Imulungu komkema Abramu
1Imulungu kamlongela Abramu, “Uileke isi yako, ndughu tsako, na kaye ya aba wako, ughende kune isi yanitsokulangusa. 2Nitsokutenda ghweghwe uwe ne iwanu wengi, na nitsolitenda taghwa lyako limanyike. Naghwe kutsakuwa ibalaka. 3Nitsowabaliki iwanu iwokubaliki, lekeni nitsowalighita iwanu iwokulighita. Kubitila ghweghwe iwanu wose iwali muisi watsobalikiighwa.”
4Apfo Abramu koka ka Imulungu pfayamlongele, na Loti tsakaghenda naye. Abram hayalawile Harani tsakana miyaka sabini na tano. 5Abramu kamsola mwehe wake Sarai na Loti imwana wa ndughu yake, na ipfinu pfake pfose ne iwanu wose iyawapatile mna isi ya Harani, nawo woka waghenda Kanaani.
Kuya hawengile mna isi ayo. 6Abramu tsakabita mna isi ayo mbaka kapfika Shekemu, hanu haenzeluke hane Mbiki mkulu ghwa Mole. Ghamatsuwa agho Wakanaani wang'ali wokala mna isi ila. 7Imulungu kamlawila Abramu, kamlongela, “Nitsoweng'a iwanagho isi ino.” Apfo Abramu kamtsengela Imulungu iyamlawile hanu ha kulapfila inambiko ha ghamabwe.
8Hambele Abramu koka kaghenda mna isi ya pfidunda iili ubali wa kwalilawila litsua wa Beseli, ako keka hema lyake, tsakakala haghati mwa ghumji ghwa Beseli na ghumji ghwa Ai. Baho kamtsengela Imulungu hanu ha kulapfila inambiko kuya kamtambikila. 9Kuya Abramu kaghendelela kuka mbaka kapfika Negebu.
