ሀች ሀች ደኦ ማድያ ትምርትያ
1ታ ናአዉ፥ ኔን ሚሻ ታልኤዳ ነ ሾሮ ዋሰ ገሌዳዋ ግዶፐ፥ ኔን ኤረና ኡራዉ ነ ኩሽያ ባቃደ ገፔዳዋ ግዶፐ፥ 2ኔን ገፔዳ ገፋ ግትያን ገሌዳዋ ግዶፐ፥ ነ ዶናፐ ከሴዳ ቃላን ኦይቀቴዳዋ ግዶፐ፥ 3ስም ኔን ነ ሾሩዋ ኩሽያን ገላዳ። ሄዋ ድራዉ፥ ታ ናአዉ፥ ሄዋፐ ከሳናዉ ኮዮፐ፥ ኤለ ነ ሾሩዋ ጎለ ባ፤ ዋሰተ እ ነ ቦላፐ ዎና ማላ፥ አዉዳሻደ አ ዎሳ። 4ሀዋ ኦናን ደኣደ ገምእሾፓ፤ ሸምፑዋካ ሸምፖፓ። 5ሻንካንቻቱዋፐ ገንአታ ከሳ አክያዋዳን፥ ዳባፐ ካፋታ አትያዋዳን፥ ነ ሁጲያ አሻ።
6ኔኖ አዛላዉ፥ ቃጮቱዋኮ ባ፤ ኡንቱንቱፐ ታማራ። ያቲደ አዳ ኤራንቻ ግዳ። 7ቃጮቱዋ ኦስሳናዉ፥ ካፑ ዎይ ኡንቱንታ ሞድያዌ ባዋ፤ 8ሽን ባረንቶ ማናባ ቦንያን ምንጂኖ፤ ካ ጫክያ ዎደካ ባረንቶ ኮሽያ ቁማ ሺሺኖ። 9ኔኖ አዛላዉ፥ ኔን አዉደ ጋካናዉ ገምእሻይ? ነ ገምእሹዋፐካ አዉደ ደንዳይ? 10ኔን ቃይካ ጉ ግሳሳ፤ ጉ ገምእሻሳ፤ ኩሽያ ሺሻ አካደ፥ ጉ ሸምፓሳ። 11ያትያ ዎደ ህዬሳተይ ፓንጋዳን፥ ፓጫይ ኦላ ሚሻ ኦይቄዳ አሳዳን፥ ነ ቦላ ያና።
12ኢታ አሳይነ ባላ አሳይ፥ ዩይ ዩዪደ ዎርዱዋ ኦዴ፤ 13እ ባረ አይፍያን ስምኤ፤ ባረ ገድያን በሴ፤ ባረ ብራያን ጾርሴ። 14አ ዎዛናን ጌላተይ ደኤ፤ እ ኢታባ ቆፔ፤ ኡባ ገደካ እ ዋላሳ መ። 15ሄዋ ጋሱዋን ባሻይ አኬከናን አ ቦላ ያና፤ እ ሀሳየናን መአና፤ መኢደካ ፓጸና።
16መና ጎዳይ እጽያ ኡሱፑን የዎቱ ደኢኖ፤ እ ላፑንያዋ ኢስ እጼ:
17ካደ ጼልያ አይፍያ፥
ዎርዶትያ እንጻርሳ፥
ጌሻ አሳቱዋ ሱ ጉስያ ኩሽያ፥
18ኢታባ ማቂያ ዎዛና፥
ኢታባኮ ኤሌሊደ ዎጽያ ገድያ፥
19ዎርዱዋ ቦላ ዎርዱዋ ጉጅ ጉጂደ ኦድያ ዎርዶ ማርካ፥
እሻቱዋ ግዶን ዋላሳ መያ አሳ።
