Isadaka chihinorumelhelhiya ni Nlhuku
17Yamalheke, Apwiiya Nlhuku yahaalhehera tho ashinna Musa wiira, 18“Ntu riyoothe nokhalha Uisraeli ama nlheto riyoothe nnonkhalhana inyu, akumihaka isadaka awe yo upahiya, ikhalhe yo uthaphulha ishaani ama isadaka yo uttuna wawe yo waakumihera Apwiiya Nlhuku, 19wiira arumelhelhiye umihoolho wa Apwiiya Nlhuku, akumiheke etu ing'ope ilhopwana ama ikhondoro ilhopwana ama ipuri ihiremanre. 20Nhinkumihe isadaka mwannama riyoothe o remara, isadaka iyo khinorumelhelhiya wo yoyo nlhatu uyo. 21Ntu riyoothe vanaakumihera awe Apwiiya Nlhuku isadaka yo ukhalha wo mpuha wiira athaphulhe ishaani, ama isadaka yo uttuna wawe, ukhuma mumphingoni mwo wo mihuwo chawe, athananaka wiira arumelhelhiye noothananiya wiira ankumiheke mwannama timinre. 22Nhinkumihe wa Apwiiya Nlhuku mwannama riyoothe ohoona, oremara, ontheelhe vakittu, nokhumiya ni uwooru, rii ni uvelhe ama ichikurukuute, wala nhaakumihe ukhalha isadaka yo upahiya vamooroni vachulhu madhubahu a Apwiiya Nlhuku. 23Paahi, yakhalhaka, nnokumiha isadaka yo n'dume no ing'ope ama mwaakhondoro rii ni induri imoka yoorekama ama yookhuvia chinene, nkumiheke ukhalha isadaka yo uttuna winyu, nansho nhinkumihe ukhalha isadaka yo uthapulha ishaani. 24Mwannama rakanlhe induri awe yo ulhopwana, ama inyakathiye, ama yuntheelhe, ama itupulhiye, mena nhaakumihere Apwiiya Nlhuku isadaka, nhiire chiicho velhaponi winyu.
25“Nhaapochere mena ashinama thoko yayo athumiheriye inyu ama uvahiya ni alheto, ni ukikumihera mii ukhalha yoolhia aka. Khanorumelhelhiya wo mahalha inyu ukhalhawaya ahoremara.”
26Yamalheke vavawo, Apwiiya Nlhuku yaheerelha ashinna Musa wiira, 27“Mwaang'ope nlhopwana ama mwaakhondoro nlhopwana ama mwaapuri nlhopwana ayariaka akhalheke ni anumwanawe wo mahuku saba. Nansho ukhuma nihuku no nane inowooria ukumihiya wa Apwiiya Nlhuku ukhalha isadaka yo upahiya vamooroni. 28Nansho yakhalhaka nnokumiha isadaka yo mwaang'ope ama mwaakhondoro, nhaahithe nihuku nimoka vamoka ni manyanaangoro aya.
29“Vanohalha inyu ukikumihera isadaka yo ukishukuru mii Apwiiya Nlhuku, nkumiheke wo iphiro inohalha inyu urumelhelhiya. 30Inama yo yoyo mwannama uyo ikhuuriyeke nenno nihuku, nhihalhihe inama mpaka waashelhe waya. Mii phi Apwiiya Nlhuku.
31“Nvarechesheke ni upanga thoko chinolhehera aka, Mii phi Apwiiya Nlhuku. 32Ni mena nhiruwanihe nchina naka nitakatifu, ukhalhawaya ihothananiya mii kithimichiye munlhokoni mwa attu o Israeli. Mii phi Apwiiya Nlhuku, kinouvahani utakatifu. 33Phi mii kuuthaminheni ilhapo yo Umisri wiira kikhalhe Nlhuku inyu. Mii phi Apwiiya Nlhuku.”
