Maawɔin nui ná-GALA falii
1Maawɔin nui ná-GALA falii, siɛgi zu suvikɛi ɓegai la, é ɗa ná-kpalai lɛ ga Ɠɔoɠɔ GALAGI.
2Ee, Ɠɔoɠɔ GALAGI, woilo nà-maanɛɛnɛ wooi ma,
nà-kpee wooiti ti zeeli è ma!
3Mina ɠaazulɔɔɠu bà, nà-kidaaʋili foloi!
Woilo gòoi ma, voloi nà kpee loo la!
Suvilɛ ga gòoɠaaʋotega!
4Mazɔlɔɔ nà-eteai ɠa ɲɛɛlɛzu eɠɛ duului,
abui ɠa mà ɠaeiti ba, eɠɛ abulekai.
5Kɛɛʋɛ eɠɛ tufai teʋeai ga, é la foloi ɠa,
zekana zìi vɔai la.
Nà yeemazu nà-daami wo fai ma.
6Gè yɛga kpalagi wosu,
kɔ̀lɔgi ɠataga mà ɠaeiti ba.
7Gè ɠɛa eɠɛ teʋebai zu ɠoɠɛi,
gè ɠɛ eɠɛ buungi, nii é zeini ada zuɠoloɠologaiti su.
8Nà ɠaazuɓaazu,
eɠɛ wɔni goi, nii tɔ ɠila ge zeini pɛlɛ ɠɔmaʋɛ.
9Foloi pɛ daawu, sìli nuiti ta ɓaaɠulazu mà,
ti ɗa ɲɛɛɠula nɔ̀un su, ti ɗa zɔiti foovo ga ti maanɔɠɔ ga kɛ̀ʋele.
10Zuʋui ɠa é ga dàamianigi, ɓului ʋotogi zu.
Nà nà-kpɔɔle ɗɛi zupuzu ga gàazuɗɛi,
11ɗa-yiimaleʋei maaʋele ma, ta ɗa-yiiɠulagi,
mazɔlɔɔ è sòga, è pìli ya.
12Sìi ma voloiti maa ɠa yeizu eɠɛ kpɔkɔmaʋɛ niinigi,
gè ɠɛa eɠɛ tufai é vɔɔzu.
13Kɛlɛ ɗɔun ɗa, Ɠɔoɠɔ GALAGI, ɗa masadai ɠɛɛzu eyɛsu ɠɔ,
è-lɔɠɔi ɠa yɛsu ná, yeeɠɛɠalaiti pɛ su.
14Ɗa wuzeɠe, è Siyɔn maawɔinɠa,
mazɔlɔɔ yeeɠɛɠalai soloogai ga è zaalai la ma la,
yeeɠɛɠalai teʋeai ba, naa zeelia.
15Mazɔlɔɔ gɛi gi ga ɗa-wotiɠɛ nuiti, ná-kɔtuiti nɛɛʋɛ gi ʋɛ,
ma vufiligi maawɔin ɠa gi zosu.
16Zii ɠiligiti ta Ɠɔoɠɔ GALAGI lɛbi,
eteai zu masagiti kpein ta ná-lɛbiyai ɠwɛɛ,
17siɛgi zu Ɠɔoɠɔ GALAGI Siyɔn losu da ʋolu,
é ɗa ɓɔɠɔ lɛ náʋɛ ná-lɛbiyai zu.
18Niiti ti maawɔinɗai, é la naati ta-maanɛɛnɛ wooi ʋɛlɛʋiliga,
é la ɠɛlɛa ta-ƓALA falii ʋa.
19Naama vaiti ti zɛʋɛ, é makɛ yeeɠɛɠalai ma nuiti tuɠɔ ti ʋaazu,
nuɓusɛiti ti ʋaazu ɓɛtɛzu, naati ta Ɠɔoɠɔ GALAGI maamusɛ.
20Ɠɔoɠɔ GALAGI yɛni zeini seizu ɲadegai ungaʋɛ, é wɛlɛ buu ʋelei,
é yɛni geezuʋɛ, é ɠaazulo eteai ʋa,
21é kasoɠa nuiti kpala gooiti mɛnini,
é ʋa é ti undaaʋili galui vie ti ma, ti mina za,
22naa ɠa a kɛ, nuiti ti Ɠɔoɠɔ GALAGI maawoo ziɛ Siyɔn,
ta ná-maamusɛ wooi wo Zeluzalɛme,
23siɛgi zu nuɓusɛiti ti ɠaalɛɛzu ba la náʋɛ,
ta masadaiti ta nɔkɔ Ɠɔoɠɔ GALAGI wu ná.
24É sɛ̀bɛi zuɠoloɠologa pele zu,
é sìi leʋea kpasu.
25Naa ɠa é ba, gè kpeei loozu la, gè ɠɛ ma:
«Nà-GALAGI, mina pàa, nà-eteai zaama,
ɗɛi è ná, yeeɠɛɠalaiti pɛ su!
26Kaite è eteai lɔɔɓadɔni,
geeɠɔlɔgi ɠa ga è-yeei ná-kpɛtɛanii.
27Ta ɲɛɛlɛ, kɛlɛ ɗɔun ɗa ná eyɛsu ɠɔ.
Ti pɛ ta wɔlɔzaɠa eɠɛ seɠei,
è ti maavalibo, eɠɛʋelei nu a ɗa seɠei maavalibo da, ta ɲɛɛlɛ.
28Kɛlɛ ɗɔun, ɗa yɛsu ɠɛʋele ma,
ɗa-ɠonagiti ti la ɓega ɠɔ!
29Ɗa-wotiɠɛ nuiti ti-lointi ta zeizu zɔlɔɔ,
ɗa ɠaazuyɛ ti-mavofodaiti ba, ti zei kpaan.»
