Yonasani kakoneka kana totso
24Litsuwa alila, Waisiraeli tsawaghanzika ng'ani kwaapfila Sauli kawalighita iwanu, kalonga, “Munu wowose iyatsakuja chijo ng'ana litsuwa liswe na ng'ana niwatowe iwanu wangu iwonihila, ayo yalighitighwe.” Apfo tsuwa lyose kuduhu imunu iyajile chijo chochose. 25Na iwanu wose hawengile mna ghumuhulo tsawona uki wodwena chila hanu. 26Ila haduhu munu iyajile uki awo kwaapfila tsawapfuka ukulighitighwa akula kwawalighitighwe.
27Lekeni Yonasani ng'amhulike baye aba wake ahala hayawalighite iwanu. Apfo kasola ng'weku kaipfabika mna lisegha lya uki, kuya kaja uki awo. Na baho kapata ngupfu. 28Baho munu yumwe kamlongela, “Aba wako kawalighita iwanu kalonga, ‘Imunu wowose iyatsakuja ichijo leloli, ayo yalighitighwe.’ ” Apfino pfipfo iwanu pfawatsilike.
29Yonasani kalonga, “Aba wangu kawadununza iwanu. Lelo nene nina ngupfu kwaapfila ndiya uki auno chidogho. 30Iwanu wetu wang'ajile chidogho leloli kulawa mna ipfinu pfawabokile kwa awala iwowahila, tung'apatile ngupfu na Wafilisti wengi wang'akomighwe.”
31Litsuwa alila, Waisiraeli wawatowa Wafilisti kulawa Mikimashi mbaka Aiyaloni. Lekeni waghendelela bila kuwa na ngupfu kwaapfila tsawepfa ng'ani. 32Apfo watsumila ipfinu pfawabokile. Tsawawasola wang'olo, ng'ombe na ngo'mbe wadodo, wawasubutula, waja inyama na idamu. 33Iwanu wangi wamlongela Sauli, “Lola iwanu womtotsela IMNDEWA kwa ukuja inyama ine idamu.”
Sauli kawalongela iwanu, “Mwemwe mtenda pfihile, bimbiliseni libwe kulu litse ahano hana nene.” 34Kuya kawalongela, “Ghendeni mkawalongele iwanu wose wangalile ahano wang'ombe wawo au wang'olo wawo, wawasubutule na kuwaja ahano. Waleke kumtotsela IMNDEWA kwa ukuja inyama ina idamu.” Apfo chilo achila tsawawaghala aho wang'ombe wawo na wawasubutula baho. 35Sauli tsakamtsengela IMNDEWA matsabahu. Ayo tsaikala matsabahu ya mwanduso Sauli iyamtsengele IMNDEWA. 36Kuya Sauli kawalongela iwanu, “Lelo nechilo tukeni tuwawinze Wafilisti, tukawapfamile na kuwaboka tsimali tsawo mbaka nemitondo, na tuleke kumleka munu wowose yawe mghima.”
Iwanu wamlongela, “Tenda chochose chaukwona chinogha.” Lekeni mtambika kawalongela, “Leka tanu tumghutse IMNDEWA.”
37Apfo Sauli kamghutsa IMNDEWA, “Pfihi ng'ende kuwatowa Wafilisti? Apfi kutsotutenda tuwahume Wafilisti?” Lekeni IMNDEWA ng'amwidike baye mna tsuwa alila. 38Kuya Sauli kalonga, “Mtse ahano mwe muwakulu ili tulole nzambi yachi itendighwe leloli. 39Nelaha kwa IMNDEWA iyali mgima na iyoikombola isi ya Isiraeli, hata ka imwanangu Yonasani, ayo yakomighwe.” Lekeni kuduhu munu iyalongile chinu. 40Apfo Sauli kawalongela Waisiraeli wose, “Mwemwe mwose mwime akula, kuya nene na mwanangu Yonasani tutsakwima akuno.” Wawo wamwidika, “Utende chochose chaukwona chinogha.” 41Sauli kalonga, “Ghwe IMNDEWA wa Isiraeli, hebali ng'unyidika baye nene mtumighwa wako? Ghwe IMNDEWA wa Isiraeli, ka yanitotsile nene au mwanangu Yonasani, lelo ulamle kwa libwe lya Urimu. Lekeni ka iwatotsile iwanu wako wa Isiraeli, ulamle kwa libwe lya Thumimu.” Apfo Yonasani na Sauli woneka watotsa, lekeni iwanu woneka ng'awatotsile baye. 42Kuya Sauli kalonga, “Haya lelo utowe simbi tsitulamle nene na mwanangu Yonasani, tulole yatotsile nani.” Na ghamabwe ghalangusa, iyatotsile Yonasani. 43Baho Sauli kamlongela Yonasani, “Nongele chautendile.” Yonasani kamwidika, “Tsandiya uki chidogho kwa ng'weku yangu. Lelo nobamighwa nife.”
44Sauli kalonga, “IMNDEWA yanidununze ng'ani ka ghweghwe Yonasani ng'autsakufa baye.”
45Lekeni iwanu wamlongela Sauli, “Hebali Yonasani yakomighwe, imunu iyaitendile isi ya Isiraeli ihume ghendo? Baye! Twelaha kwa IMNDEWA iyali mghima, hata lumvili lumwe lwa litwi lyake ng'alutsolaghala hasi baye. Chayatendile leloli, katenda kwaapfila IMNDEWA kamwapfila.” Apfo iwanu wamkombola Yonasani naye ng'akomighwe baye. 46Kuya Sauli kaleka kuwawinza Wafilisti, nawo Wafilisti woya kuna isi yawo.
