हाजिरा अउ इस्माएल के निकारे जथै
9बीते टेम हे मिस्री दासी हाजिरा अक्ठी टोरवा के पइदा करिस, अब्राहम ऊ टोरवा के बाफ रथै, सारा हाजिरा के टोरवा के खेलत देखिस। 10इहैनिता सारा अब्राहम लग कथै, “हाजिरा अउ ओखर लरका के इहां लग पठोय दे, जब हम मरब ता हमर सगलू डेरा इसहाक के मिलही, मै नेहको चाहथो कि ओखर लरका इसहाक के संग उन डेरन के बटवारा होय।” 11हइ सगलू बात अब्राहम के बोहत दुख कर देथै, ऊ अपन टोरवा इस्माएल के निता दुखी रथै। 12पय भगवान अब्राहम लग कथै, “ऊ टोरवा के बारे हे जादा दुख झइ हो, अउ हाजिरा के बारे दुख झइ हो, जउन सारा चाहथै, तै उहै कर, तोर लरका इसहाक कर लरका लग चलही। 13पय मै तोर हाजिरा के लरका के आसीस देहुं, काखे ऊ तोर लरका आय, इहैनिता मै ओखर परवार के अक्ठी बडा देस बनइहों।” 14दूसर रोज अब्राहम बोहत सुबेन्ने उठिस अउ कुछ खाना अउ खलरी के थइला हे पानी हाजिरा के दइ दइस, हाजिरा उन चीजन के धरिस अउ अपन लरका के संग उहां लग कढ गइस, हाजिरा ऊ जिघा के छांडिस अउ ऊ बेरसेबा के पतेरा हे भटके लगिस। 15कुछ टेम बाद हाजिरा के सगलू पानी बढाय जथै, पीय के निता कुछु पानी नेहको बचाथै, इहैनिता हाजिरा अपन लरका के अक्ठी पुडरा के तरी धर देथै। 16हाजिरा उहां लग कुछ दुरिहां गइस, तब ऊ रुकथै अउ बइठ जथै, हाजिरा सोचथै कि मोर लरका मर जइ काखे उहां पानी नेहको रथै, ऊ अपन टोरवा के मरत नेहको देखै चाहथै, अउ ऊ बोहत रोमै लग जथै। 17भगवान लरका के रोमै के आरो के सुनिस, भगवान अपन दूत के पठोथै हाजिरा के लिघ्घो, अउ ओखर लग पूंछथै, तोके का हुइ गय हबै? झइ डर, जिहां तोर लरका हबै, उहां लग भगवान ओखर आरो के सुने हबै। 18उठ अपन हाथ लग लरका के सम्भार, काखे मै उके बोहत मनसेन के बाफ बनइहों। 19तब भगवान ओखर आंखी के हइ मेर लग उंघारथै, कि ऊ अक्ठी पानी के कुंवा देख सकै, इहैनिता हाजिरा कुंवा कर लिघ्घो गइस, अउ अपन थइला के पानी लग भर के पिलाइस। 20अउ भगवान ओखर संग रथै, जब तक ऊ बढ नेहको गइस, अउ ऊ पतेरा हे रहत-रहत धनही चलामै के सिख जथै। 21ओखर दाय मिस्र लग ओखर निता दुलही लइस, उन पारान नाम के पतेरा हे रहै लागथै।
