Cho sinꞌ li re diꞌs nagan
(Mr. 4:10-12; Lc. 8:9-10)
10Zyasa re xin'te'd Jesús mbike gax xaꞌ lo Jesús nde mnaꞌd di's xaꞌ:
—¿Kwan liy sa diꞌs nagan nia lo re men? 11Leꞌ Jesús mkab:
—Lo re goꞌ ndaꞌ Dios yen goꞌ re jwanꞌ nzonagaꞌs, chanꞌ yalnyebeꞌ lo beꞌ, per lo re xaꞌ ba namdad Dios sa. 12Tak xaꞌ jwanꞌ nchenla, masray yen xaꞌ, bro jwanꞌ yen xaꞌ, per xaꞌ jwanꞌ lud nchen, xaꞌ ya axta jwanꞌ lud nchen xaꞌ yiꞌb lo xaꞌ. 13Jwanꞌ nasa kon diꞌs nagan ndej na re jwanꞌ lo re men, tak teꞌnye ngwiꞌ xaꞌ na nanchonid lo xaꞌ, nde teꞌnye ndo yon xaꞌy, nayenta xaꞌy. 14Tamod lo re xaꞌ reꞌ ndoyak re jwanꞌ mni profet Isaías senꞌ lo nchab xaꞌ:
Teꞌnye mas kenza goꞌ, per nayenta goꞌ,
tenye mas ngwiꞌ goꞌ, per nayoxnid lo goꞌy.
15Tak ngok ne lazoꞌ yez reꞌ,
nde nanchonta xaꞌ diꞌs,
nde mbyowꞌ ngudlo xaꞌ,
sa nayonid lo xaꞌ,
nek gon xaꞌ diꞌs
nde neꞌka lazoꞌ xaꞌ naꞌyenta,
neka bere xaꞌ lon sa todanꞌ na xaꞌ.
16Per nabe'z toz nda re goꞌ tak ndoyal ngwiꞌ goꞌ nde ndoyal nchon goꞌ jwanꞌ reꞌ. 17Lipa nin lo goꞌ ke naꞌr toz re profet nde re xaꞌ galꞌ ndo, mdablaꞌs ngwiꞌ jwanꞌ ta ngwiꞌ goꞌ reꞌ, per naꞌngwiꞌd xaꞌy, ncholaꞌs xaꞌ ngon xaꞌ reta jwanꞌ nchon goꞌ per naꞌngonta xaꞌy.
