɛiti tukpɔɠaaleʋe,
eɠɛ Izilayɛle ná-bolodai ɠila.
17Dan ɠa ɠɛɛzu pelei zu ga kaalii,
é ɠɛ ga pɛɛɠaalii pele goi zu,
é sooi ɲi kɔɠɔ libiligi ʋa,
sooi ɠɔma nui loo daazei.
18«Ee, Ɠɔoɠɔ GALAGI, kìtogɛ ɗa-ɠizo fai ʋa!
19«Toosu nuiti ta ʋa Gade laalɔɠɔma,
kɛlɛ toɠa wuzeɠe, é laalɛ ti wu, é ti ziɠa ga ɠɔɠɔi.
20«Asɛɛl ná-zooi zu ɠa daamianigi a ɠɛ ná ga bɔɔlɔa.
Toɠa masa daamiani pagɔi kpein kula.
21«Nɛfɛtali ɠa ga dopai, é ɓɔɠɔ yeema, é ɗa ʋili,
é ɗa ziʋo ʋagɔiti pu.
22«Zozɛfe ɠa ga gwaa wulu ʋagɔi ma ʋɔnɔbai,
gwaa wulu ʋagɔi ma ʋɔnɔbai, é ziɛungi ɠobaʋɛ.
Ma ɓekegiti buzeɠeʋɛ, ti zɛlɛ siɠigi maazu.
23Ti ɓaaɠogɛ ma, ti mɛɛin ʋili ma.
Mɛɛn ʋili nuiti ti ɠɛni ga tɔun sili nuiti.
24Kɛlɛ é ná-mɛɛin zogɛ kpaan tɔ ɓɔɠɔi,
zeeiti sulogɛ ga Zakɔɓe ná-Zɛbɛ-Su-ƓALAGI yeeiti,
nii é ga Izilayɛle makɛ nui ta ná-fasai.
25È-ɠɛɛ ná-GALAGI zaalai zu, nii é ga ɗa-ɓɔba nui,
GALA Zɛbɛi-Pɛ-Maliɠii, nii a tuya loo è ʋɛ,
ɗa tuyaiti sɔlɔɔ, ti zeɠezu maazuʋɛ geeɠɔlɔgi zu,
ta tuyaiti ti ɠulazu ziɛi ɓomaʋɛ zooi wu,
ta doun mɔinmɔingiti ta togani ɓulugiti.
26È-ɠɛɛ ná-tuyaiti zeeɠaaɓaaʋɛ,
ti leʋe sɔ̀lɔɔ nuiti tɔnɔiti ba,
eyɛsu é zeeli ɠɔoɠɔ gizeiti kwɛgi.
Tuyai naati ti yei Zozɛfe unma,
é yei, é la kɛɛɠɛlointi ta-ɠundiɠii losaamaʋɛ!
27«Ɓɛnzamɛn ɠa ga zuluɓui, nii é anii ʋalizu ga,
sobui é ná-ani zogai mi,
kpɔkɔi, é kɔɔzoganii ɠaaɠwɛ.»
28Naati kpein ka ti ga Izilayɛle ná-boloda puugɔ maazu felegɔiti (12), pele ɠana ti-ɠɛɛ naama ɓɔɛiti boni la ti ma, é ɗa tuya loo ti ʋɛ. É tuya looni ti ʋɛ, ɛsɛ gilagilagi ta nɔnɔ ma luyai.
