Thi mbyo rik mdodiꞌsno Jesús
(Mr. 10:17-31; Lc. 18:18-30)
16Zyasa ngwa wiꞌ thi xaꞌ lo Jesús nde mnab diꞌs xaꞌ:
—Maestr wen, ¿Cho jwanꞌ wen ndablo lin sa gal na yalnaban adiꞌ?
17Leꞌ Jesús mkab:
—¿Cho kwan ndliy ngolea na Xaꞌ wen? Ngenta cho nak men wen, benꞌta thita Xaꞌ wen nzo, Xaꞌ ya nak Dios. Per tez ncholaꞌs la kayaꞌa yalnaban adiꞌ, bli reta jwanꞌ nak yalnyebeꞌ chanꞌ Dios
18Leꞌ mbyo nchab:
—¿Xa nyay?
Leꞌ Jesús mkab:
—“Nakujta la men, nagaxnot la ngol jwanꞌ nanakta ngol la, nalit la yalwanꞌ, naꞌket la yalkwinꞌ xis men, 19bxob yek xud la nde xnaꞌa, nde pkeꞌ lazoꞌa ta men la xajka nke lazoꞌa leꞌga lu.”
20Leꞌ mbyo mkab lo Jesús
—Xata lud na nxobyek na reta jwanꞌ reꞌ, ¿Cho kwanraꞌ nchak jwad lin?
21Jesús mkab:
—Tez ncholaꞌs la galꞌpa ak la, wa nde pto reta jwanꞌ ngenoa nde ptaꞌy lo reta xaꞌ prob, sa kenoa brotos jwanꞌ ntak lo beꞌ, seraꞌ deꞌ nde ptonke xis na.
22Lo senꞌ mbin mbyo jwanꞌ na, nabil toz ngo lazoꞌ mbyo ndya mbyo tak bro toz jwanꞌ ngeno mbyo.
23Zyasa Jesús nchab lo re xin'te'd Xaꞌ:
—Nipa na lo goꞌ, ne toz yote thi xaꞌ rik, lo yalnyebeꞌ lo beꞌ. 24Bere nin lo goꞌ, mas naleꞌtraꞌ ridndaꞌb thi kamey yeꞌr xanꞌ yagux, ke yote thi xaꞌ rik lo yalnyebeꞌ chanꞌ Dios.
25Senꞌ mbin re xin'te'd Jesús jwanꞌ na, nzoyen xaꞌ nde nchab xaꞌ lo ta xaꞌ:
—¿Cho li gan tolaꞌ lazoꞌn sa?
26Leꞌ Jesús mbwiꞌ lo xin'te'd Xaꞌ nde nchab Xaꞌ:
—Par lo re men naꞌakta ak jwanꞌ reꞌ, per par lo Dios reta jwanꞌ teyal ak.
27Zyasa nchab Pedr lo Jesús:
—Náꞌ mblaꞌ reta jwanꞌ ngeno náꞌ nde mdonke náꞌ xis la, ¿Cho kwan gal náꞌ?
28Leꞌ Jesús mkab:
—Nipana lo goꞌ, lo senꞌ sin wiz senꞌ ak nakub reta jwanꞌ nde tyobsaꞌ Xinꞌ Mbiꞌ plo nyebeꞌ Xaꞌ, zyasa re goꞌ ta ndenke xis na, re tib sen goꞌ tyobsaꞌ, tiba goꞌ lo thi yasil sa nyab goꞌ kwent lo re tib sen bin xaꞌ Israel. 29Nde reta xaꞌ jwanꞌ mblaꞌ liz naꞌ, o wes naꞌ, o ptanꞌ naꞌ, o xud naꞌ, o xnanꞌ naꞌ, o xinꞌ naꞌ o xyon naꞌ, por kwent chanꞌ na, xaꞌ ya kayaꞌ tib ayoꞌ gob masra re jwanꞌ mblaꞌ xaꞌ, nde no kayaꞌ xaꞌ yalnaban adiꞌ. 30Nde nar toz re xaꞌ ndo ner, xa' ya yanꞌ axta xis, nde nar toz re xaꞌ ndo xis, xa' ya tyo ner.
