ኔኔዌኮ ሎኦሚፆ

1ኔኔዌ! ኔጊዳ ሜታ ዬዔኔ!

ዬያሮ ኔኤኮ ዋርዲዮ ኬኤሎ ዲፆ ዶዲሼ!

ዚጊሮ ጎይፆ ቢያ ዛጊ ካፔ! ዖልዚ ዓንጋሞ ዓርቂ ጊኢጌ!

ዓኣ ዎልቆ ኔኤኮ ቢያ ቡኩሲ ዶዲሼ!

2ሞርካ ዔያቶንታ ዔያቶኮ ዓኣ ባኮንታ

ዲርካቺ ባይዚ ኩርሴታቴያ

ናንጊና ናንጋ ጎዳ ያይቆኦቤ ናኣቶ ማዔ

ዒስራዔኤሌ ጊንሣ ማሂ ቦንቺሳንዳኔ።

3ዖሎ ዓሳ ዞቄ ዞቄ ጊቲማ ዔኪ ዓኣኔ፤

ዔያታ ማኣዔ ማኣዓሢያ ዞቄ ዲንኪኬ፤

ዒዚ ዔያቶ ዖሎሮ ኬሳዛ ሳርጌሎ ዖይታ ዓኣፓ ዱዱካያኬ፤

ፓራሢና ዖላ ዓሳኣ ፓራሢዳ ዴዒ ዖሎሮ ዓፃዺ ዋኣጪንታኔ።

4ሳርጌሎ ዖይታ ዢባሬጉዲ ጎይፆይዳ ዎላ ሄሌሎ ጳሽካኔ፤

ጶኦኮይዳ ሴካ ሃንጋ ዣኣቂ ሺራኔ፤

ዔዔኤታ ታሚ ማላኔ፤

ዜኤሊንሢጉዲያኣ ዡኡዣኔ።

5ዒዚ ፔኤኮ ዖሎ ዓሶ ዓይሣ ቢቶ ዔኤላኔ፤

ዔያታኣ ዹቂንቲ ሎኦሚ ሎኦሚ ዬዓኔ፤

ሞርኮኮ ዖሎ ዓሳ ጳሽኪ ጳሽኪ

ካታሞኮ ዙሎ ኬልቂ ዲርቆና ዲፆ ባንሢ ጳሽካኔ፤

ዱኪንታ ሂኢዦ ዔያታ ፔኤኮ ዼኤፖ ጊቲሞና

ዔያቶ ዓይዱዋጉዲ ቃዛኔ።

6ዎሮ ዛሊና ዓኣ ካታሞ ጌሎ ካራ

ሜኤሊዮ ጌይ ፖዒ ቡሊንቴኔ፤

ካኣቱሞ ማኣሮይዳ ዓኣ ዓሶማኣ ካራ ባይቄኔ።

7ኔኔዌ ዻውሲንቴኔ፥ ጌኤሻ ዲዒንቲ ዔውቴኔ፤

ዒዞም ማዾ ማዻ ላኣላ ኩኡኬ ዑኡሲና

ዳዶዋ ፔኤኮ ዱሊ ዱሊ ዒላቲ ቃያኔ።

8ኔኔዌ ሚናፓ ዴዴዔ ቦቆሊ ዋኣሢኬ፤

ሃሢ ዒኢካፓ ኬስኪ ሾኦቲ ዴንዳኣና

«ዔቁዋቴ! ዔቁዋቴ!» ዓሲ ጌዔም ሺሪ ሺሪ ዛጋዓኬ።

9ካታሞይዳ ዓኣ ባካ ጋፓ ባኣዚቱዋሴ፤

ሚዛጶ ሹጮኮ ሚርጉማ ሃይማኬ ጌይንታያቱዋሴ፤

ዬያሮ ዴንዲ ቢሮ ዓንጎንታ ዎርቆንታ ቡሪ ዔኩዋቴ።

10ኔኔዌ ዲርካቺንቲ ባይቄኔ፤

ቤሲ ባይቂያ ዶዔኔ፤

ዓሶኮ ጎጳ ዒጊጪ ዋኣፄኔ፤

ዬያ ዒጊቹማፓ ዔቄያና ዎልቃ ዔያቶኮ ጌሌኔ፤

ዓሲ ቢያ ዒጊጪ ጎጋይቄኔ፤

ዓሶ ቢያሢኮ ዓኣፖ ካራ ቦኦሪ ሜሌ ማዔኔ።

11ሚርጌ ዞቢ ናንጋ ቤሲ

ሃጊ ዔቃ ዞቦ ናኣታ ሙዖ ሙዓ ቤሲ

ዓዶንታ ዒንዶ ዞቦንታ ፔኤኮ ናኣቶና ዎላ

ሂርጋ ባኣያ ላሂ ዓማሊ ሺራ ቤሲ ማላ

ዬና ካታሜላ ሃሢ ዎካዳዖ?

12ዞባሢ ፔኤኮ ናኣቶም ጊዳንዳያ ኬሚ ዎዺ ዔኪ ዬዔኔ፤

ዞቦ ዒንዴሎማኣ ሙዖንዶያ ዔኪ ሙኬኔ፤

ዒኢካ ዔያታ ናንጋ ቤዞ ኬሚ ዎዾና ቦዖና

ዴኖ ዔቶዋ ሾኦሊ ሾኦሊ ላኣሎና ዓሽኪና ዒ ኩንሤኔ።

13ናንጊና ናንጋ ጎዳ ማዔ ፆኦዛሢ፦ «ኔኔዌ! ታ ኔና ባይዛኒ ዔቄኔ፤ ሳርጌሎ ዖይቶዋ ታኣኒ ኔኤኮ ሚቻንዳኔ፤ ሃጊ ዔቃ ዞቦ ናኣቶዋ ጬንቻ ዓራፖ ዎዻንዳኔ፤ ሳዖይዳ ኔኤኒ ዖሊ ባሻንዳ ዓሲ ባኣያ ታኣኒ ማሃንዳኔ፤ ኔኤኒ ዳካ ኪኢቶ ዓሶኮዋ ዑኡሲ ሃይካፓ ሴካ ዋይዚንታዓኬ» ጋዓኔ።

1ሱጉሢ ዓሲ ሌሊ ማዔ ካታሜሎ

ሉኡዙሞና ጌሺሢና ጋፒ ዔርቴያ ማዔዜሎ

ቡሪሢና ዔኤቢ ዲዒ ዲዒ ዔኪ ፔ ጋሮ ኩንሤዜሎ

ኔኔዌ ካታሜሎም ባዴዔ!

2ዢራፓ ዑኡሲንታ ሳርጌሎ ዖይቶኮ ሺራ ቶኮ ዑኡሲንታ

ፓሮ ካኣኒንታ ሳርጌሎ ዖይታ ዋይዚሳ ዑኡሲንታ ዒኢካ ዋይዚንታኔ።

3ፓራሢና ዖላ ዓሳ ዖሎሮ ኬስካኣና

ፖፖዓ ጬንቾ ዓራፖንታ ዎርሢንታ ዔኪ ዓኣኔ፤

ሚርጌ ዓሲ ሃይቂ ኩሜሢሮ

ሌዛ ሳዖይዳ ኩሊንቴኔ፤

ሌዛ ኮሺ ሚርጌሢሮ

ዒኢና ዓኣዻ ዓሶ ቢያ ዹቂ ሎንሣያ ማዔኔ።

4ዬይ ያዺ ማዔሢ ዳምቤባኣ ጎይሢ ዞኦዛ ኮኦማ ላኣሌሎ ዛላናኬ፤

ዒዛ ፔኤኮ ማርሾና

ጊንሣ ሃሣ ሚዛጱሞና ዞኦዛ ኮኦሚፆ ማዾና ዴሮ ጌሺ ዲዒ ዔካኔ።

5ቢያ ባኮ ዎይሣ ጎዳ ሂዚ ጋዓኔ፦

«ዔናኣ፥ ታ ኔጊዳ ሞርኬ ማዒ ዔቄኔ፤

ቡዶ ታ ኔኤኮ ሌካ ዔኪ ዓኣፖ ካሮ ካንቂሳንዳኔ፤

ሜሌ ዴራ ኔኤኮ ካሉሞ

ዱማ ዱማ ካኣታኣ ፆኦዛ ማዤ ዑፆ ኔኤኮ ዴንቃንዳኔ።

6ቡኡራ ላኣሎ ቤሲ ታ ኔና ማሃንዳኔ፤

ቦሂ ታ ኔና ዛጋንዳኔ፤

ዓሲ ቢያ ኔና ሚኢጪ ዓማላንዳጉዲ ታ ማሃንዳኔ።

7ኔና ዛጋ ዓሲም ቢያ ዑስካ ጌሌም፦

‹ኔኔዌ ካታማ ዶዒ ቤሲ ባይቄኔ፤

ዒዞ ዖኦኒ ዖዪ ዬኤካንዳይ?›

ዒዞ ዶዲሻንዳ ዓሲያኣ ዓንካፓ ጴዻንዳይ?» ጋዓንዳኔ።

8ዔዞ ኔኔዌ! ኔኤኮ ሞርኬ ቃዛ ባዚ ዓኣሢጉዲ ዓባዬ ዎሮ ዓጫ ዓኣ፥ ኮይላ ጉቤ ዋኣሢ ሌሊ ማዔ፥ ዼኤፖ ባዞ ዋኣፃ ዒዞኮ ሞርኮ ቃዛያ ማዔ ጊብፄ ካታሜሎ ቴቢሴይዳፓ ኔ ዓይጎና ባሻይ? 9ሃይማኬ ጌይንቱዋ ዎልቃ ዒዞኮ ዒኢካ ጊብፄ ዓጫፓ፥ ሃሣ ጊንሣ ዒቶጲያ ዓጫፓ ዬዓኔ፤ ፑኡፄንታ ሊኢቢያንታ ዒዞና ዎላ ፔቴ ማዒ ዒዞ ማኣዳያኬ። 10ዬይ ቢያ ያዺታንቴ ቴቢሴ ካታማ ሞርኮና ዓዺንቴም ዴራ ዒዞኮ ዲዒንቲ ዔውቴኔ፤ ዻኮ ናኣታ ዒዞኮ ሹቺዳ ጳዺንቲ ዹኡቂ ጎይፆይዳ ጎይፆይዳ ኬኤሪንቴኔ፤ ሱኡጎዋ ካራሚ ማሂ ዔካኒ ዒፃ ዓጊንቴኔ፤ ቢቶ ቢቶ ዓሳኣ ዓንጊና ቱኡቴኔ።

11ዔዞ ኔኔዌ! ኔኤኒ ማሢንቲሢና ቡኡዲንቲ ሃንታ ዓሲጉዲ ማዓንዳ ዎዴንታ ኔኤኮ ሞርኮ ቤርታፓ ፑኒ ካይዚ ኔ ጳሽካንዳ ዎዴያኣ ዬዓንዳኔ። 12ኔኤኮ ዋርዲዮ ማሂ ማዦና ኬኤሎ ዲራ ቢያ ቤርታዺ ካፄ ዓኣፒ ዓርቄ ቤሌሴ ሚሢጉዲ ማዓንዳኔ፤ ዬያ ዓጊሦዛ ዓኣፓ ዲኢኔም ሙዓ ዓሲ ሙዓኔ። 13ኔኤኮ ዖሎ ዓሳ ቢያ ላኣሊጉዲ ዒጊቺኬ፤ ኔ ዓጮኮ ዛጶ ካራ ኔኤኮ ሞርኮም ቡሊሢ ማዒ ዓኣኔ፤ ካሮ ጋጋርቆ ዶዶ ሚፆዋ ታሚ ኔኤኮ ሙዔኔ። 14ኔኤኮ ሞርካ ኔና ማንጊ ካሮ ኔኤኮ ባይዛኣና ኔኤኒ ዑሽካንዳ ዋኣፆ ሃሢ ዓኣንቴ ዱይ ጌሤ! ኔኤኮ ዋርዲዮ ማዓ ኬኤሎ ዲፆዋ ዶዲሼ! ቶርጴ ሄርቂ ዢኢጬጉዲ ካፂሲ ኮሼ! ፁኡቤ ጎዖ ባኮዋ ማዤ።

15ኔኤኒ ታሚና ሚቺንቴም ዴራ ኔኤኮ ዖልዚዳ ኩዲፃ ዓቱዋያኬ፤ ዓቢሢ ማካ ሙዒ ባይዜ ጎሺ ኔኤኒ ማዓንዳኔ፤ ዒንሢያ ዓቢሢና ማኮናጉዲ ሾይንቲ ዺቡዋቴ።

16ኔኤኮ ኮርሞ ኮርማ ዓሳ ዦኦጌፓ ባሼ ሚርጌኔ፤ ጋዓንቴ ዔያታ ዓቢሢጉዲ ሳዖ ኔኤኮ ጋፒሲ ሙዒጋፓ ባራኒ ዴንዳንዳኔ። 17ኔና ካፓ ዓሳ ማኮጉዲ፥ ቢታንታ ዒንጊንቴ ዓሳኣ ሳዓ ጪኢሽኬም ዲርሲዳ ቁንዲ ዴዔ ዓቢሢጉዲ ማዔኔ፤ ዓባ ኬስካኣና ባራኒ ዔያታ ዴንዳንዳኔ፤ ዎኒ ዔያታ ዴንዳንዳቴያ ዔራንዳይ ዖኦኒያ ባኣሴ።

18ዓሶኦሬ ካኣቲዮ! ኔና ካፓ ዓሳ ጊንዔኔ፥ ሱኡጎ ማዔ ዓሳ ላሂ ሃውሼኔ፥ ዴራ ኔኤኮ ዹኮ ዑፆይዳ ዜርቂንቴኔ፤ ያኣፓ ዔያቶ ቡኩሳ ዓሲያኣ ባኣሴ። 19ኔኤኒ ጋፒ ማኣሳኔያታሢሮ ኔኤኮ ኪፆ ፓሣንዳ ዓሲ ባኣሴ፤ ሃይማኬ ጌይንቱዋ ኔኤኮ ጌኖ ማዻፓ ቶሊ ዓቴ ዓሲ ባኣሢሮ ኔጊዳ ማዺንቴ ባኮ ዋይዜሢ ቢያ ዎዛዺ ኩቺ ባዓንዳኔ።