Nuhu
9Aino mbuli ya Nuhu.
Nuhu tsakakala imunu yanoghile yaliheka, tsakakala kahela totso mna ghamatsuwa ghake. Yang'ali yokala pfinoghile ne Imulungu. 10Nuhu tsakakala ne iwana wadatu, Shemu, Hamu na Yafeti.
11Imulungu kayona isi iha ghendo, imema ughobo. 12Imulungu kailola isi, kayona ikala iha, kwaapfila iwanu wose wang'ali wokala pfihile.
13Apfo Imulungu kamlongela Nuhu, “Nitsowakoma iwanu wose iwali muisi, kwaapfila woimemesa ughobo isi yose. Nolongesa nitsowakoma wose na isi yose. 14Apfo witsengele safina kwa mbiki wa mmingo, utende pfiheleto mghati mwake na uibakatse lami mghati na kunze. 15Uitsenge pfino. Utali wake mita mia imwe selasini na tisa, ughatsi wake mita ishilini na tano na kulawa hasi mbaka mchanya iwe mita kumi na tano. 16Safina ayo iwe na kano ndatu, ya kuchanya, ya haghati na ya kuhisi, na wike libani mlubapfu. Wike nusu mita mghati mwe chiswili na kano. 17Ulole, nitsoghala gharika muisi mwose, kuwakoma iwapfilumbe wose iwali muisi. Ichinu chochose ichili muisi chitsakufa. 18Lekeni nitsakwika laghano na ghweghwe, kutsakwingila mna safina, ghweghwe na mwehe wako na iwanagho hamwe ne iwapinga wawo. 19Uwaghale mna safina wapfilumbe weli weli, immale ne ipinga, ili wawe waghima hamwe naghwe. 20Usole wapfideghe weli weli wa chila aina, wanyama weli weli wa chila aina na awala iwotambala weli weli, ili wawe waghima hamwe naghwe. 21Usole pfijo pfose na wikile chijo kwaajili yenu na kwaajili yawo.” 22Nuhu katenda ka Imulungu pfayamlaghitse.
1IMNDEWA kamlongela Nuhu, “Wingile mna safina, ghwegwe ne iwanu wose wa kaye yako, kwaapfila nikwona ghweghwe uliheka iutenda ghanoghile mna isi yose. 2Uwasole iwanyama wose yaniwatoghole kwa nambiko, mmale ne pinga wawe saba saba, lekeni iwanyama yanisiwatoghola kwa nambiko, uwasole weli weli, immale ne ipinga. 3Pfipfila uwasole iwapfideghe wose mmale ne pinga wawe saba saba, ili waghendelele kweleka keli muisi. 4Ghamatsuwa saba kulawa leloli nitsoilekelela imvula itowe kwa ghamatsuwa alubaini, chilo na misi, nitsowakoma iwapfilumbe wose yaniwalumbile.” 5Nuhu kaghatenda ghose ka Imulungu pfayamlaghitse.
6Nuhu tsakakala na miyaka miya sita gharika haitsile muisi. 7Nuhu, mwehe wake, iwanaghe ne iwapinga wawo wengila mna safina ng'ana gharika itse. 8Wanyama iwadeghete na yangawadeghete, iwapfideghe na iwapfilumbe wose iwotambala, 9weli weli, immale ne ipinga, wengila mghati mwa safina hamwe na Nuhu, ka Imulungu pfayamlaghitse Nuhu. 10Ghamatsuwa saba haghabitile, ghamatsi gha gharika ghanza kuighubika isi.
11Nuhu hayang'ali na miyaka miya sita, mna litsuwa lya kumi na saba ghumwetsi ghwa kabili, mbwibwi tsose itsighendese hasi tsilapfa ghamatsi, na kulanga tsakufughuka. 12Imvula tsaitowa kwa ghamatsuwa alubaini chilo ne misi. 13Mna litsuwa lilila Nuhu na mwehe wake na iwanaghe, Shemu, Hamu na Yafeti na wehe tsawo wadatu wengila mna safina. 14Wengila hamwe na iwanyama wose wa kumuhulo, iwanyama wose wa kupfughighwa, iwanyama wose iwotambala na iwapfideghe wose. 15Iwanyama wose iwaghima tsawengila weli weli mna safina hamwe na Nuhu. 16Iwanyama wose iwengile tsawakala mmale ne ipinga, ka Imulungu pfayamlaghitse Nuhu. Kuya IMNDEWA kamuhindila.
17Gharika ighendelela kwa ghamatsuwa alubaini, ghamatsi ghamema na safina yelela mchanya mwa isi. 18Ghamatsi ghaghendelela kumema muisi na safina yelela mchanya mwake. 19Ghamatsi ghamema ng'ani mna isi, ghaighubika imighongo yose mitali. 20Ghamatsi ghamema, imighongo ighubikighwa ka ghamoko kumi na mitano. 21Iwapfilumbe wose iwakalile muisi, iwapfideghe, iwanyama iwofughighwa, iwanyama wa kumuhulo, iwapfilumbe wose iwokala muisi ne iwanu wose tsawafa. 22Chila chinu chine ughima ichikalile muisi isakale chifa. 23Imulungu kawakoma iwapfilumbe wose iwali muisi isakale, iwanu, iwanyama na iwapfideghe. Tsakasighala Nuhu yaliyeka na awala iwengile naye mna safina. 24Ghamatsi agho tsaghakala muisi ghamatsuwa miya imwe na hamsini.
