Forhésgar kiyé nái
9Yala añára kii hoitám? Añára Yohúdi ókkol kí Beyohúdi ókkol or túaro beétor? Bilkúl no; añára toh age yó hoóilam, tamám Yohúdi ókkol edde Beyohúdi ókkol gunár kobzat asé. 10Zendilla pak-kalam ot asé,
“Forhésgar honókiye nái, ekzon úddwa nái;
11buz ola kiyé nái,
honókiye Allar talac no goré.
12Beggún manúc sóiyi ttu lorigiyói,
beggún ekku fúañti bigiṛigiyoi;
gom ham goré de honókiye nái,
ekzon úddwa nái.”
13“Ítarar muk fooñsa lac or kúla hobor or ḍóilla;
ítara nizor zire férokbazi goré,”
“Ítarar uñṭ ot háf or bic asé.”
14“Ítarar muk gozzobe furaiya; ítarar hotát honó miṛá nái.”
15“Kún gorí bolla ítara duñri zaa;
16ítara zeṛé zaa héṛe dónco edde mosibot foida goré.
17Cánti góri tákar rasta ítara no siné.”
18“Ítarar dil ot Allar honó ḍoor nái.”
19Yala añára zani de, Córiyote ziín hoó híin uitará re beh hoó zetará Córiyot or tole asé; zeéne honó insán ottu hoibár kessú no táke, aar fura duniyai ttu Allar hañse ísafkitab diya fore, 20kiyólla-hoilé Córiyot amól gorí honó insán Íbar nozor ot forhésgar no ṭóoribo, kiyólla-hoilé Córiyot or duara toh gunár zankari éna aiyé.
