बोरहान द्वारा देरमीपोणा
21पुण एवी नेमाह रेन आंगे बोगवानान तो देरमीपोणा देखायेल हे, जान गोवाय मुसान नेम एने जाणाव केरनार देतेह। 22मतलब बोगवानान तो देरमीपोणा जो यीशु मसी पोर बुरहो केरनेन द्वारा जुड़ेह तो आखा बुरहो केरनारान केरता हे, ता माय काय फारेक नाह। 23ज्यानकेरता काय आखा माणहे पाप किरेल हेते एने बोगवानान बोड़ायीह रेन सेटा हेते, 24पुण तान गीणी केरीन ता सुटकारान द्वारा जो यीशु मसीम हे, आखान आखा फुकेट माय देरमी ठेराय जातेह। 25यीशुह बोगवान तास ने लुयीम बोरहान द्वारा ओहलो प्रायश्चित बोली ठेरायो, जो बुरहो केरने से कार्यकारी ईथे, काय जा पाप पेल केराय गीया; एने जा पोर बोगवान तान सहनशीलता माय विहराव दिनो। तान बाराम तो तान देरमी पोणाह देखाड़ी। 26पुण ज्यीस टेम तान देरमीपोणा देखाय काय जाकेरीन तो सोताच देरमी ठेराय, एने जो यीशु पोर बुरहो केरी तान बी देरमी ठेरावणार जुवे।
27ताहार गोमेंड केरने काहरी हे? एने ज्यान गोमेंड केरनेन कारेण काय हे, नेमान पालेन केरने काय ज्य नाह सोतो? पुण ता पोर बुरहो केरने। 28तानकेरता आपु ज्या परिणाम पोर पोचतेह काय माणुह बोगवाना पोर बुरहो केरनेन द्वारा देरमी ठेराय जाथे, नाह काय कायदो पालेन केरनेन द्वारा। 29काय बोगवान फोक्तो यहुदिस ने हे? काय तो बिगेर यहुदिन बोगवान नाह? होव, बिगेर यहुदिन बी बोगवान हे। 30काहाकाय बोगवान एकुस हे, एने तो यहुदिह बोरहा केरीन एने बिगेर यहुदिह बी बोरहान द्वारा देरमी ठेरावी। 31ताहार ओवता काय आपु नेमाह बोरहान द्वारा बिगेर कामान ठेरावतेह? केदिस नाह! पुण बोरहान द्वारा नेमाह मोजबुत केरतेह।
