मसीह कुनीन पोर्य छे?
41जव फरीसि एखटा हुता, तो ईशु उन लोगहन सी पुछियो,
42“मसीह क बाराम तुमू काय समझो? त्यो कुनीन अवलियाद छे? त्या ओका सी कयो, दाऊद क पोर्यो।”
43त्यो उन लोगहन सी पुछियो, “तो दाऊद आत्मा मा हुईन उको पोरबु काय क कहवे?”
44“पोरबु, म्हार पोरबु सी कयो,
म्हार जेवड़ा तरफ बठ,
जव तक कि हाव थारा दुस्मन क थारा पाय की चौवकी नी कर देयम्।”
45“जव, दाऊद उको पोरबु कहवे, तो त्यो उको पोर्यो कसो बन्या?”
46उका जवाब मा कोय एक भी वात नी कय सकिया। बाकुन उना दिन सी कोय कि भी ओको सी पुछने करीन हिंमत नी हय।
