दिहरान फायदो किरो
1आपु जा ताकेतवोर हेते, ता आपणा हुका उगे नाह देखता कोमजोरान कोमजोरीह वेठी। 2आपणे माय रेन एकेक जाण आपणा आहेंल्याह तान बोलाय ने केरता खुस केरी काय तान बोरहा माय उन्नती एय। 3काहाकाय मसी बी सोतान हुका उगे नाह दिख्यो, पुण जीहे लिखेल हे: “तार चिहटा केरनारे किरेल चिहटा मार पोर आवी।” 4जोल्युक वातु पेलुस रेन लेखायेल, त्यु आपणीस हिक ने केरता लेखाय जायेल हे काय आपु दिर एने पुस्तेक प्रोत्साहन द्वारा आसा मीले। 5एवी बोगवान जो दिर एने प्रोत्साहन आपेह, तुमूह ओहलो वरदान आपी काय तुमू यीशु मसीन गेत आपसाम एक मोन रिवो। 6काहाकाय तुमू एक मोन एने एक सुर माय आपणो मालीक यीशु मसीह आबाख बोगवानान बोड़ाय केरी।
7तानकेरता, जीहे मसी बोगवानान बोड़ायीन केरता तुमूह स्वीकार किरेल हे, तिहेस केरीन तुमू बी एका दिहराह स्वीकार किरो। 8तानकेरता मी केथु काय जा उकुम डायडायाह आपेल एता ताह मोजबुत केरनेन केरता मसी, बोगवानान खेरायीह देखाड़नेन केरता, यहुदि माणहान सेवक बोणी। 9एने बिगेर यहुदि बी किवीन वोजेसे बोगवानान बोड़ाय केरी; जीहे लिखेल हे, “तानकेरता मी जाती जाती माय तारो दन्यवाद केरूह, एने तारा नावान बजन गावुह।” 10पोशो तो किथे, “एय बिगेर यहुदि माणहे, तान माणहा हेऱ्या खुसी मोणावो।” 11एने उंजु किथे, “एय जाती जातीन आखा माणहे, मालीकान बोड़ाय किरो; एने एय राज राज ने आखा माणहे, तान बोड़ाय किरो।” 12एने उंजु यशाया किथे, “यीशेन एक मुल देखाय, एने बिगेर यहुदिन आदिकारी बोणनेन केरता उबरेय, ता पोर बिगेर यहुदि आसा मेलती।”
13एवी आसान बोगवान तुमूह बुरहो केरने माय पुरी खुसी एने सान्ती केरीन पुरो केरी, जाकेरीन चोखाला जीवान ताकेत केरीन तुमरी आसा वोदते जाय।
