Waisiraeli wolomba wawe na mfalume
(Kumb 17:14-20)
1Samweli hayalalile, kawatenda iwanaghe wamale wawe walamtsi wa Isiraeli. 2Imwanaghe chaudele kakemighwa Yoweli, na wa keli kakemighwa Abiya. Wose weli wawa walamtsi wa Beeri Sheba. 3Lekeni iwana awo ng'awatendile baye ka aba wawo pfayatendile, chawabamile wawo wapate litobole. Wabokela hongo chinyelenyele na waghahigha pfihile ghamaghomba.
4Kuya wakulu wose wa Isiraeli wetingana hamwe, wamghendela Samweli ako Rama. 5Wamlongela, “Lola, ghweghwe sambi kulala na iwanagho ng'awotenda baye ka ghweghwe. Apfo tusaghulile mfalume wa kutulongotsa ka apfila pfatsili isi tsingi.” 6Lekeni mbuli ya Waisiraeli ya ukubama weng'ighwe mfalume wa ukuwalongotsa, Samweli ng'ayonile baye ka inogha. Naye kamlomba IMNDEWA. 7Na IMNDEWA kamlongela, “Tegheletsa chila chinu iwanu chawokulongela, kwaapfila ng'awakulemile ghweghwe baye, ila wandema nene nileke kuwa mfalume wawo. 8Ka pfawanitendele nene kulawa haniwalapfile Misiri, mbaka leloli, wandeka na wotambikila milungu ingi. Na wokutendela ghweghwe aghala ghawanendele nene. 9Lekeni wategheletse, na uwakanye ghendo, na walongele mwatsimwatsi imfalume yatsowalongotsa ghayatsowabama wamtendele.”
10Naye Samweli kawalongela iwanu awala iwabamile weng'ighwe mfalume, aghala ghose IMNDEWA ghayamlongele. 11Kawalongela, “Apfi pfipfo mfalume wenu iyatsowalongotsa pfayatsowatendela. Katsowasola iwanenu wamale na kuwatenda wawe wakwendesa mituka yake ikweghighwa na wafalasi, na wangi wawe wakwila falasi wake, na wangi watsomkinga kwa ukutsuma hambele ha ghumituka ghwake ighukweghighwa na wafalasi. 12Katsowasaghula iwanu wangi wawe wakulu iwolongotsa iwanu wake elufu imwe wa ing'ondo, na wangi wawe wakulu iwolongotsa wanu hamsini wa ing'ondo. Wangi watsomlimila mighunda yake na kumpfunila ipfijo pfake. Katsowatenda iwanu wangi wamtendele tsisilaha tsa ing'ondo na wangi wamtendele ipfinu pfa imituka yake. 13Katsowasola iwana wenu wapinga wawe iwotengenetsa mapfuta ighonung'ila, na wangi iwomwambikila ipfijo, na iwomwokela pfighate. 14Katsoisola imighunda yenu inoghile, iwe mighunda yenu ya ipfijo, iwe mighunda yenu ya mitseituni, na mighunda yenu ya minzabibu na kuweng'a watumwa wake. 15Katsosola fungu lya kumi mna ipfijo pfenu, na tsabibu tsenu, na kuweng'a iwakulu wake, na watumwa wake. 16Katsowasola watumwa wenu wamale na mapinga, na ng'ombe na pfihongwe wenu iwanoghile ghendo na kuwatenda wamsang'anile. 17Katsosola fungu lya kumi mna imifugho yenu, namwe mtsakuwa watumwa wake. 18Ghamatsuwa agho, mwemwe mtsolila kwa ghamaghayo ghamtsopata kulawa kwa mfalume yamwisaghulile mwemwe muwenyegho, lekeni IMNDEWA ng'atsowedika baye.”
19Iwanu ng'awamtegheletse baye Samweli, walonga, “Baye! Twobama tuwe na mfalume, 20ili na twetwe tuwe ka isi tsingi. Mfalume wetu yatulongotse na kututowela mna tsing'ondo tsetu.” 21Samweli hayahulike ghose ghawalongile, naye kaghenda kumlongela IMNDEWA. 22IMNDEWA kamlongela Samweli, “Wategheletse na uwasaghulile mfalume.” Kuya Samweli kawalongela Waisiraeli woye ukaye, chila munu ukaye yake.
