ማሮተ ላይ
8“ ‘ላይቱዋ ግዶን ደእያ ላፑን ሳምባታቱዋ ፓይዳ፤ ላፑን ሳምባታቱዋ ላይ ፓይዱ ላፑ ገደ ላፑና፤ ሄዌካ ኦይታማነ ኡዱፑን ላይ። 9ሄዋፐ ጉይያን፥ ላፑን አግናን፥ ታማን ጋላሳን ቦንቼትያ ናጋራ አቶ ጊስያ ጋላሳን ማላካታ ፑንያ አሳ ህንተ ጋድያን ኡባን ኪትተ። 10እሻታማን ላይ ዱማዪደ፥ ሄ ጋድያን ደእያ ኡባዉ ላአተ አዋይተ። ሄዌ ህንተንቶ እሻታማን ላይ ባላ። ሄ ዎድያን ህንተ ኡባይካ ህንተ ጋድያዉነ ህንተ ያራዉ ያራዉ ስምተ። 11ሄ ላይይ ህንተንቶ እሻታማን ላይ ባላ። ሄ ላይን ዘሮፕተ፤ አዛባ ግዲደ ሞኬዳዋካ ጫኮፕተ፤ ቃይ ህንተ አ ጼራ ጹንቀናን አይፌዳ ዎይንያ አይፍያካ ሺሾፕተ። 12ሄዌ እሻታማን ላይ ባላ ግድያ ድራዉ፥ እ ህንተንቶ ጌሻ፤ ጎሸናን ጮ ደምባን ሞኬዳዋ ሚተ።
13“ ‘ሀ እሻታማን ላይ ባላ ዎደ አሳይ ኡባይ ባረ ጋድያ ስሞ።
14“ ‘ህንተ ህንተ ሾሩዋፐ ጋድያ ሻሞፐ፥ ዎይ ቃይ አዉ ዛልኦፐ፥ እቱ እቱዋ ጭሞፕተ። 15ህንተ እሻታማን ላይ ባላፐ ጉይያን ደእያ ላይቱዋ ፓይዱዋዳን ህንተ ሾሩዋፐ ሻምተ፤ ህንተ ሾሩካ ቃይ ጋዲ ካ ሞካናዉ ደእያ ላይቱዋ ፓይዱዋዳን ዛልኦ። 16ላይቱዋ ፓይዱ ዳሮ ግዶፐ፥ ጋቲ ዳሬ፤ ላይቱዋ ፓይዱ ጉጾፐ፥ ጋቲካ ጉጼ። አያዉ ጎፐ፥ ህንተ ጫካና ካ ጫካ ፓይዱዋዳን ህንተ ሾሩ ህንተንቶ ዛልኤ። 17ህንተ እቱ እቱዋ ጭሞፕተ፤ ሽን ህንተ ህንተ ጾሳዉ ያይተ። ታን መና ጎዳይ፥ ህንተ ጾሳ።
