मंडळी नो चाकर्यो पोलुस
24हाव मे तीहयी वेला नी कारण सी खुस हयु, जे तमारी जुगु झेलु अने मसी ना दुख नी कमी तीना डील जुगु, मतलब मंडळी जुगु, आह़फा ना डील मे पुरी करु; 25जीनो मे भगवान ना तीहया जुगाड़ नी अनसारे चाकर्यो बण्यो जे तमारी जुगु मने ह़ोपलु से, के मे भगवान ना बोलु ने पुरा-पुरा परच्यार करु। 26मतलब तीहयी वात सुरुवात नी टेम सी ह़तायली री, पण हाव तीना तीहया भगवान ना चोखला माणहु पोर उजन्ती हयी। 27जीमनी पोर भगवान उजन्तो करवा हींड्यो के तीमने मालम हये के आड़जात्या मे तीहयी ह़तायली वात नी बड़ाय नी कीमत ह़ु से अने तीहयी आहयी से के मसी जे बड़ाय नी आह से तमारी मे रेय। 28जीनो परच्यार करीन आमु एक-एक माणेह ने चेतावणी आपया अने आखी अक्कल सी एक-एक माणेह ने ह़ीकाड़या, के आमु एक-एक माणेह ने मसी मे नामह़ाद्यो करीन भगवान अगळ हजुर करया। 29तीनीत जुगु मे तीनी तीहयी सक्ती नी अनसारे जे मारी मे ताखत भेळ बदलाव नाखे तन-मन लगाड़ीन मेहनत बी करु।
1मारु मन से के तमु जाण लेवो, के तमारी अने तीमनी जे लोदीकीया मे से, अने तीहया आखा जुगु जे मारो आहयी कळी मे नु मोडु नी देख्या मे केवी मेहनत करु। 2के तीमना मन मे सांती रेय अने तीहया मोंग सी एक-बीजा हेळ-मेळीन रेय, अने तीहया पुरी ह़मज नु आखु धन हात करे, अने भगवान बाह नी ह़तायली वात मतलब मसी ने ओळखी लेय। 3जीनी मे अक्कल अने ह़ीकापण ना आखा खजानु ह़तायला से।
4आहयु मे आनीन करते केम के कोय माणेह तमने लालच्याण वात सी भटकाड़वा नी जोवे। 5मे डील ना मान सी तमारी गेथो सेटो से, ते बी आत्मा ना मान सी तमारी ह़ाते से, अने तमारा कायदा नी अनसारे वेहवार अने तमारा भरहा नी जे मसी मे से टणकाय देखीन खुस हयु।
