Senꞌ nyab Dios kwent lo re men
31Senꞌ yeꞌd Xinꞌ Mbiꞌ xajka Rey kon yalnaro chanꞌ Xaꞌ nde kon reta anj nayon, zyasa tyob Xaꞌ tenꞌ nyebeꞌ Xaꞌ kon yalnaro chanꞌ Xaꞌ. 32Nde dyope reta men nzi dib xis izyo lo Xaꞌ, nde koxaꞌ Xaꞌ men lo ta men, ta xa ngoxaꞌ xaꞌ nkenap mbakxilꞌ re mbakxilꞌ xij re chib. 33Nde re mbakxilꞌ kwek Xaꞌ lad ban Xaꞌ, leꞌ re chib kwek Xaꞌ lad beg Xaꞌ. 34Zyasa gab Rey lo re xaꞌ nzi lad ban Xaꞌ: "Deꞌ reta goꞌ ta mbli leyꞌ Xud naꞌ, pkayaꞌ goꞌ tenꞌ nyebeꞌ goꞌ jwanꞌ mtanꞌla Xaꞌ par goꞌ axta senꞌ mdoxkwaꞌ izyo. 35Senꞌ ndyanꞌ na, mdaꞌ goꞌ jwanꞌ mdan, nchek lazoꞌn nde mdaꞌ goꞌ nittye ngun, mketeꞌn plo nanakta las na, mdaꞌ goꞌ plo mbled na. 36Ngenta xab na nde mdaꞌ goꞌ lar ngok na, mxak yis na nde ngwa tna goꞌ na, mkeꞌn lizyiꞌb nde ngwa twiꞌ goꞌ na." 37Zyasa re xaꞌ galꞌ ndo nyabdiꞌs xaꞌ: "Señor, ¿poa mbwiꞌ náꞌ lu ndyanꞌ la nde mdaꞌ náꞌ jwanꞌ mdaa? ¿Poa mbwiꞌ náꞌ nchek lazoꞌa nde mdaꞌ náꞌ nitye nguꞌa? 38¿Poa mbwiꞌ náꞌ lu ngetea xaꞌgaꞌ izyo nde mdaꞌ náꞌ plo mbled la o ngenta xab la nde mdaꞌ náꞌ lar ngok la? 39¿O pol mbwiꞌ náꞌ nayiz la, o ngea lizyiꞌb nde ngwa tna náꞌ lu?" 40Zyasa kab Rey lo re xaꞌ ya: "Nipa na lo goꞌ senꞌ mbli goꞌy lo thi wes na o btanꞌ na, jwanꞌ mas nabil ndyak, lon mbli goꞌy."
41Zyasa noga lo xaꞌ ta nzi lad beg Rey gab Rey: "Baxa bike goꞌ, men xkap toz, wa goꞌ lo bel adiꞌ jwanꞌ natoxkwaꞌ la par Maxuꞌ kon re anj chanꞌ Maxuꞌ. 42Tak senꞌ ndyanꞌ na, naꞌndaꞌd goꞌ jwanꞌ ngwan, nchek lazoꞌn naꞌndaꞌd goꞌ nitye ngun, 43mketeꞌn izyo plo nanakta las na nde naꞌndaꞌd goꞌ plo mbed na. Ngenta xab na nde naꞌndaꞌd goꞌ lar ngok na, mxak yis na nde mkeꞌn lizyiꞌb nde naꞌngatnad goꞌ na." 44Zyasa no re xaꞌ ya kab lo Rey: "Señor, ¿pol mbwiꞌ náꞌ ndyanꞌ la, nchek lazoꞌa, mketea izyo plo nanakta las la, ngenta lar gok la, mxak yis la nde mkea lizyiꞌb nde naꞌndlastod náꞌ lu?" 45Leꞌ Rey kab lo re xaꞌ ya: "Nipa na lo goꞌ, kwent naꞌndlid goꞌy lo thi men jwanꞌ mas nabil ndyak, lon naꞌndlid goꞌy." 46Nde re xaꞌ reꞌ ya, ya lo pen adiꞌ, nde leꞌ re xaꞌ mbli jwanꞌ galꞌ, xaꞌ ya ya lo yalnaban adiꞌ.
