Nalutu anoothama Usodoma
12Alheto elhi alhe nkayaakoha Nalutu, “Chani nhanaa ntu nkina vaa, veekinaka achishaana inyu ashilhopwana ama ashithiyana, ama attu yaavenke, ama ashilhoko inyu akina anokhalha ilha iwani ilha? Mwaathamihacheke vawani va chitema, 13ukhalhawaya ichuku yinchi ya attu anokhalha va ihaaphiyelha Apwiiya Nlhuku. Paahi ahoniruma niwe naahararia.”
14Paahi Nalutu nkayaarwelha manyaahokohaya yaathenlhe achishaana aya ashithiyana ayo, nkayeerelha, “Mwaatti mwaakuvieke, nthamache va vakittu va, ukhalhawaya Apwiiya Nlhuku anothanana ulhakalhiha iwani ilha!” Nansho yayo manyaattu ayo nkayoona thoko anowiiraka upanga iperwa.
15Wichishuru washeeke, minepa alhe yahaakurumicha Nalutu yiiraka, “Munkweke! Mwaakuvieke mwaakusheke ahanu inyu ni achishaana inyu elhi alha nhiwe mwaapotera iwani ilha vanohalha aya utwarushiya vawo.” 16Nalutu nkayaakhalha ni ureeshi. Nansho ukhalhawaya Apwiiya Nlhuku aari oonelhaka ikiriri, minepa chilhe chahaavara miono Nalutu ni ahanu aya ni achishaana aya elhi alhe nkayaakushacha mpaka uchereshere iwani. 17Vaakuminhe aya vachereshere iwani, nnepa mmoka nkaweerelha, “Nttaweke, mwiichaakiheke mwaashinene. Nhiwehe utulhi mena nheemelhe variwoothe unikooteni uwo. Nttawelheke umiakoni, nhiwe mwaalhakalhihiya.”
18Nalutu nkayaakhulha, “Mena thithi! Akinooria. 19Wo ikekhiaye mii namitheko inyu va, kihoona ikiriri inyu. Nhookholha ukumi aka, nansho akinooria uttawelha umiakoni uwo. Wowo ulhakalhihiya uwo unowa waakiphwanya kihinaphiya wowo, ni mii kinookhwa etu. 20Mwooneke, ulhe ihaawo iwani ikaani kinooria aka uttawelha, iri vakhiviru. Paahi etu nkihiyeke kittawelhe wowo. Ilhe iwani ikani tu, wowo kinokowookhwaa.”
21Nnepa uyo nkawaakhulha, “Aye, kihorumelhelha. Akinolhakalhiha iwani iromonlhe inyu iyo. 22Mwaakuviheke! Nttawelheke wowo ni mii akinooria upanga ittu iriyoothe mpaka vanohalha inyu uphiya wowo.” Paahi yeyo iwani iyo nkayeehaniya Soari, maana aya, “Iwani ikani.”
