Vaisilaeli viyomboka mfuleni Yoludani
1Yoshua na Vaisilaeli voha vakawuka lukela pehe kuhuma ku Shitimu, vakahamba mbaka ku mfuleni Yoludani, kwevatamili kwa lukumbi kwakona kuyomboka. 2Pegamaliki magono gadatu, vachilongosi venavo vakavapitila vandu mukambi yoha, 3akavajovela vandu, “Pemukuliwona Lisanduku la lilaganu la Bambu Chapanga winu ligegiwi na vamteta va Valawi, ndi muwukayi penapo pemuvili na muvalandayi. 4Pemukuvalanda yati mwimanya njila, muni nyenye muwahi lepi kupita njila yeniyo. Nambu mukotokayi kulihegelela papipi Lisanduku la lilaganu, mulilekayi ngati utali wa kilomita yimonga.”
5Yoshua akavajovela vandu, “Mujinyambisa muni muyidakiliwa mukumfugamila Bambu Chapanga, muni chilau Bambu Chapanga yati ihenga mambu gachinamtiti pagati yinu.” 6Bahapo Yoshua akavajovela vamteta, “Mnyakulayi Lisanduku la lilaganu mulongolelayi nalu palongolo ya vandu.” Na vene vakakita ngati cheavajovili.
7Bambu Chapanga akamujovela Yoshua, “Lelu yati nitumbula kukukita ulolekana wamvaha palongolo ya Vaisilaeli, muni vamanyayi kuvya nivili pamonga na veve ngati chenavili pamonga na Musa. 8Yati ukuvajovela vamteta vevagegili Lisanduku la Lilaganu lukumbi pevihegelela kuhika pamuhana wa mfuleni Yoludani vayimayi penapo.”
9Penapo Yoshua akavajovela Vaisilaeli, “Mubwelayi kuni mugayuwanila malovi ga Bambu, Chapanga winu.” 10Yoshua akayendelela kujova, “Kwa lijambu lenili yati mumanya kuvya Chapanga mweavi mumi ndi avii pamonga na nyenye na kuvya chakaka yati akuvavinga palongolo yinu Vakanaani na Vahiti na Vahivi na Vapelizi na Vagiligashi na Vaamoli na Vayebusi. 11Mulolayi Lisanduku la Lilaganu la Bambu Chapanga wa mulima woha livili papipi kupita palongolo yinu kuyomboka mfuleni Yoludani. 12Hinu muhagulayi vagosi kumi na vavili, kuhuma mumakabila ga Isilaeli, mundu mumonga mu kila likabila. 13Lukumbi luwayu za vamteta vevagegili Lisanduku la Lilaganu la Bambu Chapanga, Bambu wa mulima woha peziyingila mumanji ga mfuleni Yoludani, penapo manji ga mfuleni wenuwo gegigenda yati gileka kugenda. Na manji gegihumila kunena yati gilundimana na kuyima pamonga ngati luwumba.”
14Penapo vandu vawukili mu kambi zavi na kuhamba kuyomboka mfuleni Yoludani, vamteta vakavalongolela kuni vagegili Lisanduku la Lilaganu. 15Lukumbi lwenulo lwavili lusenje lwa mabenu, na mfuleni Yoludani wamemili neju mbaka mumihana muni umemaga lukumbi ngati lwenulo.
Vamteta vevagegili Lisanduku la lilaganu pevahikili pa mfuleni Yoludani na pevalivatili ndu manji ga mumihana ya mfuleni, 16manji gegahelelayi kuhumila upandi wa kunena gakayima na kulundikana na kuvya ngati luwumba gakahika mbaka ku Adamu chijiji chechivili papipi na muji wa Saletani. Manji gegahelelayi kunyasi kuhamba Nyanja ya Mwinyu gakawuka goha, na vandu vakayomboka kuhamba ku muji wa Yeliko. 17Vamteta vevagegili Lisanduku la Lilaganu la Bambu Chapanga vala, vakayima pandu payumu pagati ya mfuleni Yoludani, na Vaisilaeli voha vakapita pandu payumu.
