Mulima wevapewili vandu va likabila la Zabuloni
10Gudugudu ya datu yaligwilalili likabila la Zabuloni na likapewa pandu pa mulima lukolo kwa lukolo. Pandu pavi ndi pakadandasika mbaka ku Salidi. 11Kuhuma kwenuko mubaka waki ukadandasika mbaka kuupandi welitipamila lilanga mbaka muji wa Maleali, ukapita mumihana ya muji wa Dabesheti kuhamba ku kapela kekavii kuupandi welihumila lilanga papipi na muji wa Yokineamu. 12Kuhuma ku Salidi mubaka wenuwo ukapita kuupandi welihumila lilanga mbaka kumulima wa Kisiloti Taboli ukayendelela mbaka Dabelati na kuhika Yafia. 13Kuhuma Yafia ukahamba kwelihumila lilanga mbaka ku muji wa Gati Hefili na muji wa Eti Kasini na kuhamba mbaka kumuji wa Limoni na kung'anamuka kuhamba ku muji wa Nea. 14Kwenuko mubaka ukautindila mulima wenuwo kwa upandi wa kasikazini mbaka ku muji wa Hanatoni na kumalakisila kulikemba la Yifitaheli. 15Pamonga na miji ya Katati na muji wa Nahalali na muji wa Shimloni na muji wa Idala na muji wa Betelehemu. Yavii na miji kumi na hivili pamonga na hijiji yaki. 16Yeniyo ndi miji na hijiji yaki yevapewili vandu va likabila la Zabuloni lukolo kwa lukolo.
