ጾሳ አሳይ ሸምፑዋ ደማና
7ሄዋ ድራዉ፥ ጌሻ አያናይ ሀዋዳን ያጌ፤
“ጾሳ ቃላ ህንተንቱ ሀቼ ስስያባ ግዶፐ፥
8-9ህንተንቱ አዎቱ ታዉ እጽ ማካሊደ፥
ኦይታሙ ላይ ታ ኦሱዋ በኤዳ ባዙዋ ፓጭያ ጋላሳዳን፥
ህንተንቱካ ዞርያ አከናን እጾፕተ።
10ሄዋ ድራዉ፥ ታን፥
ሄ አሳ ሀንቀታደ፥
‘ኡንቱንቱ ኡባ ዎደ ባረንቱ ዎዛናን ባሊኖ።
ታ ኦግያካ ኤርበይክኖ’ ያጋድ።
11ሄዋዳንካ ቃይ፥
ታን ሀንቀታ ጫቃደ፥
‘ታን ሸምፕያ ሳ ኡንቱንቱ፥
ኡባካ ገልክኖ’ ያጋድ”
ያጌ።
12ታናዳን አማንያዋንቶ፥ ደኡዋ ጾሳፐ ህንተንታ ሻክያ ኢታ አማነና ዎዛናይ ህንተናን ኦናንነ ደኤና ማላ ናገትተ። 13ሽን ጾሳይ ህንተንታ ኡባ ጋላስ ሀቼ ጊደ ጼስሽን፥ ህንተፐ ኦናነ ናጋራይ ባለና፥ ዞርያ አከናን እጸና ማላ፥ እቱ እቱዋ ዞርተ። 14አያዉ ጎፐ፥ ኑን ኮይሮ ኑዉ ደእያ አማኑዋ ዉርሰይ ጋካናዉ ሎይ ናጎፐ፥ ክርስቶሳና እትፐ ሻካና። 15ጾሳ ማጻፋይ፥
“ጾሳ ቃላ ህንተንቱ፥
ሀቼ ስስያዋ ግዶፐ፥
ሄ ዎደ ኡንቱንቱ እጽ ማካሌዳዋዳን፥
ዞርያ አከናን እጾፕተ”
ያጌዳ።
16ጾሳይ ግያዋ ስሲደ፥ አዉ ማካሌዳ አሳቱ ኦኔ? ሙሴ ግብጼፐ ካለና ከሴዳ ኡባቱዋ ግድክኖዬ? 17ጾሳይ ኦይታሙ ላይ ኦናን ሀንቀቴዴ? አሃይ ዎራን አቴዳ አሳቱዋ፥ ናጋራ ኦዳዋንታ ግድክኖዬ? 18ቃይ ጾሳይ ባረዉ አዛዘተናን እጼዳዋንቱ እ ሸምፕያ ሳኣ ኡባካ ገለና ማላ፥ ኡንቱንቶ ጫቄዳዋፐ አትን፥ ኦስ ጫቄዴ? 19ኡንቱንቱ አማንቤና ድራዉ፥ ሸምፕያ ሳ ገላናዉ ዳንዳይቤናዋ ኑን በኤቶ።
1ስም ጾሳይ ኑና ባረ ሸምፕያ ሳ፥ “ገልሳና” ጌዳዌ ብራ ግዶፐ፥ ህንተፐ ኦንነ ሄ ሸምፕያ ሳ ገለናን አተና ማላ ናገቶ። 2አያዉ ጎፐ፥ ኡንቱንቱ ዎንጋላ ምሽራቹዋ ስሴዳዋዳን፥ ኑንካ ስሴዶ፤ ኡንቱንቱ ስሴድኖ፥ ሽን አማኒደ አክቤና ድራዉ፥ አይነ ኡንቱንታ ጎእቤና። 3ግዶፐካ፥ ጾሳ ኪታይ ሳአይ መቶደፐ ዶምና ፖለቴዳዋ ግዶፐነ፥ ጾሳይ፥
“ታን ሀንቀታ ጫቃደ፥
‘ኡንቱንቱ ታን ሸምፕያ ሳ
ኡባካ ገልክኖ’ ያጋድ”
ጌዳዋዳን፥ ኑን አማኔዳዋንቱ እ ሸምፕያ ሳ ገላና። 4አያዉ ጎፐ፥ ላፑን ጋላሳባ እትሳን ጾሳ ማጻፋይ፥ “ጾሳይ ላፑን ጋላሳን ባረ ኦሱዋ ኡባፐ ሸምፔዳ” ያጌዳ። 5ቃይ ሄ ሳኣን፥ “ኡንቱንቱ ታን ሸምፕያ ሳ ኡባካ ገልክኖ” ያጌዳ። 6ዎንጋላ ምሽራቹዋ ኮይሮ ስሴዳዋንቱ አዛዘትቤና ድራዉ፥ ሸምፑዋ ሳኣ ገልበይክኖ፤ እት እት አሳቱ ያ ገላናዋንቱ ደኢኖ። 7ጾሳይ ዳሮ ዎድያፐ ጉይያን፥ ዳዊታ ባጋና ላኤንዋ እት ጋላሳ፥ “ሀቼ” ግያ ቃላን ኬሪደ፥
“ጾሳ ቃላ ህንተንቱ ሀቼ ስስያዋ ግዶፐ፥
ዞርያ አከናን እጾፕተ”
ያጌዳ። 8ጾሳይ ሸምፕያ ሳ አሳ አፊደ ኢያሱ ሸምፕሴዳዋ ግድንቶ፥ ጾሳይ ሀራ ጋላሳዋ ጉየ ኬረና። 9ሄዋ ድራዉ፥ ጾሳ አሳዉ ሳምባታ ሸምፑ ናገት ኡቴዳ። 10አያዉ ጎፐ፥ ጾሳይ ሸምፕያ ሳ ገልያ ኦንነ፥ ጾሳይ ባረ ኦሱዋፐ ሸምፔዳዋዳን፥ እካ ባረ ኦሱዋፐ ሸምፓና። 11ስም እስራኤልያ አሳይ አዛዘተናን እጺደ፥ ጾሳና እትፐ ሸምፕያ ሳ ገለናን አቴዳዋዳን፥ ኑፐ ኦንነ ሄዋ ማላ ኤኖ ጌናን እጹዋን ያ ገለናን አተና ማላ ምኖይተ።
12አያዉ ጎፐ፥ ጾሳ ቃላይ መናዉ ደእያዋኔ ኦያዋ፤ ላኡ ባጋና ሌፈቴዳ ማሻፐካ አደ ኩሴ። ሄ ቃላይ ሸምፑነ አያናይ፥ ኩሪነ ኮልዚ እትፐ ጋከትያሳ ሻካና ጋካናዉ ጫዴ። ቃይ አሳ ዎዛናን ደእያ ኮሻነ ቆፋ እ ሻኬ። 13ኑን ኦያዋ ዎችያ ጾሳ ስንን ኡባባይካ ቤትያዋፐነ ቆንጭያን ደእያዋፐ አትን፥ አ አይፍያን ጌምያ መታይ አያይነ ባዋ።
