Nathoz naka laꞌ men xkiꞌs Dios
11Mbay lo jwanꞌ reꞌ nzo toz jwanꞌ tej náꞌ lo goꞌ, nde nagana par náꞌ koꞌxkan náꞌy, tak tsowꞌ thoz nchen goꞌ. 12Ndablola ak goꞌ maestr loꞌ goꞌ xkiꞌs Dios, tak ndala nzolo goꞌ xkiꞌs Dios, per cheꞌla nakinꞌ goꞌ bere loꞌ náꞌ reta jwanꞌ mas nambi nchab lo xkiꞌs Dios lo goꞌ. Tak cheꞌ ngolal goꞌ xaja thi mbed jwanꞌ nakinꞌ gu nisa nde naꞌakta war, ta nak goꞌ. 13Nde re men jwanꞌ nak xaja nak mbed ta benꞌ nchuꞌ nisa, naꞌlid xaꞌ gan yen xaꞌ jwanꞌ galꞌ, tak xa nak mbed nak xaꞌ. 14Leꞌ re men jwanꞌ ngola xgab naꞌ lo xkiꞌs Dios, mnea xaꞌ kwan nak jwanꞌ wen nde kwan nak jwanꞌ narax, ta xa nak men jwanꞌ nchala re ned jwanꞌ.
1Jwanꞌ nasa, naꞌbixnod naꞌ leꞌga re jwanꞌ mteꞌd ner naꞌ lo chanꞌ Crist, ndablo thibla xyen naꞌ axta ke ak na men ngol xgab naꞌ lo xkiꞌs Dios. Naꞌberetra naꞌ lo re jwanꞌ mteꞌd ner naꞌ, nandabloda bere teꞌd naꞌ xomod laꞌ naꞌ re jwanꞌ narax nde xomod li lazoꞌ naꞌ Dios, 2nde tagaꞌ xa nak jwanꞌ ryoꞌle men, xa nak jwanꞌ xoꞌb xaꞌ yaꞌ xaꞌ yek men, xa leꞌ re xaꞌ nguj ryoꞌxban nde xa nyaꞌb Dios kwent nyenꞌ cho ya pen adiꞌ. 3Jwanꞌ nasa thipka toteꞌd náꞌ goꞌ sa ak goꞌ men ngol xgab naꞌ, tez Dios taꞌ diꞌs.
4Tak naꞌtyoxkwaꞌtraꞌ re men jwanꞌ mtoxnila Dios lonꞌ nde mkayala xaꞌ re jwanꞌ nde lo beꞌ ndalaꞌs Dios lo xaꞌ nde tagaꞌ mkayala xaꞌ Mbi Nayon, 5nde tagaꞌ mbyolo xaꞌ xa wen nak xkiꞌs Dios nde mbwiꞌ xaꞌ xa nak yalne chanꞌ Dios jwanꞌ nara yeꞌd, 6nde laꞌ xaꞌ, nalitra lazoꞌ xaꞌ xkiꞌs Dios, naꞌtoyaltraꞌ zyeꞌ xgab xaꞌ laꞌ xaꞌ re jwanꞌ narax, tak bere ngekeꞌ nakub xaꞌ Xinꞌ Dios lo kruz nde ngegoꞌ yantho xaꞌ Xinꞌ Dios lo reta men. 7Re men ndli lazoꞌn xkiꞌs Dios nak, xa nak izyo jwanꞌ nawe thoz ngeꞌ nit senꞌ ndlya yi ba, nde nawe thoz nchak jwanꞌ na lo men jwanꞌ ngobina, yalwen chanꞌ Dios nkaya xaꞌ ya. 8Mbay leꞌ izyo jwanꞌ benꞌta ya yis nde lus yis ndlyen, naꞌngen cho sinꞌ liy, mbyenla ke dey nde yola.
9Mbay teꞌnye ta mbez náꞌ, per nanaktey lo goꞌ wes náꞌ, ptanꞌ náꞌ, jwanꞌ nkeꞌ thoz lazoꞌ náꞌ, mnepaꞌ náꞌ lo ned wen nzo goꞋ ta tolaꞌ Dios goꞌ lo xken goꞌ. 10Tak galꞌ nak Dios nde naꞌrita Xaꞌ yek Xaꞌ reta sinꞌ mbli goꞌ lo Xaꞌ nde xa ndloꞌ nkeꞌ lazoꞌ goꞌ Xaꞌ, tak mbli goꞌ sinꞌ lo re men yez nayon chanꞌ Xaꞌ nde xa benꞌ nge li goꞌy naya. 11Per ncholaꞌs náꞌ ke kad thibaꞌ goꞌ tagaꞌ dib naban goꞌ thiblaꞌ ta bli goꞌ, axta kebeꞌ akpaꞌ jwanꞌ ngembed goꞌ. 12Naꞌzyaꞌbta goꞌ, cheꞌla bli goꞌ reta jwanꞌ ndli re men jwanꞌ ndli lazonꞌ Dios nde nanchoched lazoꞌ xaꞌ nkembed xaꞌ kayaꞌ xaꞌ reta jwanꞌ mkeyek Dios taꞌ Dios lo xaꞌ.
13Tak lo senꞌ mkeꞌyek Dios jwanꞌ li Dios lo Abraham, leꞌga leꞌ Xaꞌ mtobro Xaꞌ tak naꞌngetraꞌ cho mas naro lo Xaꞌ tobro Xaꞌ, 14nde nchab Dios lo Abraham: "Li tirpaꞌ, jwanꞌ toz li leyꞌ na lu, nde lin sa jwanꞌ toz yaꞌr men lo bin la." 15Nde lo nangoched lazoꞌ Abraham mbled xaꞌ, mkayaꞌga xaꞌ reta jwanꞌ mkeꞌyek Dios lo xaꞌ. 16Lo senꞌ thi mena nkeꞌyek xaꞌ li xaꞌ thi jwanꞌ, thi men mas ntak lo xaꞌ ntobro xaꞌ, sa li lazoꞌ men, li xaꞌ jwanꞌ ta ndej xaꞌ ya. 17Tamod sa, Dios ncholaꞌs loꞌ lo re men jwanꞌ kayaꞌ re jwanꞌ mkeꞌyek Dios taꞌ Dios, ke namzyeꞌd nek luda, jwanꞌ nasa leꞌga leꞌ Dios mtobro Dios lo mdej Diosa. 18Sa por rop jwanꞌ reꞌ naꞌnyeda zyeꞌy, xkiꞌs Dios jwanꞌ mdaꞌ Dios nde jwanꞌ mkeꞌyek Dios, nde mnenꞌ nankwinꞌta Dios. Jwanꞌ nasa re naꞌ jwanꞌ mbike lo Dios kone lazonꞌ, thibla tob naꞌ xgab naꞌ lo jwanꞌ ngembed naꞌ. 19Jwanꞌ ta ngembed naꞌ reꞌ ndli sa ne ndo xbin na' nde ngencho jwan' li wina, ta xa nak yiꞌb jwanꞌ ndyentob bark, tagaꞌ jwanꞌ reꞌ ndenkeꞌy men axta tenꞌ nke lar nayon toz tir, 20tenꞌ ngote Jesus por naꞌ sa mxalꞌ xaꞌ ned lonꞌ. Tamod sa dib tyemp nak Jesus nglweyꞌ ro lonꞌ, ta xa ngok Melquisedec nglweyꞌ.
