सोनान बछड़ो

(व्यवस्थाविवरण 9:6-29)

1जब लोगहन न देख्या की मुसाक बोयड़ा सी उतरने मा वार होय रोहली छे, ती हुये हारुन पास एकठा होईन कोहने लाग्या, “हेमी आमरे जुगु देवता बोनाव, जो हामरे ओगळ ओगळ चाले; काहकी उना मनुस मुसाक जुळ हामुक मिसर देश सि निकाळ ली आयो छे, हामु नी जानजे की काय हुयो?” 2हारुन न उना लोगहन सी कोयो, “तुमरा बायरा आरु पुरीया पारीन कानटा मा सोनान जे टुकरीया छे हेनुक निकाळु, आरु म्हार पास ली आवु।” 3ती सब लोगहन हेनका कानटा सी सोनान टुकरीयाक निकाळीन, आरु हारुन पास ली आया। 4हारुन न हेनका हात सी लीदो, आरु एक सांछा मा न्हाख्या, आरु एक बछड़ो क घोड़ीन बोनायो, तव लोगहन कोहने लाग्या, “हे इस्राएल, तारो परमेश्वर जुळ तुमुक मिसर देश सी छुड़ाय लायो छे, हुयो योत छे।” 5यो देखिन क हारुन न उना ओगळ एक वेदी बोनवाड़्यो; आरु यो पोरचार कोर्‌यो, “वाहने योहोवा क लीय पर्व होयसे।” 6आरु दिसरे दाहड़े लोगहन वेगात उठिन होमबली चोढ़ाया, आरु आगठान बली ली आया; ओळतेन बोठीन खादा पिदा, आरु गोळोत काम कोरने लाग्या।

7तब योहोवा न मुसा सी कोयो, “नेड़ो उतर जा, काहकी तारा पोरजान लोगहन, जेनको तु मिसर देश सी निकाळ लायु छे, त्या बिगोड़ गोयला छे; 8आरु जेनी वाटो पोर चालनेन हुकुम हांव हेनको आपलो हुतो उतवाळीया छुड़िन त्या एक बछड़ो घोड़ीन बोनाय लेदा, ओळतेन हेको वांद्या कोर्या, आरु हेका लीय बलीदान वी चोढ़ाया, आरु ओसा कोया, हे इसराएलीयो, तुमरो परमेश्वर जो तुमुक मिसर देश सी छुड़ाय ली आयो त्यो योत छे।” 9ओळतेन योहोवा न मुसा सी कोयो, “हांव एनु लोगहन क देख्यो, आरु सोमळ्यो, त्या एक होटीया छे। 10हेमी मेसे मा रुके, म्हार रीस हेनका पोर भड़क रोय, जीनासी हांव हेनको नाश कोरो; पुन तारेसी एक मोटो मुलुक बोनावीस।”

11तब मुसा आपसा परमेश्वर योहोवा असो कोहीन रावन्या करने लाग्यो, “हे योहोवा, तारी रीस आपसा लोगहन पोर काहा भोड़के, जेनको तु मोटा सामर्थ्य आरु ताकोतवाळ हातोन लारे मिसर देश सी निकाळ लावलो छे? 12मिसरी मानसे असो नी कोहने जुवे, ‘त्या हेनका भुंडा वीचार सी बोयड़ा मा दीन धोरती पोर सी बुरवनेन मोन सी निकाळ ली गुयो?’ तु आपसा भोड़ेकला रीस क हुगो कोर, आरु आपसा लोगहन को असो नुकसान कोरने सी बोदली जा। 13आपसा दास अब्राहम, इसहाक, आरु याकुब काजे फोम कोर जेनुसी तु आपसोत वायदो कोरीन कयो हुतो, हांव तुमरा ओवलीयादक वादळान सारका बेसका कोरीस, आरु यो आखो देश जेरी हांव वात कोर्‌यो छे तुमरा ओवलीयाद क आपीस की हुये उना होकदारीया होमीसा बोनला रोहे।” 14तब योहोवा आपनी प्रजा क हानी करने सीज ओक कोयो हुतो त्यो मन फिरायो।

15तब मुसा पोछफिरीन गोवा क दुयो तख्तियो क हात मा लीन बोयड़ा सी उतरी गोयो। हेनी तख़्तीयो क एन एने पोले दुयो ओख्ये लीख्यो हुयो हुतो, 16आरु हुयो पाटिया परमेश्वरन बोनावली हयी हुती, आरु हेनु पोर ज खुँदिन लीख्यो हुयो हुतो हुयो परमेश्वर क लीख्यो हुयो हुतो।

17जव योहोसु लोगहन को आयड़नेन सारका सोमवाय पोड़्या, तव त्यो मुसा सी कोयो, “छावनी सी लोड़ायनेन सारको बुल सोमवाये छे।” 18त्यो कोयो, “ओसो कयो जे बुल छे, नी ते जीतनेवाळा क छे, आरु नी हारनेवाळा क छे; मेसे ते गावने क बुल सोमवाये छे।”

19छावनी क धोड़े आवतात् मुसा क हुयो बछड़ो आरु नाचनो देखा पोड़्यो, ती मुसा क कोप भड़क उठ्‍यो, आरु हुयो तख्तिया क आपना हात सी बोयड़ा क नेचो नाखीन तुड़ नाखयो। 20तब हुये ओक बोनावला होया बछड़ा क लीन आगठा मा धोपाड़ देदो। आरु पीसकर झीनो झीनो कोर नाख्यो, आरु जळ क उपोर नाख देदो, आरु इसराएलीयो क ओक पिवाड़ देदो। 21तोत्यार मुसा हारुन सी कोहने लाग्यो, “एनु मानसो न तारो सात काय कोर्या की तु न ओक ओतरा मोटा पाप मा फोसाड़्यो?” 22हारुन न जोपाप आप्यो, “मारा पोरबु क रीसस न भोड़क; तु ते एनु मानसो क जाने छे की ये भुंडाय मा मोन लागाड़ला रोहे छे। 23आरु हुये मारसी कोय, आमरे जुगु देवता बोनाव ज आमरे ओगळ ओगळ चाले; काहकी हउये मानुस मुसा क, ज आमुक मिसर देश सी छुड़ावीन लायो छे, हामु नी जानता की काय होयो? 24तोत्यार हांव न हेरेसी कोयो, ‘जे जेरे पास सोनान क गोहना होय, हुये ओक निकाय लावे;’ आरु जब हुये मक हुये आप्या, हांवन ओक आगठा मा नाख देदो, तोत्यार यो बछड़ो निकऴ पोड़्यो।”

25मुसा देख्यो की हारुन न हेनु मानसो क ओसो बोदनाम नी आवे असो कोर देदो हुतो की हुये आपसा वीरोधियो क वीच मोजाक सारका होय गोया। 26ओक निरंकुश देखिन मुसा न छावनी क झोपला पोर उबो होईन कोयो, “ज काइ योहोवा क भिनी क छे हुयो मारे पास आवे;” तीत्यार आखा लेवी उना पास एकठा होया। 27हुये हेरेसी कोय, “इस्राएल क परमेश्वर योहोवा यो कोहे छे की आपना आपना सातळा पोर तलवार लोटकाड़िन तम्बु क एक झोपला सी दिसरे लोगुन फिरी फिरीन आपना आपना भास्यो, संगियो, आरु पड़ोसियो क मार देवु।” 28मुसा क एना बुल क ओनसारे लेवीयो न कोर्या; आरु हेने दाहड़े हजार क ओड़े धोड़े मानसे मोर गोया। 29ओळतेन मुसा न कोयो, “आज क दाहड़े योहोवा क लीय आपनो याजकपद क संस्कार कोरु, बाखुन आपना आपना पुर्या आरु भास्यो क वी वीरुद्ध होईन ओसो कोरु जेरेसी हुयो आज तुम क बोरकोत आपे।”

30दिसरे दाहड़े मुसा न मानसो सि कोयो, “तुम न मोटो पाप कोर्या छे। हेमी हांव योहोवा क पास चोहोड़ जाइस; सम्भव छे की हांव तुमरा पाप क पछतावो कोर सोको।” 31तोत्यार मुसा योहोवा क पास जाईन कोहने लाग्यो, “हाय, हाय, हेनु मानसो न सोना क देवता बोनावीन मोटो त पाप कोर्या छे। 32ते वी हेमी तु ओक पाप सोमा कोर - नी ते आपनी लीखली होयी कीपात मा सी नाव काट दे।” 33योहोवा न मुसा सी कोयो, “ज मारे वीरुद्ध पाप कोर्‌यो छे ओक नाव हांव आपनी कीपात मा सी काट दिस। 34हेमी तु जाईन हेनु मानसो क हेना जागा मा ली चाल जेरी वात हांवन तार सी कोर्‌यो हुतो; देख, मारो दुत तारे अगल अगळ चालसे। बाखुन जेने दाहड़े हांव मिवाई तेने दाहड़े ओक एना पाप क वी डोन आपीस।”

35एने: योहोवा न हेनु मानसो पोर पिड़ा नाख्यो, काहकी हारुन क बोनावला होया बछड़ा क हुयेत बोनाय माँगला हुता।