ኢስ ሃዕሮ ወኣድ ላገ ሎረ ቂሰ ሀለቀ እሁስ
1ቴሁ ጠወዕኖም ጠዊች ቡዕሉስ ከኒት፤ ሁኩንን ጉዕሚች ሎረ እኮ መገን ዎመ ቦርጭመ መኬ አዲን ሰማን አፉዕሌ ህትናሙ ሎሩ ቂሰ ሀለቁ ዮኔ። 2እስ ሀንቅ ዱካነ እኮ ዱእ ምኒ ኣዜን ቂሰ ሀለቀ እክ ካደመኖሃን፤ ዱካኑስ መን አንጋን እሁዕነ ቀርች አንጋን ካሰሞእሃን። 3ሎሩ ቂሰ ሀለቀት ጉዕሙንኩ ሾመንታኢሁ መገኒሃ ሰደቀለከ ክትመ ሆንጠህሲሃት፤ ህካን እኮቤቺሃ ከን ቂስቺሃ ክትሚ ሆንጠህሴኖ መቱርቹ ሄኡ ሀስሰኖስ። 4እስ ኣዱንያ አሌን ሄዕዮእቃን ቂስቹ እሀኖበአ እቅ፤ ሁኩንን ሕግጊን መገኒሃ አኤኖርቹ ሆንጠህሳ ዎሉ ቂሰት ሄኦቤቺሃት። 5እሰ አቶኢሁ ሰማን ዮኢሃ ምሳልተለከ ሀላሃ እኮሀን ኣዜኒት እቅ፤ ሁኩን እኮሁ ሙስ ዱካነ መክሶተ ቅጥዬ ወክት መገኑ «ቆተ አሌን ለሌሄ ሃሊን ጉዕመርቹንከ አገርት አእ» ይ አዘዦስጋት። 6ቴሱ እኮጎሬ ኢስ በል መንቹ እኮ ወኣድ ላገተ ኑባቾ ወኣድ ላጋች ሎረ እኮቤቺሃለከ ቆሀኖ ወኣድ ላጋን ጀመረሞሃ እኮቤቺሃ እሲሃ ኣሰንቶ ሆጉት ሎረታን።
7ዎዕኔ ወኣዴን ሉጨንሹ ዮበእቃን ለንክ ወኣድ ላገት ሀሲሳሰበአ እቅ። 8መሰንትስ ቀርቹ መገኑ እሳን ሉጨንሸ ደግ
«ቴሱ አን እስራኤልለከ አይሁድ ባድ መኒን
ሃዕሮ ወኣድ ላገተ ኣጋም ወክቱ አሜተኖ» የኖ ቀርቹ።
9ኩ ወኣድ ላገተ አን ግብጽ ባዲች ፉሾሰተ አንገሰ አፎም በር አበናኖንከሰ ኣጎም ወኣድ ላጋ ደነበአ፤ መሰንትስ እሰ ኢ ወኣድ ላገተ ጠረኝት ሄኡ ሆጎቤቺሃ አጉሮንሰ።
10«ህከን ዘማኒች ኤተሮን እስረኤል መኒሃ
ኣጋም ወኣድ ላገት ተኔት ይ ጠወዕዮ ቀርቹ፤
ኢ ሕገንከ ቀልቤንከሰ አኣም፤
ወዘናንከሰን ከተባም፤
አነሰ መገኑ እሃም፤
እሰን ኢ ኡመት እካአ።
11እሳችን አዪሁ ዎሉ መነሃ
አመስቤቱ ‹መገኑ ደግ› ይ ተማርሰኖስበአ፤
መሰንትስ ቀዊች ኬሽ ሎረ ኢለ ጉዕሙንኩ
ኤሳሃ ደጋኤ።
12አን እሰ ሂልመተ አጉረንሰ፤
ጩብሰን ለንኪሃ ሰውያምበአ» የኖ ቀርቹ።
13ቴሱ «ሃዕሮ ወአድ ላገተ» የኖ ወክት ወዕኔ ወኣድ ላገተ ኑባቹ አዕዮኡ ዩሃን፤ ህካን እኮቤቺሃ ኑባጴኢሁ በአኖ ወክቱ ኢልዮኡ ዩሃን።
