Nlhuku noweehana Naabramu
1Paahi Apwiiya Nlhuku nkayeerelha Naabramu, “Nthameke wiilhaponi winyu, mwaahiyeke ashilhoko inyu ni iwani ya athumwaninyu, nrweeke ilhapo inohalha aka uwoonihani. 2Kinokoupangani inyuva ukhalha nikosho no attu enchi, kinokouvahani ibarakha ni urumiha nchina ninyu ni inyu nnookhalha ibarakha.
3Nohalha uvahani ibarakha, kinommaha ibarakha
nohalha uulhavani, kinonlhava.
Wo iphiro inyu kinowaavaha ibarakha makosho onkhaye o velhaponi.”
4Paahi etu, Naabramu yahothama thoko Apwiiya Nlhuku chenre aya wo waalhehera, ni Nalutu yahorwaa vamoka ni ayo. Naabramu aari ntu o iyaakha makhumi saba ni nthanu ikatema vaathamme aya Uharani. 5Naabramu yahaakusha Asarai, ahanu aya, ni Nalutu mwaamwana a ahima aya, ni nhakhu waya wonkhaye ni attu onkhaye yaapantte aya Uharani uwo, nkayaathamacha nkayaarwaa ilhapo yo Ukanaani.
Vaakelha aya ilhapo yo Ukanaani vawo, 6Naabramu ahovira iriyari yo ilhapo mpaka Ushekemu, ilhapo itakatifu, vari miri cho More. Yeyo ikatema iyo Akanaani phi aari anenchi o yeyo ilhapo iyo. 7Phi vavawo Apwiiya Nlhuku vaakhumelhenlhe aya Naabramu, nkayeerelha, “Iyari inyu phi nohalha aka waavaha ilha ilhapo ilha.” Paahi, Naabramu yahothatha malhuku utheka madhubahu, waathekelha Apwiiya Nlhuku yaakhumelhenlhe. 8Kaanyuma aya Naabramu yahothama nkayaarwa umiakoni unosha nchuwa Ubetheli, nkayaatheka nihema variyari, iwani yo Ubetheli nthelha uneelha nchuwa, ni iwani yo Uayi unosha nchuwa. Vavawo tho yahothaha malhuku waathekelha Apwiiya Nlhuku madhubahu ni waalhepelha wo nchina naya. 9Yamalhekeru, Naabramu yahothepa urwaa nkwaha aya alhukamaka ilhapo cho Unegebu.
