Yonasani komwapfila Daudi
1Kuya Daudi katsuma kulawa Nayoti ako Rama, kaghenda mbaka kwa Yonasani, kamghutsa, “Angu nitendile choni? Apfi chanitotsile choni ghendo? Nimtendile choni aba wako mbaka kobama yang'ome?”
2Yonasani kamwidika, “Mbe! Ng'utsakufa baye. Aba wangu konongela lyolyose lyayobama ukutenda, liwe kulu au dodo. Hata alino ng'odaha baye kunipfisa. Si pfipfo baye ka pfaulonga.”
3Lekeni Daudi kelaha, kalonga, “Aba wako komanya ghendo apfila pfaunikunda, naye ng'obama baye ghweghwe umanye achila chayobama kutenda, kwaapfila kutsakona usungu. Nelaha kwa IMNDEWA, na kuna ghweghwe ka ukufa kwangu kwahabehi ghendo.”
4Yonasani kamlongela, “Chochose chaubama nene nitende, nitsokutendela.”
5Daudi kamlongela, “Ilupfi kuna ichihungo cha ukwima ghumwetsi, nene nobamighwa ndiye hamwe na mfalume. Lekeni ndeke nikepfise ako kumghunda mbaka ikacha nemihe. 6Aba wako yang'akughutsa nilikwani, mlongele kanidedetsa yaghende ukaye yake Betilehemu, yakalapfe nambiko ya chila mwaka hamwe na iwanu we ikaye yake. 7Aba wako yang'alonga, ‘Pfinogha,’ baho umanye nene mtumighwa wako nihona, lekeni yang'ona maya umanye ghendo yeye tsakabama yandaghe. 8Chondechonde nendele ghanoghile, kwaapfila twilaghana hambele ha IMNDEWA nene na ghweghwe twa sale. Lekeni ka nene nitotsa ghweghwe ung'ome ghumwenyegho, heule unighale kwa aba wako yakanikome?”
9Yonasani kamwidika, “Uleke ukwalangula apfo. Ning'amanyile ghendo ka aba wangu tsakabama yakulaghe, ng'ambe nene ning'akulongele!”
10Kuya Daudi kamghutsa, “Nani yatsonongela ka aba wako katsokwidika kwa ukukembela?”
11Yonasani kamwidika, “Tuke kumghunda!” Apfo wose weli tsawaghenda kumghunda. 12Yonasani kamlongela Daudi, “IMNDEWA, Imulungu wa Isiraeli yawe mkalangama wetu. Ilupfi au ikacha, chipindi ka achino nitsomghutsa aba wangu, na nitsokulongela ka yana choni na ghweghwe. Yang'alonga mbuli tsako pfinoghile, nene nitsotuma munu yakulongele. 13Lekeni ka kobama kukulagha, na ka nene sikulongela baye udahe kutsumila kutali ili uleke kukomighwa, IMNDEWA yandaghe na yang'ome ghendo. IMNDEWA yakale hamwe naghwe ka pfayali hamwe na aba wangu. 14Ning'aghendelela kuwa mgima, ulikinde laghano lyetu lyatwikile hambele ha IMNDEWA, nene ndeke ukufa, lekeni ning'afa, 15ghweghwe ughendelele kuwa mluso kwa iwanu iwali hakaye yangu, hata ahala IMNDEWA hayatsowakoma maadui wose wa Daudi iwali muisi.” 16Kwa uketenda apfo Yonasani kelaghana na iwanu iwali akaye ha Daudi, kalonga, “IMNDEWA yawakome wose iwomwihila Daudi.”
17Naye Yonasani kamlongela Daudi yelahe keli, ka katsoghendelela kumkunda yeye, kwaapfila Yonasani tsakamkunda Daudi ka pfayekunda imwenyegho. 18Kuya Yonasani kamlongela Daudi, “Ilupfi kuna ichihungo cha ukulawa kwa lwetsi, iwanu watsotanga ghweghwe ng'uli baho baye, kwaapfila chighoda chako chakuwa chahela munu. 19Ikacha, haipfika nemihe, ghenda hanu ahala haulongole kwipfisa, wipfise kuchughu kuna lilundo lya ghamabwe. 20Nene nitsakwasa mishale midatu mmbalimbali mwa libughulu alyo, ka apfila nolenga chinu. 21Kuya nitsomtuma mtumighwa wangu yaghende kubama imishale ayo. Ning'amlongela, ‘Lola, imishale ya ubali wako auno, uisole,’ baho kutsomanya ka ghweghwe kuhona, naghwe kutsolawa hanu hawipfisile, kwaapfila nelaha kwa IMNDEWA iyali mghima ka kutsakuwa mghima, na kuduhu ichikutenda ukomighwe. 22Lekeni ning'amlongela, ‘Lola, imishale ya hambele hako,’ baho ulawe uke, kwapfila IMNDEWA kokubama utsume kutali. 23Kwilaghana akula kwatwilaghane ghweghwe na nene, IMNDEWA naye kotulolesa tulikinde lilaghano alyo lya ghamatsuwa ghose lyatwikile.”
24Apfo Daudi tsakepfisa kumghunda. Chihungo cha ukwima ghumwetsi hachipfikile, mfalume Sauli katsa ukuja. 25Mfalume Sauli tsakakala mna ichighoda chake ichaghamile ubanda, ka apfila pfayakalagha. Yonasani kakala akuno kelolesa na mfalume, naye Abineri kakala habehi na mfalume. Lekeni ichighoda cha Daudi tsachahela munu. 26Litsuwa alyo, Sauli ng'alongile chinu chochose baye, kwaapfila tsakalangula apfino, “Kuna chinu chimlawila Daudi, nacho chimtenda yehe ghendo, na yaleke kutsa kuna ichihungo.” 27Ilupfi yake, tsuwa lya keli lya ichihungo cha ukwima ghumwetsi, ichighoda cha Daudi ching'ali chahela munu keli. Baho Sauli kamghutsa mwanaghe Yonasani, “Heule Daudi mwana wa Yese, digholo wala leloli ng'atsile ukuja baye?”
28Yonasani kamwidika, “Daudi kanidedetsa ghendo nimleke yaghende Betilehemu. 29Tsakanongela, ‘Ndekelele ng'ende kwa ndughu tsangu, kwaapfila wawo wolapfa tambiko ako ukaye, na ndughu yangu kambama ng'ende. Apfo ka konitogholela, ndekelele ng'ende kwa ndughu tsangu.’ Achi chicho ichimtendile yaleke kutsa hana ichijo cha mfalume.”
30Aho Sauli kamwonela maya sideke Yonasani, kamlongela, “Ghweghwe imwana wa ipinga yehile na chiweghe! Angu nene sipfimanyile baye ka ghweghwe na imwana wa Yese mwa chinu chimwe? Ghweghwe kweghela mwenyegho ichinyala, na komghela chinyala wenye wako iyakweleke! 31Apfi ng'upfimanyile baye ka Daudi yang'awa mghima, ghweghwe ng'udaha baye kuwa mfalume wa isi aino? Lelo ghenda na ungalile ahano nimkome.”
32Yonasani kamwidika aba wake, “Heule kobama kumkoma Daudi? Yatendile choni?”
33Sauli baho kamwasila Yonasani ghumgoha yamkome. Kuya Yonasani kamanya ghendo ka aba wake tsakabama kumkoma Daudi.
34Kuya Yonasani, aku kaghudubuka ghendo tsakoka kulawa hana imetsa, wala ng'ajile baye chochose litsuwa alyo lya keli lya ichihungo cha ukwima ghumwetsi, kwapfila tsakona usungu ng'ani apfila aba wake pfayamghelile chinyala kwa aghala ghanyang'ali yomtendela Daudi. 35Ilupfi yake nemitondo, Yonasani tsakaghenda akula kumghunda kwitingana na Daudi ka pfawelaghane. Tsakaghenda ako na msongolo yumwe. 36Hayapfikile ako kamlongela imsongolo wake ayula, “Tsuma ukaibame iminde yanikwasa.” Msongolo ayula hayang'ali yotsuma, Yonasani kasa imishale kumlumbilila imsongolo ayula. 37Imsongolo ayula hayapfikile hanu hailaghalile imishale, Yonasani kamkemelela imsongolo ayula, “Angu imishale ng'aili hambele hako baye? 38Usumke uke, uleke kwima hanu aho.” Imsongolo ayula kasola imishale na koya kwa Yonasani. 39Lekeni imsongolo ayula ng'amanyile ichinu chochose baye. Yonasani na Daudi wawo waliyeka iwamanyile. 40Yonasani kamwing'a imsongolo ayula imishale yake na kamlongela, “Ghenda, uighale kuna ghumji.”
41Imsongolo ayula hayokile, Daudi kalawa hanu heyepfisile habehi na lilundo lya ghamabwe. Daudi kenama hambele ha Yonasani mala ndatu mbaka chihanga chake chidonza hasi kwa kumheshimu. Wose weli, Daudi na Yonasani wenonela na welilila. Lekeni Daudi tsakalila ng'ani kubita Yonasani. 42Kuya Yonasani kamlongela Daudi, “Ghenda tseghamba, kwaapfila wose weli tsatwilaha kwa taghwa lya IMNDEWA, ka ghweghwe na nene twa sale, IMNDEWA yawe mkalangama wetu, na yawe mkalangama kwa watsukulu wangu na watsukulu wako ghamatsuwa ghose.” Kuya Daudi koka, naye Yonasani koya kuna ghumji.
