Abulamu ankengalela Lutu
1Chikahi chenihechi, nkolongwa Amulafeli wa ku Shinali, nkolongwa Alioko wa ku Elasali, nkolongwa Kedolaoma wa ku Elamu, na nkolongwa Tidali wa ku Goimu, 2kwa papamu bhakapiti kukomana ngondo na Bela nkolongwa wa ku Sodoma, Bilisha nkolongwa wa ku Gomola, Shinabu nkolongwa wa ku Adima, Shemebeli nkolongwa wa ku Seboimu, na nkolongwa wa ku Bela, yani Soali. 3Bhakolongwa bhahanu bha kujomukela habha bhakalombanishi manjolinjoli ghabhu ku libondi la Sidimu, yani Bahali ja Mwinyu. 4Kwa chikahi cha hyaka komi na ibheli bhakabhi bhatawaliwa na nkolongwa Kedolaoma, nambu mu chaka cha komi na tatu bhakung'anambwike. 5Mu chaka cha komi na nchechi, nkolongwa Kedolaoma, na bhakolongwa bhabhakalombini naku bhakapiti kubhalapula Bhafelai ku inchi ja Ashitalosi Kanaimu, Bhazuzi mu inchi ja Hamu, Bhaemi mu inchi ja Shawe Kiliyasaimu, 6na Bhaholi mu inchi ja chitombi chabhu Seili, mbaka ku Eli Palani jejibhi pambipi na lipololu. 7Bhela, bhakakelawiki kunyuma mbaka ku Eni Mishipati, yani Kadeshi, bhakajilapwi inchi jokapi ja Bhaamaleki papamu na Bhaamoli bhabhakabhi bhatama ku Hasasoni Tamali.
8Panihapa nkolongwa wa ku Sodoma, na nkolongwa wa ku Gomola, na nkolongwa wa ku Adima, na nkolongwa wa ku Seboimu na nkolongwa wa ku Bela, yani Soali, bhakabhokiki kujenda kughapanga manjolinjoli ghabhu ku Libondi la Sidimu, 9nahuli bhakomanaje na Kedolaoma, nkolongwa wa ku Elamu, Tidali nkolongwa wa ku Goimu, Amilafeli nkolongwa wa ku Shinali na Alioko nkolongwa wa ku Elasali, yani bhakolongwa ncheche kwa bhakolongwa nhwanu. 10Libondi la Sidimu lakabhi litweli mabhomba gha lami, bhela bhakolongwa bha Sodoma na Gomola pabhakabhi bhatila ngondo, bhakajibhili monihomu, nambu bhangi bhakatilili ku itombi. 11Bhela, bhakolongwa ncheche bhala bhakatoliki hindu yokapi ya Sodoma na Gomola papamu na hilebhi yabhu yokapi, na kubhoka. 12Bhelabhela bhakuntoliki mateka Lutu, mwana waka ndongu waka Abulamu papamu na hindu yaki yokapi, kwa ndandi akabhi atama ku Sodoma.
13Mundu jumu joakatiliki, akapiti kumpekeha Abulamu Muebulania ubholu. Chikahi chenihechi Abulamu akabhi atama pambipi na mialoni ja Mamile, Mwamoli jola. Mamile akabhi ndongu waka Eshikoli na Aneli. Bhokapi abhabha bhakabhi bhajetanganile na Abulamu. 14Abulamu paakajowini kubha mwana waka nung'una waki atolakiki mateka, akabhalohiki bhandu mia tatu komi na nane bha munyumba jaki bhabhakabhi bhabholakiki kukomana ngondo, na kubhajengalela bhakolongwa nchechi bhala mbaka ku Dani. 15Chikahi cha ikilu Abulamu akabhaghabhiki bhandu bhaki mu mapogha nahuli abhalapulaje adui bhaki, akabhaweziki na kubhatopola mbaka ku muchi wa Hoba, ghoubhi upambala wa kungonde ja Damasko. 16Bhela, Abulamu akakelawi hindu yokapi yeyatolakiki, akunkengali Lutu na hindu yaki, papamu na akambomba na bhandu bhangi.
