भगवान नी ढाल
10करीन मालीक मे अने तीनी सक्ती ना बदलाव मे ताखत वाळा बणो। 11भगवान ना आखा हत्यार बांद लेवो के तमु भुतड़ा नी बुरी-चाल अगळ उबा री सको। 12काहाके अमारो आहयो झगड़ो, लोय अने माह सी नी हय, पण मुख्या ह़ाते अने अदीकार्या ह़ाते से, अने आहयी कळी ना अंदारलु ना डायला ह़ाते से, अने तीहया भुत नी आत्मा ना मेळा ह़ाते से जे वादळा मे से। 13करीन भगवान ना आखा हत्यार बांद लेवो के तमु गांडा दाड़ा नो वीरोद कर सको, अने आखु कंय पुरु करीन टेकला री सको।
14करीन सच्चाय सी काठी केड़ बांदीन, अने धरम नी ढाल पेरीन, 15अने पोगु मे मेळ नी खुस-खबर ने लागु करवा नी तीयारी ना खाहड़ा पेरीन। 16अने आहया आखाम नी ह़ाते भरहा नी ढाल लीन टेकला रेवो जीनी सी तमु तीहया वेरी ना आखा धपत्ला बीलखा ने ओलवी सको। 17अने छुटकारा ने टोपीन तेम पेर लेवो, अने भगवान ना बोल ने तलवार नी तेम जे आत्मा तमने आपे। 18आखी टेमे अने आत्मा मे वीन्ती, अने रावण्या करता रेवो, जागता रेवो अने हार ना मानो अने भगवान ना चोखला माणहु ना लेदे वीन्ती कर्या करो। 19अने मारी जुगु बी वीन्ती कर्या करो के मारी बोलवा नी टेमे एवो ताखत वाळो बोल आपे के मे हीम्मत सी खुस-खबर नी ह़तायली वात ने देखाड़ सकु। 20जीनी जुगु मे ह़ाकळ मे बंदायलो राजदुत से। अने आहयु बी के मे तीना बारा मे जेम मने जोवे हीम्मत सी बोल सकु।
