Valawi vibaguliwa ndava ya Bambu
5Kavili Bambu Chapanga amjovili Musa, 6“Uvabagula Valawi kuhuma kwa Vaisilaeli, vayidakiliwa kwa lihengu la kufugama. 7Chenichi ndi cheukitayi, vanyunyuzila manji ga kuvanyambisa kangi uvajovela vajikete higa hyoha, vachapa nyula zavi na vene yati vivya bwina. 8Kangi vamtola mpapakasi mmonga pamonga na luteta lwaki lwa uhembe nyililili weuhangisini na mahuta ga zeituni, kangi na veve yati utola ng'ombi yngi mgosi ndava ya luteta lwa kuwusa kumbudila Chapanga. 9Kangi uvaleta pamonga vandu voha va Islaeli na uvajovela Valawi vayima palongolo ya Lindanda la kuonganekela ndva ya Chapanga. 10Peukuvaleta Valawi palongolo yangu, va Isilaeli yati vakuvavikila mawoko Valawi mumituyavi, 11kangi Aloni yati akuvavika venavo palongolo yangu ngati luteta lwa kuyinuliwa kuhuma kwa Vaislaeli muni vajitendekela vanihengela. 12Pevimala, Valawi yati vivika mawoko gavi panani ya mitu ya ng'ombi zigosi, mmonga wavi yati ukumuwusa kuvya luteta lwa kuwusa kumbudila Chapanga, na yungi uyo yati ukumuwusa kuvya luteta lwa kutinyiswa yeyivikiwa kwangu ndava ya kuvavikila utepulanisi Valawi.”
13“Ndi yati ukuvayimika Valawi palongolo ya Aloni na vana vaki na kuvavika palongolo yangu ngati luteta lwa kuyinuliwa. 14Munjila yeniyi ndi yati ukuvabagula Valawi kuhuma Vaisilaeli vangi, na vene Valawi yati vivya vangu. 15Peumala kuvabagula Valawi na kuvawusa ngati luteta lwa kupungila, yati vibwela kuhenge lihengu lavi pa Lindanda la kukonganekela. 16Vene ndi Vaisilaeli chakaka ndi veviwusiwa nene njwe. Venavo vawusiwi vavya vangu njweee pahala pa chiveleku vi Isilaeli, chiveleku cha kutumbula chigosi kuhuma kwa kila mdala wa Chiisilaeli. 17Kila chiveleku cha kutumbula chigosi pagati ya Vaisilaeli, avya mundu amala hinyama, ndi wangu. Lukumbi penavakomili viveleku vyoha vya kutumbula kula ku Misili, navavagwili vene ndava ya nene namwene. 18Hinu nivatolili Valawi pahali pa viveleku vya kutumbula vya Vaisilaeli, 19na nimempeli venavo Aloni na vana vaki, ngati njombi kuhuma kwa Vaisilaeli, muni vakita lihengu pa Lindanda la kukonganekela ndava ya Chapanga, ndava ya Vaislaeli na kuvakitila utepulatanisi muni avayunga gahakahu gegihotola kuvakomakesa.”
20Musa, Aloni na vandu voha wa Vaisilaeli vakavakitila Valawi, ngati Bambu Chapanga cheamlagazili Musa. 21Valawi vakajinyambasa ndava vambudila Chapanga na kuchapa nyula zavi, na Aloni akavawusa ngati luteta lwa kuyinuliwa palongolo ya Bambu Chapanga. Mewa, Aloni akitili utepulanisi ndava yavi muni kuvanyambisa. 22Pegamaliki genago, Valawi vatubwili kuhenga lihengu lavi ku Lindanda la kukonganekela pahi ya uyimalila wa Aloni na vana vaki, ngati Bambu Chapanga cheamlagazili Musa.
23Bambu Chapanga amjovili Musa, 24“Kila Mlawi mweavi ntanga ya miaka ishilini na mhanu na neju, iganikiwa akahenga lihengu mu Lindanda la kukonganekela, 25nambu peyihika ntanga ya miyaka hamusini, akoto kuyendelela kuhenga lihengu. 26Pegimalika genago, ihotola kuvatangaila Valawi vayaki pevihenga lihengu mu Lindanda la kukonganekela, nambu yati ihenga lepi lihengu laki mwene. Ndi cheukuvapangila lihengu Valawi.”
