Jwan' ndablo li men lo ndli lazo' men Jesus
9Leꞌ jwanꞌ ta nkeꞌ lazoꞌ goꞌ ta men goꞌ bli go'y dib nzo lazoꞌ goꞌ. Blo'tal goꞌ re jwanꞌ narax, nde bli goꞌ jwan' wen. 10Pkeꞌ lazoꞌ goꞌ ta goꞌ xaga wes go' nde ptan' goꞌ, le' jwan' ta xoꞌbyek goꞌ, ptaꞌ goꞌ diꞌs lo ta goꞌ nde na'tyotow'ta go'.
11Naxax gok goꞌ, naꞌakta goꞌ men saꞌb nde bli goꞌ sinꞌ lo Xaꞌ Nyebeꞌ dib nzo lazoꞌ goꞌ.
12Blo nale lazoꞌ goꞌ laj ngembed goꞌ Xaꞌ Nyebeꞌ, bxek goꞌ laj ndoriꞌd goꞌ yalti nde thibla' ptodiꞌsno goꞌ Dios.
13Blaꞌsto goꞌ re men yes nayon chan' Jesucrist, nde pkayaꞌ goꞌ re men nzin liz goꞌ.
14Bli leyꞌ goꞌ re xaꞌ ngete chubla goꞌ, bli leyꞌ goꞌ xaꞌ nde nakeꞌded goꞌ xaꞌ.
15Blo nale lazoꞌ goꞌ kon re xaꞌ nale nzo lazonꞌ nde binꞌ goꞌ kon re xaꞌ nchonꞌ.
16Thita gok re goꞌ, naꞌxyalꞌta goꞌ, thita gok goꞌ kon re men nadoꞌ. Naꞌxyalꞌnod goꞌ yalnchak chanꞌ goꞌ.
17Naꞌkotad goꞌ narax lo men jwan' ndli narax lo go', pchal goꞌ li goꞌ wen lo reta men. 18Pchal goꞌ nabeꞌz breno goꞌ ta men goꞌ axta ploja li goꞌ gan. 19Re goꞌ wes na, ptan na, naꞌkotad goꞌ re jwanꞌ narax ndlino men goꞌ, cheꞌla ptaꞌ goꞌ diꞌs sa Dios kweskey lo xaꞌ, tak lo xkiꞌs Dios nchab: “Na jwan' nya'b kwent lo men, na yix ka xa', ta ne Xaꞌ Nyebeꞌ.” 20Nde noga nchaba: “Tez xaꞌ jwanꞌ nayiꞌ loa, ndyanꞌ xaꞌ, ptaꞌ jwanꞌ wa xaꞌ, tez nchek xaꞌ, ptaꞌ nit gu xaꞌ, lo senꞌ lia jwanꞌ reꞌ, tyolaꞌs xaꞌ lo jwanꞌ narax ndli xaꞌ.” 21Naꞌtad la diꞌs sa jwanꞌ narax liy gan loa, cheꞌla bli jwanꞌ wen sa lia gan lo jwanꞌ narax.
1Reta men ndablo xobyek men re xaꞌ nak sinꞌ nyebeꞌ lo yez. Tak naꞌngenta xaꞌ nak sinꞌ jwanꞌ naꞌmtanꞌta Dios, reta xaꞌ ta nak sinꞌ, Dios mtanꞌ xaꞌ. 2Jwanꞌ nasa, men jwanꞌ naꞌxobyekta re xaꞌ nak sinꞌ, men ya naꞌngexobyekta jwanꞌ mnabeꞌ Dios mbyanꞌ. Nde re xaꞌ jwanꞌ naꞌxobyekta, leꞌga lo xaꞌ nkwanꞌ xaꞌ yalke. 3Tak re xaꞌ nak sinꞌ naꞌnzid xaꞌ sa zyeb re men ndli jwanꞌ wen, leꞌ xaꞌ nzi sa zyeb re men ndli jwanꞌ narax. ¿Cho ncholaꞌs la naꞌzyepta lu re xaꞌ nak sinꞌ? Bli jwanꞌ wen, sa wen wiꞌ xaꞌ lu, 4tak xaꞌ nak men ndli sinꞌ lo Dios jwanꞌ li yalwen loa. Per tezka ndlia jwanꞌ narax, bzyeb, tak naꞌnakta benꞌ nale ngeteno xaꞌ yiꞌb, leꞌ xaꞌ nak men ndli sinꞌ lo Dios sa ta'pen xaꞌ re men ndli jwanꞌ narax. 5Jwanꞌ nasa, nakinꞌ toz xobyek men re xaꞌ nak sinꞌ, naꞌnakte benꞌta sa nata'penta xaꞌ men, cheꞌla ndablo li mena sa na'ngen cho xgab men kete men. 6Noga jwanꞌna ndli sa ngix goꞌ tmi low, tak re xaꞌ nak sinꞌ nak xaꞌ men ndli sinꞌ lo Dios nde jwanꞌna thibla' nak rsinꞌ xaꞌ.
7Bdi'x go' reta jwan' nda'b go'. Tez ndaꞌb goꞌ tmi low bdix goꞌy, tez cho kwan nyaꞌb xaꞌ nak sinꞌ lo goꞌ ptaꞌ goꞌy, tez cho xaꞌ ndablo xoꞌbyek goꞌ, bxoꞌbyek goꞌ xaꞌ, tez cho xaꞌ ndablo la yek goꞌ lonꞌ, bla yek goꞌ lo xaꞌ. 8Naꞌtyabta goꞌ nek thib lo men, che'la be'nta jwan' toyal tya'b go' nak keꞌ lazoꞌ goꞌ re ta men goꞌ. Tak men jwanꞌ nkeꞌ lazonꞌ ta men naꞌ, xaꞌ ya ndli re jwanꞌ nchab ley. 9Tak re yalnyebeꞌ nchab: “Naꞌgaxnod la tedib men jwanꞌ naꞌnakta salꞌ la, naꞌkujta la ta men la, naꞌliwanꞌta la, naꞌnid la diꞌs kwinꞌ xis ta men la, naꞌtyablaꞌsta la” reta yalnyebeꞌ reꞌ nde masraꞌ yalnyebeꞌ, cheꞌmod ndryoꞌxkana: “Pkeꞌ lazoꞌa ta men la a xaja nkeꞌ lazoꞌa leꞌga lu.” 10Leꞌ men jwanꞌ nkeꞌ lazonꞌ ta men naꞌ naꞌndlid xaꞌ narax lo ta men xaꞌ, jwanꞌ nasa senꞌ lo nkeꞌ lazoꞌ men ta men zya ndli men re jwanꞌ nchab ley.
11Nde jwanꞌ reꞌ ndli sa nakinꞌ yolo goꞌ tyemp nzinꞌ naya, ngoxoꞌb hor ryoꞌxkalꞌ naꞌ. Tak jwanꞌ ta tolaꞌ Dios naꞌ mas ndosin gaxlay lonꞌ naya ke lo wiz jwan' mbli lazonꞌ Xaꞌ. 12Nda tozla yalꞌ, merla ndetuxni. Jwanꞌ nasa, ndablo kotal na' re jwanꞌ nchak lo yalꞌkow, nde gok xab naꞌ jwanꞌ nak xni, xa ti sondad ta ndosaꞌ ba. 13Naxut ketenꞌ, xaga men ngete ndlyabe ba, naꞌketed go' lo re jwan' xkap, nde lo yagu' nit, na'gaxnod goꞌ men jwanꞌ na'ndabloda gaxno goꞌ, nek li goꞌ re jwanꞌ ndryoꞌ lazoꞌ belꞌ goꞌ, neka kwanꞌ goꞌ yalbyo nde naꞌxíd lazoꞌ goꞌ nye goꞌ chanꞌ ta men goꞌ. 14Cheꞌla pto goꞌ kon Jesucrist Xaꞌ Nyebeꞌ nde naꞌtaꞌd goꞌ diꞌs li gan lo go' re jwan' ndryo' lazo' bel' go'.
