Asara anomwoomolha Hajiri ni mwaamwanawe
9Nihuku nimoka kaanyuma, Asara ahomwoona Ishmaeli mwaana a Aburahimu yariye ni Hajiri, Mmisri, ampangelhaka ichimwa mwaamwanaya Isaka. 10Paahi Asara nkayeerelha Aburahimu, “Mwoomolhe uwo ipotta inyu nthiyana uyo ni mwaamwanawe uyo. Khavanooria mena mwaana o nthiyana ipotta uhiyeriya nhakhu vamoka ni mwaamwanaka Isaka.” 11Nenno nlhove nno nahaahelha ihuzuni Aburahimu chinene, ukhalhawaya ni Ishmaeli uyo aari mwaamwanaya chiicho.
12Nansho Nlhuku nkeerelha Aburahimu, “Nhikelhiye ihuzuni wo nlhatu no mwaana uyo, mena ipotta inyu nthiyana uyo. Ittu iriyoothe inohalha inyu uhimeriya ni Asara, mpangeke chiicho. Wo ikekhiaye iyari inyu inohalha ukhuma wa Isaka, thoko chinre aka wo ulhehani. 13Ni wo yoyo mwaana a ipotta inyu nthiyana uyo, kinompanga ukhalha phi athumwanaya nikosho attu enchi ukhalhawaya ni uyo mwaamwaninyu.”
14Paahi etu wichishuru washeekeru, Aburahimu ahokusha yolhia ni ntumpa wo maashi, nkayammaha Hajiri ni unthatha vanikhathani, nkayaamwiirelha athame vamoka ni mwaamwanawe. Hajiri nkaathama nkaarwa athemwathemwaka uthakoni Ubeer Sheba.
15Maashi alhe vaamanlhe aya muntumpani mmwe, Hajiri ahomwaathalhelha mwaamwanawe vathi vaniphumbulhuni. 16Nkaarwa uchereshere, nkonkoma, vaaphiya mieto imia imoka cho, ukhalhawaya munrimani eera, “Mbaya kihimwoone mwaamwanaka vanokhwawe.” Ni ikatema vaari awe nakhanlhe vavawo, Hajiri ahonlha.
17Nlhuku nkaamwiiwa mwaana vonlha awe ni nnepa wa Nlhuku nkawaamwiihana Hajiri ukhuma wiirimu, nkaweera, “Hajiri, unohuvelhani? Uhoove, Nlhuku heewa nlhove no mwaamwanao vari awe vawo. 18Weemelheke, urweeke wankusheke mwaana uyo ummarelheke rata mmathathani mwao, ukhalhawaya kinompanga ukhalha athumwanaya attu enchi.” 19Nlhuku nkampatakulha Hajiri miitho, nkoona ilhushi yo maashi, nkaarwa ni urika maashi, nkaachariha ntumpa awe, nkammuriha mwaamwanawe.
20Nlhuku aari vamoka ni yoyo mwaana uyo, ni uyo nkaathepa wunnuwa. Nkaakhalha uthakoni ni ukhalha ntu o wooria ulhupatta ni muura chinene. 21Vaari awe akhalhaka uthako wo Uparani anumwanawe ahonvekiha nthiyana o ukhuma Umisri.
