पवित्र जागा लायी भेंट
(निर्गमन ३५:४-९)
1परमेश्वर न मूसा सी कह्यो, 2“इस्राएलियों सी यो कहजो कि मोरो लायी भेंट लाये; जितनो अपनी इच्छा सी देनो चाहेंन उन सभी सी मोरी भेंट लेजो। 3अऊर जिन चिजों की भेंट उन्को सी लेनो हय हि यो आय; मतलब सोना, चांदी अऊर पीतल, 4नीलो, जामुनी अऊर लाल रंग को कपड़ा, पतलो सूत सी बुन्यो कपड़ा, शेरी को बाल, 5लाल रंग सी रंगी हुयो मेंढी की खाल, सुईसों की खाल, बबूल की लकड़ी, 6दीया लायी तेल, अभिषेक को तेल लायी अऊर सुगन्धित धूप लायी सुगन्ध मसाला, 7एपोद पोशाक अऊर ओको ऊपर पहिनन वालो चपरास लायी सुलैमानी गोटा, अऊर जड़न लायी मनि। 8अऊर हि मोरो लायी एक पवित्र जागा बनाये कि मय उन्को बीच निवास करूं। 9जो कुछ मय तोख दिखाऊ हय, मतलब रहन की जागा अऊर ओको सब सामान को नमुना, ओकोच अनुसार तुम लोग ओख बनावो।”
