पौलुसान त्रोआस माय सेवली वार बेट केरनो
7जेवी आमु एप्तान पेल्ले दिह हांज पोर रूटो खाणेन केरता एकठा एना। तेवी पौलुस ता हिऱ्यो आदि रात वोर ता हिऱ्यो वातु किरते रिनो, काहाकाय दिहरे दिह जाण्यो ईतो केरीन पौलुस आदि रात वोर हिकवोण दिते रिनो। 8जी उपेरली खोली माय आमु टोलवायेल एता, ताहरी जुलूम होवटा दिवा हेलेगताला। 9एने युतूखुस नावान एक जुवान खिड़की हिऱ्यो बोहीन बारी निंद से डोलाणे बाजरियेल ईतो, जेवी पौलुस जुलूम वार वोर बोलते रिनो, ते ताह निंद आव लागी, एने तो तिसरी खोली पोर रेन जाय पोड़नो। एने जेवी ताह उगाड्या, तेवी तो मुरेल ईतो। 10पुण पौलुस बुंदे उतरीन ता हिऱ्यो विलगी गीयो, एने गेले मिलीन केयो, “बिवो मा; काहाकाय ज्यो उंजु जीवतालोच हे।” 11ओवतो पौलुस उपेर गीयो रूटो मुड़ीन खादो, एने ता हिऱ्यो उठ्यान वेगोच वोर वातु किरते रिनो, ओवतो ता रेन पौलुस जात रिनो। 12एने ता जुवानाह ता जीवतालो लावा एने ताह जुलूम उत्साह जुड़नो।
