Yoshua ilongela na Vandu ku Shekemu
1Kangi Yoshua akavakemela pamonga vandu vamakabila goha ga Isilaeli ku Shekemu. Akavakemela vagogo na vachilongosi na vahamula na vatangatila va pa Isilaeli, na vene vakabwela palongolo ya Chapanga. 2Yoshua akavajovela vandu voha, “Bambu Chapanga, Chapanga wa Vaisilaeli ijova naha, ‘Kadeni vagogo vinu vatamili kumwambu ya mfuleni Efulate vakaifugamila michapanga hingi. Gogo mmonga avii Tela, dadi wavi Abulahamu na Naholi. 3Nambu namuwusili dadi winu Abulahamu kuhuma kumlima wenuwo kumwambu ya mfuleni Efulate na kumuleta apa pa Kanaani, penamupelili vavelekwa vamahele. Namupelili Isaka, 4na Isaka namupelili Yakobo na Esau. Esau namupelili mulima wa vitumbi wa Seili yivya yaki. Nambu Yakobo na vana vaki vahambili ku Misili. 5Kangi nikavatuma Musa na Haluni ku Misili na nene nikayitova Misili kwa matovelu, na mwanakandahi nikavawusa nyenye mwenumo. 6Navawusili vagogo vinu kuhuma ku Misili na kuvahikisa mbaka kunyanja ya Shamu. Vamisili vavalandalili kuni vavii na mutuka za kuhutwa na hinyama pamonga manjolinjoli vevakweli hinyama yeyikemiwa falasi, 7Nambu Vaisilaeli pevanivembili nene Bambu Chapanga kugana utangatila, ndi nikavika chitita pagati yavi na Vamisili na kuyikita nyanja yivagubika Vamisili. Nyenye mwavene mugamanyili gala genavakitili Vamisili.
Mwatamili kulukongolo kwa magono gamahele.’”
8Kangi nikavalongosa mbaka kumulima wa Vaamoli vevatamili kuupandi waliumila lilanga wa mfuleni Yoludani. Vakatovana na nyenye nambu nene navapelili nyenye uhotola, navakomakisi na kuutola mulima wavi. 9Na mwene Balaki mwana wa Sipoli, nkosi wa ku Moabu, peajitendekihi kuhamba kukomana na Vaisilaeli. Akamgongolela Balaamu mwana wa Beoli abwela kuvapela likoto nyenye. 10Nambu nene namuyuwanili lepi Balaamu, na mwene yikamugana avamotisa neju, na nene nikavasangula nyenye kuhuma mumawoko ga Balaki. 11Ndi mukayomboka mfuleni Yoludani na kuhika Yeliko. Vandu va ku Yeliko vakatovana na nyenye, chevakitili Vaamoli na Vapelizi na Vakanaani na Vahiti na Vagiligashi na Vahivi na Vayebusi. Nene nikavapela uhotola wa kuvahotola vene. 12Natumili manyigu palongolo yinu gegavavingisini palongolo yinu vala vankosi vavili va Vaamoli. Mwatolili lepi mapanga wala nduta zinu vyevyavapelili uhotola. 13Penapo navapelili nyenye mulima weunamigunda yemwangahilima na miji yemwangaijenga yila yemwitama mugati yaki na mwilya mizabibu na zeituni yamwangahipanda.
14“Hinu mumfugamila Bambu Chapanga na kumuhengela mwene kwa usadikika woha. Muhitagayi kutali michapanga yevayifugamilayi vadadi vinu kula kumwambu ya mfuleni Efulati na ku Misili. Na nyenye mumuhengela Bambu Chapanga. 15Ngati mwigana lepi kumuhengela Bambu Chapanga hinu muhagulayi lelu ndi yani mwemukumuhengela. Kuvya ndi michapanga hila yevayihengelayi vadadi vinu kumwambu ya mfuleni Efulate, amala michapanga ya Vaamoli ava mwemutama navu pamulima wavi. Nambu nene na nyumba yangu yati tikumuhengela Bambu Chapanga.”
16Penapo vandu vakamuyangula, “Katu yati tihotola lepi kuleka kumuhengela Bambu Chapanga na kuyihengela michapanga hingi. 17Muni Bambu Chapanga, Chapanga witu ndi mweatiwusili tete pamonga na vagogo vitu kumulima wa Misili kwetavii vavanda, tagaweni kwa mihu gitu tavete mambu gachinamtiti geahengili. Akatiyunga mulugendu lwitu lwoha na pagati ya vandu va milima yoha yila yetapitili pagati yavi. 18Bambu Chapanga avavingili vandu va milima yoha pamonga na Vaamoli vevatamayi pamulima uwu. Hinu na tete yati tikumuhengela Bambu Chapanga muni mwene ndi Chapanga witu.”
19Nambu Yoshua akavajovela vandu, “Nyenye mwihotola lepi kumuhengela Bambu Chapanga muni mwene ndi Chapanga Msopi. Mwene ndi Chapanga mweana wihu. Yati akuvalekekesa lepi kwa kung'anamuka kwinu na kubuda kwinu. 20Ngati mukamleka Bambu Chapanga na kuyihengelala michapanga ya milima hingi, ndi yati akuvang'anamukila na kuvaletela mbunu na kuvakomakesa njwee, hati pamonga kuvya avahengili mambu aga goha gabwina.”
21Nambu vandu vakamujovela Yoshua, “Lepi, tete yati tikumuhengela Bambu Chapanga.”
22Penapo Yoshua akavajovela, “Nyenye mwavene mjova chechivili mumitima yinu, kuvya muhagwili kumuhengela Bambu Chapanga.”
Na vene vakamuyangula, “Ena, chenichi ndi chatijovili.”
23Na mwene akavajovela, “Hinu muwusa michapanga ya chiyehe yemuvii nayu, na mitima yinu yimuhuvalila Bambu Chapanga wa Isilaeli.”
24Na vene vakamujovela Yoshua, “Yati tikumuhengela Bambu Chapanga, Chapanga witu na kugayidakila malagizu gaki.”
25Hinu ligono lila Yoshua akakita lilaganu na Vaisilaeli ku Shekemu, akavapela mihilu na malagizu ga kugalanda. 26Yoshua akagayandika mambu genago goha muchitabu cha mihilu ya Chapanga. Kangi akatola liganga livaha na kuliyimika pahi ya mkongo wa mwaloni papipi na lindanda la Bambu Chapanga. 27Yoshua akavajovela vandu voha, “Mulola liganga lenili liyuwini goha getijovili. Liyuwini malovi goha geajovi Bambu Chapanga kutivala tete, yati lijova ngati yati mumbela Chapanga winu.” 28Penapo Yoshua akavalaga vandu, na kila mundu akahamba pandu peapewili kuvya paki.
