यहूदा प्रदेशेरू बिछ़ड़नू ते गुलामी
1सिदकिय्याहे बाबेलेरे नबूकदनेस्सरे राज़े सेइं बगावत की। तैसेरे राज़ेरे नंवोवं सालेरे दशोवं महीनेरे दशोवं दिहाड़े बाबेलेरे राज़े अपनि पूरी सेना नेइतां यरूशलेमे पुड़ चढ़ाई की, ते तैस च़ेवरे पासन घेरो दित्तो। 2एन्च़रां सेइं नगर सिदकिय्याह राज़ेरे हुकूमतरे यारहे सालन तगर बाबेलेरे घेरे मां राव। 3यारोवं सालेरे च़ेवरोवं महीनेरे नंवोवं दिहाड़े करां लेइतां यरूशलेम नगरेरे लोकां केरे लेई खाने जो किछ न राव। 4तैखन नगरेरी शहरपनाही मां गत कोश्शू, ते दूईये दिवारां केरे मझ़ाटे ज़ै फाटक राज़ेरे बागरे नेड़े थियो तैस बत्तां सारे जंगी मड़द रातो रात नश्शे कसदी लोक त नगरे घेरतां थिये, राज़ो अराबा जो च़लो जेव। 5तैखन कसदी केरि सेना सिदकिय्याह राज़ेरो पीछो कियो, ते तै यरीहो नगरेरे मैइदाने मां गेइतां ट्लाव, ते तैसेरी सारी सेना तैस करां तितर-बितर भोइ जेई। 6तैखन बाबेलेरे सिपैहेईं सिदकिय्याह राज़ो ट्लेइतां रिबला नगरे मां बाबेलेरे राज़े नबूकदनेस्सरे कां नियो, ते तैस सज़ारो हुक्म दित्तो जेव। 7तैनेईं सिदकिय्याहेरां मट्ठां तैसेरे सामने मारां ते सिदकिय्याहेरी एछ़्छ़ी केढतां छ़ेडी ते तै पितलरी बेड़ी सेइं च़िकतां बाबेले जो नियो।
