Ndima wevapewili vadala vevagegiwi
1Vachilongosi wa vandu va likolo lwa Gileadi, mwana wa makili na mwana wa Manase na mwana wa Yosefu, vahambili kulongela na Musa na vachilongosi vangi wa lukolo lwa Vaisilaeli. 2Vakajova, “Bambu witu, Bambu Chapanga akulagizi kuvagavila vandu va Isilaeli mulima kwa nchuva, kuvya uhali wavi, mewa akulagizi uvapela vasikana va Selofehadi mlongo witu pandu wa dadi wavi. 3Hinu ngati vene yati vigegewa na vandu va makabila gangi ga Vaisilaeli, uhali wavi yati uwusiwa kuhuma uhali wa vagogo vitu na kuyonjokeseka kuvya uhali wa likabila lila levagegiwi valumbu. Hinu mulima witu yati wipungula. 4Kuligono la mselebuko wa kuwuyisa ndima kwa vene, uhali wavi yati uvalangiwa pamonga wula wa likabila levigegewa na ndi likabila litu yati lipata lepi uhali wenuo kavili.”
5“Hinu Musa akavalagiza Vaisilaeli lilagizu ili kuhuma kwa Bambu Chapanga, akavajovela, Vandu va lukolo lwa kabila la Yosefu, vajovili chakaka. 6Chenichi ndi Bambu Chapanga cheilagiza kuvavala vasikana va Selofehadi. Vihotola kugegewa na mundu yeyoha mwevakumgana, nambu vagegewa pagati ya lukolo lwa kabila la dadi waki ndi likabila Manase ndu. 7Ndima yevapewili likabila limonga likoto kupewa likabila lingi, kila Muisilaeli yati iyangalila ndima ya likabila laki. 8Mdala mweahali ndima mulikabila loloha la Isilaeli ndi yikumgana agegewa na mundu wa likabila la lukolo lwa dadi waki, muni kila Muisilaeli atalalila ndima vagogo waki. 9Ndi kawaka ndima ya likabila limonga lelitalilwa na likabila lingi. Kila likabia la Vaisilaeli yati likamulila uhali waki.”
10Chenichi ndi vasikana va Selofehadi chavakitili ngati Bambu Chapanga cheamalagizi Musa. 11Voha, Mala na Tiliza na Hogila na Milika na Noa vagegiwi na valongo va dadi wavi. 12Vagegiwi kwa vandu va lukolo lwa Manase mwana wa Yosefu, na ndima yavi yasigalili mulikabila la dadi wavi.
13Yeniyo ndi mihilu na malagizu gala Bambu Chapanga avapeli Vaisilaeli kupitila Musa muselede za Moabu, kumwambu ya mfuleni Yoludani papipi na muji wa Yeliko.
