यीशुन जीव उठणो
(मरकुस 16:1-10; लुका 24:1-12; योहान 20:1-10)
1विहेवणेन दिह्यान पासाण एप्तान पेल्ले दिह, उजालो एतास, मरीयम मगदलीनी एने दिहरी मरीयम माहणाह देखणे आवी। 2एने उचकाहुच मुठलो बुकम्प ईनो, काहाकाय मालीकान एक दुत हेरगा माय रेन उतऱ्यो, एने माहणान आहने आवीन ता देगड़ाह सिटो केर दिनो, एने ता पोर बोह गीयो। 3तान वेह विजलीन गेत, एने तान फाड़का बोरफान गेत, दोवल्या एता। 4ताह बिन राखवाल्या काप उठना, एने बेसुद एय गीया।
5हेरोगदुत बायकुह केयो, “बिहो मा, माहु मालुम हे तुमू खुरूसखाम पोर चेड़ायेल ता यीशुह होदत्युह। 6तो न्या नाह सुतो,” पुण तो वचन कियेल तिहे, “जीव उठेल हे,” आवो ज्यो जागो दिखो, जा मालीकान देड़ एतो, 7पुण तुमू जावो, तान चेलाह किवो काय तो मुरेल माय रेन जीव उठेल हे, एने तुमूह रेन पेल गेलील माय जाथे, एने ताह ता दिखहो, मी तुमूह केय दिनो।
8त्यु बिय माय एने मोटली खुसी माय माहणान जागे रेन तुलेचबूखे वोलीन तान चेलाह खुबेर देणेन केरता दोवड़ीन जात रेन्यु।
9तेवी यीशु त्युह मिलानो, एने केयो, “तुमूह हुक जुड़ी,” त्यु आहने आव्यु एने यीशुन पाया पोड्यु। 10तेवी यीशु त्युह केयो, “बिहो मा,” मारा बायह्याख जाईन किवो, “काय गेलील माय जात रेय, ता माहु देखती।”
